مشكلتي من البداية وانتوا احكموا ؟؟؟

انا مشكلتي بكتبها كامله لاني مب عارفه المشكله مني انا ولا من عمتي( ام زوجي )

ببتدي من 4 سنوات قبل الزواج .. انا وزوجي خذنا بعض عن حب استمر 4 سنوات وعقبها طرش اهله يخطبوني (طلعوا اهلي واهله معارف(مب اهل))

المهم ..... كل شي صار على خير وسوينا حفلة الملجه .. وعقبها بشهر صار تج بينا لان امه كانت مصره انها تراوي عمي (ابو زوجي) البوم الملجه وصور اهلي فيه وهم متحجبات .. قلتلها اوكي بعطيكم الالبوم لكن في ذمتكم ..عصبت وقالت خلاص ما نبا ..

صار العرس الحمدلله ..

وعقبها بشهر حملت .. تخيلوا من بدايت حملي وهم ينغزوني يبون بنوته (لانه زوجي ما عنده خوات هم 3 اولاد وزوجي البجر) والنغزات كانت تجرح وتقطع قلبي كنت ما ارقد بالايام وانا حامل من كلامهم .. قبل الولاده بشهرين عمتي حصلت بنت تربيها (امها وابوها موجودين بس ما يبونها ..زواج عرفي..) المهم تضايقت بس قلت مالي ومالهم كيفهم .

ياني الطلق ورحت المستشفى تميت قبل الولاده 4 ساعات تخيلوا لا ياتني ولا اتصلت فيه .. ولدت بالسلامه ويبت ولد .. ثاني يوم العصر عمتي ( ام زوجي) شرفت باركتلي وما صارت 5 دقايق الا وطلعت .. قلت ما عليه لا عمي( ابو زوجي) ولا اي احد من اهله زارني .. قلت ماعليه مب مهم ..

تميت بيت اهلي 50 يوم عمتي ولا فكرت اتي اتزورني ويوم سالت زوجي قالي مشغوله ويا البنت .. تخيلوا فالا40 اشيل ولدي واوديه عشان اهل زوجي يشوفونه .. بدل لا هم ايوون عندي ..

رجعت البيت وعقب اسبوع ياني زوجي قالي رضعي البنت عشان تكون محرم لناا كلنا رفضت الموضوع من عقب ما سالت مشايخ

هل هي تعتبر يتيمه ولالا..؟؟

وطلبت نصيحتهم ارضعها ولالا ..؟؟

قالولي اهلها موجودين ما تعتبر يتيمه وننصج ما ترضعينها الا اذا انتي تبن ....

طبعا زوجي زعل مني واهله زعلوا .. بس طنشت لاني فكرت اذا رضعتها باجر امها اتي تاخذها وانا قلبي يتقطع صارت بنتي وبعيده عني ..

مرت الايام وكبروا الصغاريه وعمتي وعمي يعاملون ولدي كانه غريب وحاطين البنت فوق راسهم .. لدرجه ان يوم يتضاربون على شي يعصبون على ولدي وياخذون الي في يديه ويعطونها .. ويدلعونها دلع مش طبيعي كانه البنت من لحمهم ودمهم .. صبرت وقلت ما عليه ولدي صغير وما يفهم شو قاعدين يسون فيه .. وانا قلبي يتقطع

حملت مرة ثانيه .. طول فترة الحمل عمتي تقولي انتي ما بتيبين بنت لانه عمج (ابو ريلي) ما ياب بنات وريلي مثل ابوه .. كنت اسكت ما اقول شي .. اليما وصلت الشهر الرابع وبشرتني الدكتورة اني حامل ببنت وقلتلها تخيلوا طول فترة حملي تقولي انتي متاكده انج حامل ببنت .. ويوم كنت اتشرا اراويها تعيد عليه السؤال .. ؟؟

ويبت بنوته الحمدلله .. وزارتني عمتي نفس اليوم يلست نص ساعه وطلعت وعقبها ما شفت ويها اليما خلصت ال40 ورجعت البيت ...

طبعا المشكله مب هني المشكله ان عمتي وعمي الحين يفضلون البنت على عيال ولدهم كيف ..؟؟

اذا ولدي والبنت سوو اي شي غلط يعصبون عليه ويكلمون البنت بحب .. يعني يوم يكلمون ولدي يقولوله ((ايلس يالله عن الشطانه ولا بتنظرب)) .. ويوم يكلمون البنت (( حبيبتي لا ما يسون جي عيب انتي شاطرة))

ويوم يتضاربون على لعبه يعصبون عليه ويعطونها حتى لو اللعبه مب لعبتها ..

واذا البنت سوت شي غلط اقولها عيب ما يسوون جي بكل هدوء اكلمها تخيلوا عمتي شو تسوي في هاي اللحظه تقولها تعالي حبيبتي وتحضنها وتقولها هاي شيطانه ما نحبها ... صايرة البنيه تستقوى حتى على الكبار ومعودتنها الي تباه تحصله واذا ما عطتها اتم تصرخ وتصيح وهالشي يضايقها فتسويلها الي تباه حتى لو هالشي غلط

تخيلوا اسيرون هي وعمي يشترون حق البنت العاب واغراض ولا مرة يابوا لعبه ولا ملابس حق عيالي الي هم احفادهم مع اني كل ما طلعت وشريت حق عيالي اخذ حق البنت ..

يا جماعه يخافون عليها من قرصت السمسومه .. الابو ما يرقد عشان يتابع البنت وياكلها ويشربها وكل شي يسويلها يتخبل عليها ... بدايت زواجنا يوم ما كانت موجوده البنت عمي يا دوب نشوفه .. اما الحين تخيلوا الود وده ما يطلع من البيت عشان ييلس ويا البنت ..

صارت وايد مشاكل عشان تصرفاتهم ويا ولدي كانهم يلوموني لاني يبته ..وانا صابره واسكت ويوم احن على زوجي يبني بيت خاص لنا يعصبون عليه يقولولي البيت مسؤوليه وانتوا مب قدها ....

وكذا مرة امه قالتلي بيتنا مب فندق تطلعين من الصبح واتين وقت النوم ..

ومرة ولدي والبنت يلعبون وقرب ولدي منها عمتي عصبت عليه من دون سبب قلت حق ولدي تعال يا امي تعال عمتي عصبت عليه قالتلي بيضربها ..بعد مشاده بيني وبينا شليت عيالي ودخلت الغرفه قالتلي سيروا طلعوا من البيت سيروا بيت اهلج ولا ابنولكم برع (ملحق ) واسكنوا فيه حز في خاطري كلامها ..

شوروا عليه شو اسوي ...