خبز الجباب.. من غير تخمير!! بالصور

مرحبا حبيباتي .. شو الاخبار !!؟؟؟ يايبتلكم اليوم طريقة خبز الجباب وما يحتاي تخمير ... يعني تخلطينه وعلى طول اتسوينه ... وبتخلصين بسرعة ان شاء الله .. على فكرة انا تراني أول مره اسوي خبز جباب .. بس الحمدالله ضبط معاي وكان لذيذ وينفع حق سحور خفيف ..

المقادير:
-بيضتين مع شوية فانيليا
-2 ملعقة كبيرة سكر
-2 ملعقة كبيرة بيكنج باودر
-3 ملعقة كبيرة زيت
-كوب طحين
-نص كوب حليب طازج أو حليب بودره مخلوط مع نص كوب ماي
-نص كوب ماي
-ذرة ملح
-زعفران وهيل مطحون (اذا اتحبون ماي الورد حطوا منه بس انا ما احبه)

الطريقة:
1-أول شي نخفق البيض مع شويه فانيليا
2-بعدين نضيف السكر
3- وبعد انضيف الزيت
4- ونحط عليهم شويه هيل وزعفران زذره ملح
5- ننخل الطحين مع البيكنج باودر ونضيفه على الخليط
6- اخر شي انحط الماي والحليب ونخفق الخليط عدل .. وكل ما خفقنا زياده راح ايزيد عدد الفتحات والفقاقيع في الخبز بعدين..


A-هذا شكل العجين لازم ايكون سائل اخف من عجين الكيك واذا احتاج ماي زيدوا .. المهم يكون سائل.. انا الصراحه الكميه كانت مضبوطه وما احتاييت ازيد شي ..
B-بعدين نيب تيفال ونخليها تسخن .. اذا التيفال الي عندكم يلصق في العجين انصحكم تدهنونه بشوية زيت خفيف.. انا الصراحه ما دهنته لانه الحمدالله ما يلصق.. بعدين نصب مقدار من العجين على التيفال..
C-ولما ينشف السطح وتطلع فيه فقاعات وفتحات مثل الصوره نقلبه على الجهة الثانيه ونخليها تحمر شوي..
D&E- هذا شكل الخبز بعد ما قلبناه .. حطيتلكم مثالين ..
F- وهذا الشكل النهائي للخبز ... بذمتكم ما ايشهي .. والاحلى يوم تاكلونه بجبن كرافت ودبس .. يا ربي لذيذ ..