لحقوا علي....خدامتي!!!

السلام عليكم بنات،،،
أنا من المتابعات لهذا المنتدى و تعجبني ردرودكن للأخوات اللي يطلبن مشورتكن و هذا الشي شجعني إني أطرح مشكلتي...
أنا أم موظفة و عندي بنت عمرها الحين 11 شهر (الله يحفظها يارب) و كنت لما أداوم أخلي بنتي مع الوالدة (الله يطول في عمرها) بس ما شاء الله بيت أهلي كبير و إخواني ما شاء الله كلهم شباب و طلباتهم كثيرة صح عندهم شغالة وحدة بس ما ملحقة على شغل البيت و الطلبات و غير إن أخوي الكبير المتزوج ساكن معهم بالبيت وعنده طفل و زوجته تشتغل مشرفة بسكن الطالبات و تبات بالسكن أربعة أيام بالإسبوع أحيانا و أحيانا أكثر وولدها يكون بعد مع أمي، فهنا أنا فكرت في أمي و جبت خدامة (إندونيسية) مع إني ما محتاجة بس قلت علشان تراعي بنتي وتتفرغ أمي لولد أخوي،، فصرت أخلي الخدامة و البنت عند أمي لما أروح الدوام،،،
الحين أكيد تقولوا إيش المشكلة؟؟!!
المشكلة أن أول ما جات الخدامة و أنا أعاملها معاملة زينة يعني ما متساهلة واجد معها بس التعامل معها بطيبة إذا غلطت ما أصرخ عليها لأن طبيعتي ماأحب أصرخ على أي أحد بس لما تغلط أنبهها للغلط عشان ما يتكرر ولما تريد أي شي أوفرلها إياه عشان بنتي،،
إكتشفت إنها جايبتلها تلفون من وراي عن طريق شغالة أمي،، كلمتها ليش سويتي كذا قالت (أنا أعرف إنك ماراح ترضي يكون عندي تلفون وأنا ما أستخدم التلفون إلا لما أكلم زوجي.) قلتلها هل أنا منعتك من إنك تكلميه قالت (لا بس أحيانا هو يتصل بالليل متأخر وأنا ما لأريد أزعجك.).
على العموم أنا أخذت من عندها التلفون و قلتلها بيكون عندي ولما تريدي تتصلي بأهلك بعطيك إياه وافقت.. اليوم الثاني حصلت إن بطاقة التلفون ملغية ما تشتغل رحتلها سألتها قالت إنه ما هي إللي لغتها أكيد شغالة أمي. وبعدين قالت لي مدام أنا ما يريد تلفون خلاص إنتي بيعيه ورسلي الفلوس لأهلي..

ومن كم يوم جاتني إختي الصغيرة تقول إن الخدامة (خدامتي) تصيح لأن هي ماعندها تلفون بينما شغالة أمي عندها تلفون
زميلاتي بالدوام قالولي عطيها التلفون ولا تزعليها أنتي ما تعرفي إيش ممكن تسوي ببنتك... هنا أنا الصراحة خفت و صرت أوسوس وصرت ماأقدر أنام بالليل وكل ما شفت بنتي تجيني صيحة إنه ممكن تسويبها شي لا سمح الله وبنتي ما تعرف تشتكي لأنها بعدها صغيرة

فأتمنى إنكم تشوروا علي كيف أتصرف هل أعطيها التلفون و هل هناك طريقةأعرف إذا كانت تأذي بنتي أو لا؟؟؟