عنوان الأمل تحكي قصة ولادتها بحمودي

سلام حار الى جميع أخواتي وخصوصا خواتي في البحرين

طبعا رجعت لكم مثل ما وعدتكم اني انفل لكم قصة ولادتي ومعاناتي في الأيام الأخيرة

انا كان موعد ولادتي أولا 19/9 وطاف الموعد وخليت املي على تاريخ 21 /9 على حسب الأتراسوند عند فوزية كمال
وطبعا بعد طاف الوعد واستبعدت الموعد الي كان على حسب الدورة الشهرية وكان 25/9 والسبب ان الدكتورة قالت لي ان البيبي كبير وما بتكملينن شهرج صج ما يعلم الا ربي بوعد خروج هالطفل بس احنا مستعجلين واااااااااااجد

المهم تاريخ 22/9 الصبح الساعة 9 ونصف قعدت من النوم الا اشوف كمية بسيطة من الماي نزل علي طبعا انا استانست
حدي قلت خلاص اكيد ولادة والغريبة ان ماكان فيني الم قلت بصبر لظهر وكملت اليوم وانا حزينة لان الماي ما عاد ينزل ولا فيني ذرة من ألم وجاء يوم ثاني وبعد نفس الشيء قام ينزل مني ماي بس بعد كمية بسيطة ولكم على فترات عاد ان خفت قلت يمكن هذا ماي البيبي وقلت ومباشرة بعد الفطور رحت لمنى الشرقي عاد سمعوا شنو قالت لي يوم قلت لها ان موعدي قريب ونزل علي ماي بس ما ادري شنو هذا الماي وان هذا الماي من امس ومباشرة قامت وقالت خليني افحصج ويوم فحصتني قالت ان الماي ماي البيبي ولازم تروحين الطوارىء عاد انا خفت ومباشرة رحت هناك وكان الساعة 8 ليلا طبعا اتصلت لأمي وخبرتها اني يمكن تأخر عشان ما تحاتيني لاني كنت اموديه بنتي عندها وكان عندي امل كبير اني خلاص اني بترقد وبولد الليلة او بكرة بالكثير وكنت بصراحة مستانسة ......................

لكن الفاجعة يوم وصلنا الطوارىء واخذت الكتورة التقرير الي كتبته لي د. منى الشرقي مباشرة سوو لي تخطيط والحمد لله طلع زين عاد يوم شيكو الماي طلع هذا ماي عادي مو ماي البيبي وتم فحصي وما كنت منفتحة ولا سانتي
عاد انا انحبطت وكنت اقول في نفسي صدق دكاترة ما يفهمون شيء يازعم رايحة علشان ارتاح طلعت بهم كبير
المهم في الطوارىء يوم سوو لي اتراسوند هنيه الفاجعة قالت لي ان البيبي كبير وما نقدر انخليش اكثر هذه خطر عليش لان كل ما طالت المدة يكبر وبعدين صعب يكون عليش الولادة عاد هنيه جاء الجد وبدأت اخاف يعني شنو بتولدوني غصب او قيصري افكار وافكار كانت في بالي عاد يوم خلصت من كلامها قالت لي بكرة ضروري الصبح تجين الفاتح عشان يقررون لج متى الطلق الصناعي او قيصري بصراحة دقات قلبي زادت وغير الخوف انا جاية وكلي امل اني اكيد بولد اليوم او بكرة طلعت من عندها وانا حزينه وكأن أحد متوفي من عندي الدموع سيلان على خدي حتى زوجي خاف علي واااااجد ..........
طلعت من المستشفى وصلت البيت ويوم شافني الوالد قال لي توكلي على الله وان شاء الله بكرة تكونين والدة بالسلامة وقعدت تقريبا لساعة 11 في الليل في بيت الوالد ومباشرة بعدين رحت الشقة ومباشرة اتصل زوجي لشيخ يستخيره لذهابي بكرة للفاتح وطلعت الخيرة زينه وعشان يطمئن أكثر اتصل لشيخ ثاني وطلعت الخيرة ممتازة وقلت خلاص اذا استخرت ربي وطلعت ممتازة عزمت اني اروح وقبل ما انام قمت وصليت ركعتين لأم البنين وكانت عيني تدمع وانا اتوسل لربي اني اولد بالسلامة في اقرب وقت ونمت وياليت نمت ذيك الليلة غطت عيني الساعة 3 الا ربع وصحيت الساعة 7 الا ربع وديت بنتي لامي عشان الروضة واخذني زوجي للفاتح وانا في الطريق حسيت بألم بس كنت اتناساه واقول في نفسي هذه نفس الألم الا يجي ويروح مثل ما نقول الم استقبال
ورحت المستشفى والام عندي يزيد اشوي وانا متيقنه انها الم استقبال ودخلت على الكتورة وشافت التقرير وقالت لي بكرة موعدج صح قلت لها ايه واتمنى اني اولد قبل ما تسووني طلق صناعي او عملية قيصرية عاد ذيك اللحظة شافتني اتألم قالت لي شكلج تتألمين قلت لها ايه نفس الألم الي يجيني من اسبوع مثل ما يقولون الم استقبال
عاد الدكتورة قالت لي ويمكن الم ولادة وانتين ما تدرين عاد انا ضحكت وقلت لها ما بيجيني الطلق الا اليوم يوم الي جيت عندكم عاد الدكتورة قالت لي رقدي على السرير خليني افحصج ونتأكد عاد اهنيه المفاجئة يوم فحصتني طلعت مفتوحة 2سم ما صدقت لدرجة اني بكيت من الفرحة وبصراحة كانت الدكتورة عسل حتى هيه استانست لي وقالت لي ما بخليهم يرقدونج روحي البيت وفطري ومشي لج ساعة وما بيجي الليلة او بالكثير بكرة الا انتي والدة بالسلامه وطلعت وانا مستانسة حدي ومباشرة اتصلت لزوجي وخبرته وجى لي بسرعة وصلت البيت عاد ذيك اللحظة الكل درى من الأهل ان ام زهراء بتولد قريب ورحت البيت وفطرت وذبحت روحي بالرطب والتمر وكان الألم ما يتعدى ثواني ويرد يروح الم واستمريت على هذه الم من الساعة 8 الصبح حتى الساعة 10 ونص
وكنت حدي متضايقة واقول لأمي هذه مو ولادة من متى هذه الم موراضي يزيد بس الي مريحني اني شفت الدم وقلت خلاص ولادة بس ليش الم مو راضي يزيد خصوصا اني مو بكر يعني المفروض ان عنق الرحم ينفتح سريع عندي لكن ما جت الساعه 11 ونص الا الم يتضاعف لدرجة اني مو قادرة امشي حتى النفس عندي ضعيف ورحت المستشفى الساعة 12 ومباشرة كشفت علي الا تقول مفتوحة 3سم عاد انا اكتأبت اقول كل هذا الم على 1سم وما مرت ساعة واحدة الا تقول مقتوحه 5سم ومباشرة نقلوني غرفة الولادة وكان الم قاتل يذبحني غير ان تنفسي ضعيف وحطوا لي النفاسة علي وبصراحة كنت اتقطع من الم وغير هذا اسمع صوت امي تبي تشوفني والممرضات مانعينها وانا اصيح من الم ولما دخلت امي وشافتني اصيح بكت وما قدرت تشوفني بهذا الوضع وطلعوها وهيه اتصيح علي عاد يوم شافتني الدكتورة اتالم ومو مستحمله عطتني ابرة عشان انفتح سريع
عاد هنيه استخفيت من الم وقلت لها اشسويتنين فيني بموت من الم وكنت اتذكر اني اجود طرف السرير بقوة بيدي ثنتينهم من قوة الم عندها قامت وعطتني ابرة ثانية غشان يخفف الم واتخدر وانام وكشفت بعد ثواني علي وقالت لي مفتوحة 6سم عاد انا دعيت ربي واقول اذا الحين ماني قادرة اتحمل الألم اشلون بتحمل بعدين وباقي علي 4 سم بعد وبعدين رحت في نومه وما صحيت الا على الممرضة تقعدني وتقول لي دفعي عاد انا انهبلت قلت لها ادفع شنو قالت البيبي جاي يالله احين ادفع انت ما صدقت الكلام وكنت في ذاك الوقت خلاص طاقة ما عندي بس كطلامها شجعني قلت خلاص يعني راحت المعاناة وبيطلع الحيني حبيبي وبشوفه ويشوفني ومباشرة دفعت بس للأسف ما قدرت اطول في الدفع عاد هنيه الممرضة قامت تصرخ علي البيبي بيروح اذا ما دفعت اقوى والثانية تقول حرام البيبي بيموت عاد انا هنيه جمعت قواي كلها ودفعت بقوة اه والف اه واخيرا طلع حبيبي ونور عيني ( حمودي ) ولما شفته سبحان الله الخالق الناطق شبه زوجي ما خلى شيء الا اخذه والحمد لله طلعت انا والبيبي بالسلامة وبالف صحة وعافية وعقبال كل وحده حامل تولد بالسلامة .
وادري اني طولت عليكم يالله الحين بخليكم بروح لحمودي
مع الف سلام