أنا وكوثر قمنا بالسلامة ..

بسم الله ..

السلام عليكم ..

أبشركم اني ولدت بالسلامة .. والله عطاني بنت سميتها (( كوثر ))..


أنا ولدت من فترة بس النت عندي زفت ..


بدا الطلق علي تاريخ 5 / 10/ 2007.. ونزل مني نقط دم مع سائل لزج ..


الساعة 2 اللصبح..

وتم وياي الطلق يجي ويروح كل ساعتين ، كل ساعة ونص..

عاد أنا موعدي 18 / 10 2007 والولادة كانت مفجأة بالنسبة لي ..

زين الساعة 10 الصبح اتصلت اقرب صالون وقلت لهم حالة طارئة حالة ولادة ابي بسرعة أخلص حف وشيرة..

وخليت زوجي ينتظرني بره الصالون تحسبا لأي طارئ..

ومر اليوم وأنا بعدي على هل الحال طلق خفيف يروح ويجي كل ساعتين.. والمغرب تمشيت ويا زوجي .. وشربت زعفران منقوع مع ماي ورد..

وأكلت 7 تمرات من تمر المدينة وشربت ماي زمزم مقري عليه قرآن لتسهيل الولادة..

وشربت عصير أناناس وعصير باباي .. قلت في نفسي ان الأناناس في بداية الحمل يسبب الاجهاض قلت يمكن يسهل الولادة ..

وقرأت سورة مريم ..

بس هذا الحال ما تغيير ..

طرشت مسج لدكنورتي ( فرح زينل ) وقالت لي اشربي دارسين ,, وشربته ..

ولمن صارت الساعة 5 الصبح .. الطلق صار يجيني كل عشر دقايق..

وبسرعة قعدت زوجي من النوم وعلى المستشفى..

وأنا رايحة المستشفى أقول لزوجي إذا الله أخذ أمانته يعني قصدي إذا اني توفيت وأنا أولد.. وصيتي تتزوج بنت صالحة مؤمنة عشان تربي أولادي..

وهو يقول وش هل الكلام؟؟؟

ولمن وصلت المستشفى فحصت الدكتورة قالت 3 سانتي قلت له بس؟؟؟؟؟؟؟؟؟؟!!!!!!!!!!!!!!

الطلق من يومين وتوه 3 سانتي ..

قالت الدكتورة بنتظر نص ساعة لو تم الطلق خفيف بنحط طلق صناعي..

ومرت النص ساعة والطلق مثل ما هو ..

وحطو الطلق الصناعي..

وجا الآلم آآآآآآآآآآآآآآآآآآآخ من الطلق الصناعي..

لو شنو تقولين ما بصارخ ما تقدرين من الألم ..

وقلت للممرضة اتحس نفسي بدفع..

واتصلت الممرضة وجهزوا تفسهم وقالت 9 سانتي يا الله ادفعي ..

تقول امسكي فخدج وادفعي وانا اقول ما اقدر ما اقدر .. وبعدها ممرضات 2 مسكو فخدي اليمين وممرضات 2 مسكو فخدي اليسار ..

والدكتورة تنتظر طلعت الراس..

وأنا اصرخ من قمة راسي .. من الآلم .. شي فضيع .. احس ولادة البنت اصعب من ولادة الولد..

وبعد تسهيل ربي وبركات شهر رمضان ولدت الساعة 10 ونص الصبح تاريخ 7/ 10 /2007 طلعوها لونها بنفسجي انا خفت خوف عليها اقول للدكتورة اشفيها بنتي ,,

تقول ما فيها شي.. بس لمن صاحت تطمنت..

وبعدها ريحت شوي وطلعوا المشيمة وبدأ مشوار الخياط..

ولله الحمد انتهت الولادة بسلام ولله الحمد..


وهذا نص المسج الا طرشته لربعي أبشرهم بولادتي..

وهذا هو تفسه .. الا كتبته على بطاقات الحلاوة..

قد جاءت تشرق بحبها .. أصفى من الماء قلبها ..

هبة من الله قدومها.. باسم الكوثر سميتها..


هذي القصة كاملة يعني الا اذكرها احس نفسي فقدت الذاكرة..