السلام عليكم و رحمه الله و بركاته
مدري شلون ابتدي مشكلتي ...بس الله يخليكم لا تتركوني لحالي
محتاجة مشورتكم ووقفتكم معاي .. والله محتارة حيل
مشكلتي هي ::
اختي مخطوبة من فترة طويلة وخطيبها عنده ظروف تمنعه من الزواج وخطيبها رجال والنعم فيه الكل يمدح فيه ويستاهل انها تنتظره طول العمر .. المشكلة ان امه كانت تلمح للكل ان ودها تخطبني انا لولدها الثاني اللي هو اخو خطيب اختي بس ماصار شي بس تلميحات .. وصار لها سنة وهي تلمح .. وانا واهلي تقريبا حاطين في بالنا انه راح يخطبني وخلاص انا مأملة انه بيكون هو نصيبي . حتى هو لما اقابله صدفة او بعزايمنا العائلية المح بعيونه نظرات حب وحتى خواته دايم ينادوني زوجة فلان ( اسم اخوهم). والمصيبة هم جيراننا يعني بالطلعه والدخلة اشوفه واتعذب لاني صرت خلاص مقتنعه انه خطيبي وافكر فيه واحبه ولا ادري هو يحبني والا بس استلطاف.. لكن هم اهله ماتكلموا بالموضوع رسمي .. ومن اسبوعين تقدم لي رجال الكل يمدح باخلاقه واصله الطيب واهله وشهادته ومركزه الاجتماعي افضل بكثير من اخو خطيب اختي .. وانا بديت افكر بالموضوع بشكل جدي وبعيد عن العواطف وللحين محتارة وش اسوي ..اوافق على اللي تقدم لي او انتظر اخو خطيب اختي اللي مو متأكدة انه بيخطبني او لا ..
اخاف اوافق على اللي تقدم لي والثاني يبيني بس ظروفه ماتسمح له يخطب حاليا .. واخاف ارفض اللي تقدم لي والثاني مايخطبني واصير انتظر سراب
الله يخليكم شوروا علي ولا تتركوني
والله يوفقكم دنيا وآخرة ويرزقكم بعيال الحلال والذرية الصالحة