الحمدلله ولدت + قصة ولادتي

السلام عليكم و رحمة الله و بركاته

الحمدلله رب العالمين ولدت قبل اسبوعين بالضبط و الله رزقني بنوتة
كان موعد ولادتي 3 اكتوبر بس ولدت ب 25 سبتمبر والحمدلله صمت 12 يوم من رمضان

انا من بداية التاسع و راس البيبي نازل حيل و مفتوحة 2 سم و زاد و صار 3 سم والراس كل ماله و ينزل اكثر بس ماكان يايني طلق و لا الم و الدكتورة تقوللي انتي ولادة في اي وقت و لو تدخلين المستشفى ما يطلعونج
بس مثل ما قلت ماكان فيني طلق


المهم بتاريخ 25 سبتمبر بعد صلاة الفجر ياني الم مثل الم الغازات بأسفل البطن و صار يتكرر كل عشر دقايق و زوجي كان يحسبلي
بس انا ماكنت مصدقة ان طلق
دقيت على امي الساعة 6 الصبح و قلتلها ان فيني الم يتكرر كل عشر دقايق قالتلي دقي على دكتورتج الحين يمكن طلق

المهم دقيت عالدكتورة و قالتلي هذا طلق تزهبي و روحي المستشفى
قمت اخت شاور و لبست و انا اضحك اقول هذا مو طلق و المستشفى راح يرجعوني البيت

على الساعة سبع و نص طلعت و رحت المستشفى مع زوجي و خذيت جنطتي و اغراضي
وصلت المستشفى الي فتحت فيه ملف الي اهو مستشفى رويال حياة و رحت قسم الولادة و حطولي جهاز يحسب الطلق و لقو قيني طلق و فحصتني الدكتورة الي عندهم قالت مفتوحة 4_5 سم يعني ولادة



جان المستشفى يدقون على دكتورتي عشان تيي و رحت غرفة الولادة روووعة وايد حلوة و تريح الاعصاب
لبست لبس امستشفى الي مفتوح من ورى والله فشلة

عاد هني امي وصلت و ابوي بعد جان يعطوني المسهل افففف شنو يذبح عوار قمت من المرحاض الا ينزل مني دم لان الرحم قام ينفتح

شوي جان تيي دكتورتي و تفتح ماي البيبي بس ماكان يعور عادي كأنه فحص و حسيت ماي وااااايد و دااااافي ينزل بس كله و انا نايمة عالفراش

طبعا كل هذا و انا طلقي بارد و خفيف
جان يحطونلي الدرب و يقزوني ابرة ترخي العضلات بس احس انها تدوخ لان صرت دايخة بعدين
و بعدين الدكتورة حطتلي طلق صناعي لان طلقي خفيف و قالتلي الدكتورة اذا حسيتي كانه تبين تروحين الحمام هذا يعني الراس يبي يطلع قوليلي

شوي جان احس ان كاني بروح الحمام قلت حق امي جان تنادي الدكتورة جان تفحصني ولا كلش بولد
جان يطلعون شي عشان احط ريولي عليه و حطو ليتات قوية و قالتلي ممرضة بريطانية شلون طريقة الدفع
و قمت ادفع و ادفع جان احس بالبيبي طلع جان يحطونها على صدري بس ماكانت تبجي بجت بعدين جان زوجي يقص الحبل السري

بعدين قامت الدكتورة مادري شتسوي تخيط او شي بس كان الم شديييد جان تخدرني ربع ساعة خيطتني و سوتلي تنظيف للرحم

قمت جان اييبون بنتي و قمت ارضعها شوي
بعدين الممرضة ودتني الحمام و اخذت شاور و لبست و قعدت على كرسي متحرك و عطوني بنتي جان اروح غرفتي الي اهيا جناح اللوتس و سويت فيه استقبال ولادتي


الحمدلله المستشفى كان ممتاز و خدمتهم رووووووعة كاني بفندق 6 نجوم مو مستشفى و الجناح خيالي و كل شي كان فوق الممتاز الحمدلله


بس طبعاً بعد الولادة حسيت جسمي متكسر و يعورني من كل صوب و صارت فيني بواسير تذبح عوار ماقدرت انام اول ليلة مع اني ماخذه ادوية عشان يخف الالم بس الحمدلله الحين وايد احسن