بنتي مب طايعه اتسمعني القرآن.. تعبت معاها انصحوني بارك الله فيكم..

أ

أوراق الخريف

مشرفة سابقة

20-09-2007 | 03:53 PM

السلام عليكم ورحمة الله وبركاته

خواتي.. أتمنى اني اقدر القى الحل لمشكلتي..
انا الحينه في أواخر شهر الثالث من الحمل طبعا وانتو تعرفون مصاحبات الحمل من التعب والارهاق..
واضطريت اني اكنسل اجازتي السنويه بالشغل بسبب امر طارئ وهذا بعد شاغل بالي لاني ما تهنيت باجازتي..
وفوق هذا صايمه والحمدلله..

والمشكله بنتي الله يهديها.. تنرفزني وبعد ماسكه اعصابي عليها..
كملت ما شاء الله 3 سنين وشهر تقريبا.. ووايد صايره دلاااااااااااااااااااااااااااعه..
دخلتها KG1 ما شاء الله عليها في اول الايام في الاسبوع تحب المدرسه وكانت نشيطه..
ولما دخلنا في نصف الاسبوع البنت لاعة جبدها من المدرسه وهذا تونا داشين العام الدراسي اليديد..
الله يعين شو بتسوي بعدين.............!؟
ما شاء الله عليها ذكيه حيـــــــــــــــل.. يعني تبارك الرحمن ماخذه ذكاء ابوها وامها.. وكله اقولها البنت بتطلع علينا تحب المدرسه والدراسه وايد.. الا اشوفها من الحين العكس صحيح......!؟

وكله تكذب فلانه ضربتني وفلانه ضربتني.. وتيب اعذار كل عذر اقبح عن الثاني علشان بس ما تروح المدرسه..
وانا في البدايه كنت اصدقها وعقبها كذا مره سالتها عن اسماء البنات الي يمدون يدها عليها في كل مره تخترعلي اسم..واليوم حضرت جنابها مخترعه اسم عروسه اونه بنت اسمها عروسه طقتها..!؟

وفوق هذا كان عدها تسميع قبل يومين.. سورة القارعه.. البنت حضرتها حافظه اول سطر ومب طايعه تسمع وتحفظ الباقي.. وتبهدلت وانا احاول احفظها وهي اول ما تقوليلها سمعي القرآن.. تتعب نفسيا وتيب اعذااااااااار مثال: مره ريولي يحكني ومره اذني فيه شي.. ولااااااااءا اكتشفت انها تجذب.. هي تكره شي اسمه( يالله نامي) يايتلي اوه فيني نومه.. شفتو كيف.........؟!:sm215:

خبروني الله يخليكم شو اسوي..

الصبح ابوها قالي ابغي اسمعها حافظه وابوها من النوع يسكت وان تكلم ياويلها.. حاولت اسمعها وهي مب طايعه وانا احاول ابوها كان يعني نص نايم ونصه معانا يسمعنا.. والله انه عصب وعلى طول طلعني من الغرفه واستلمها بالضرب...!؟ :angry:وانا اناديه برع الباب بس وقف خلاص..والبنت قطعت قلبي يالسه تصرخ والله..

وتميت واقفه عند الباب اسمعها والله يالسه تسمع لابوها وهي تبكي.. انصدمت انها حافظه وبس جذيه ما تبغي اتسمع..!؟

وبعدها بطل الباب قالي كله منكم مدلعينها هو يقصد ان امي الله يهديها خربت البنت والله.. كله الي تباه اتسويه وغصبن عن الكل ولسانها طويل.. بس انا ما سكت قتله مش بس امي حتى انته.. كلما قالت بابا حلاوه خذتها المحطه ومزرت كيسها حلويات..؟!

والمشكله وانا احاول احفظها اقولها بشتريلج حلاوه وبوديج الالعاب هالشيئين تحبهم وهي تهز راسها وتاشرلي زين زين.. :21_211:وشوي وبتنام من الملل..

خبروني الله يخليكم شو اسوي.. انا ما ابغي عادة الضرب تبدء وابوها عقب ما ضربها تكرمون راح الحمام يصيح لان يموت في بنته.. انا الي شوي جافه معاها قمت اصيح من الضيق..
قالي مسكي بنتج وحفظيها.. ترا باجر الجمعه الظهر ان ما سمعتني بعد ياويلها انا مضطر اني اتبع هالطريقه لان البنت صايره والله لا مبالاه.. صعب ان نتحكم فيها.. ما يهمها ولا شي..

اليوم العصر حاولت معاها اسمعها والله 5-10 دقايق وانا انتظرها تسمعني وهي ماسكه ريولها ولا كاني يالسه جدامها انتظر حضرتها يالسه تلعب..!؟ عصبت عليها يبتها الغرفه وقتلها تمي هني بروحج عقاب.. الا البنت نامت..!؟:21_186:

خبروني هل هالشي طبيعي ولا لا..؟! بنجــــــــــــــــــــــــن..
الحقو عليي خلاص بنجن..

وانتظر حلكم.. الله يخليكم.. بدعيلكم من كل قلبي..

طولت عليكم والله من الضيقه الي فيني..:cry:

!

! أنــثــى !

عروس ماسية

20-09-2007 | 04:23 PM

:z_clap: اولا عفيه عليكم انكم انتبهتو للبنت قبل لا تسيطر عليكم مثل غيرها .. تصير كأنها هي راعية البيت بالتحكم

و الدلع !! ..

ثاني شي انا توني ام صغيره بس يمكن اقدر افيدك بشغلة .. احنا الكبار نمل من الدراسة بسرعة لانها متعبة طبعا

تعرفين قعدة من الصبح و ركوب سيارة و نزلة منها و فوضى و بعد دراسة بالبيت ما بال البنت للي عندك !!

الدراسة شي جديد عليها و أكيد ماراح تتأقلم سريع وبتتصرف تصرفات يمكن يكون قصدها انها ما تبي تروح للدراسة

و ترى هذي انا اشوفها ردة فعل طبيعية .

انتو الحين اللي عليكم تقعدو معاها جلسة خاصة حتى تحببونها في الدراسة و بمغريات الهدايا بعد النجاح اكيد راح

تتغير .. و بعيد عن الضرب حتى ما تخربون حالتها المزاجية اكثر ..

اكيد المجربات راح يفيدونك .. و الله يوفقكم و ييسر لكم و يقومك بالسلامة ..

م

مرموم

نائبة المشرفة العامة

20-09-2007 | 10:04 PM

السلام عليكم و رحمة الله و بركاته

أقول لك الصراحة أم سعيدة...

3 سنين صغيييييييييييرة على هالطريقة...

و بعدين كيف في المدرسة يعطوهم السورة...و ياللا روحوا إحفظوا !!!!!!

هذول أطفال حضانة لسه

الحفظ يكون بالتكرااااار فقط.....مش بالضرب

يعني ظلي شغلي لها السورة على الكاسيت أو ردديها لها...بتلاقيها حفظتها في نص ساعة بس

لكن إنكم تضربوها...ياللا إحفظي !!!! ما يصير أختي...حتى أسلوب المدرسة غلط بصراحة

الحين هي التعليم بالنسبة لها مفروض متعة و فسحة...مش واجبات و حفظ و ضرب !

بهالطريقة أم سعيدة بتكره العلم و التعليم كله من أولها...

أشوف المدارس هنا كلها وسائل تعليمية و يكرروا لهم النشد أو السورة القرآنية...و الطفل ما شاء الله يلقط و يحفظها...مش يروح البيت و يقعد على المكتب يحفظ ! و هو لسه 3 سنيييين !!!! ما يصير..طفل هذا يلعب و يستكشف لسه...

و الله يهديها لكم...لأن الطفل ما ييجي بالعند أبدا...و فعلا يتملّل بسرعة...

أ

أسماء زكي الدين

مشرفة سابقة

22-09-2007 | 12:18 PM

يا إلهي يا رب

قلبي كاد يتوقف وأنا أقرأ مواجهتكم للبنت

يا ألله تخيلوا كيف كان شعورها!!

أكيد اترعبت مسكينة

انتبهوا اختي طريقتكم توؤدي لعدة أشياء لا قدر الله

* أكيد ستكره العلم والتعلم ..

* وبلا شك ستكره حفظ القرآن الكريم ..

* وسيتراجع مستوى ذكاءها جدا

عليكم بالتوقف حالا عن تلك الطريقة وعن تلديلها معا ...

أظن البنت تمللت ورفضت التسميع لك لأنك بدأت معها بعد وجبة الغداء ...

هذا ما استلخصته لأنك ذكرت أن زوجك كان نائم ...

فأكيد البنت كانت متعبة ومتمللة طول النهار حفظ وتسميع في الحضانة وتيجوا بعدها تبو تسمعوا لها !!

اعطوها وقت تريح فيه بعد الغداء وقت العصر .. ممكن تتمدد معك في السرير بدون ما تناموا إذا كنتوا لا تحبون نومة العصر ... وتحدثي معها عن يومها في الحضانة وأسأليها عن مادة مادة .. ماذا أخذت فيها وماذا فعلت ومع من لعبت وحاولي تحفظي أسماء زملاءها في الصف وأساليها مع من تلعبين وماذا تلعبون وهكذا ولما توصل للقرآن أطلبي منها تسمعك السورة .. كأقتراح وليس دراسة ... وقولي لها: تعرفي حتى أنا حافظة هذه السورة لكن مو متأكدة من حفظها .. سمعيها لي؟ أكيد بترحب تكون معلمتك ... وسمعيها أنت مرة وهي مرة أو أطلبي منها تحفظها لك ... يعني هي تقول الأية وأنت ترددي بعدها ولما تخطيء في آية قولي لها دعيني أكررها حتى لا أنساها ... وكرريها ..

تكرارك للآية سيرسخ في عقلها هي .. وسيكون مرتاح وهاديء ليستقبل منك ...

تعليم الأطفال اليوم ليس كما كنا نتعلم المدرس يردد ونحخن وراءه واللي يغلط يغلط ... أو يحفظ غلط وينقش الخطأ في عقله !!

يا ريت تراجعي موضوعي كيف نحفظ أبناءنا القرآن ... ذكرت فيه العديد مما لن أستطيع ذكره الآن ...

شيء آخر ضرور ي تنتبهي له أختي .. لا تغريها بالأشياء لتسمع أو تقوم بعمل واجباتها ... البنت ذكية وتعرف كيف تأخذ منك أكثر مما تعرضين لها ... وبعد فترة ستجدي نفسك محطمة الأعصاب ... لا قدر الله .. ولا تنسي أن الحمل سيتقدم بعد فترة وستجدي نفسك أكثر ثقلا وأقل صبرا فخذيها عادة ...

عملتي واجبك سنخرج ولا تم إلغاء الخروج ... لكن لا تقولي لها أعملي الواجب علشان أطلعك ... أو علشان أجيب لك حلاوة ...

تعرفي أفضل طريقة وجدتها ترك الأطفال للمعلمات والمدرسة فقط لما يكون الطفل مستعد أسأل وليس بطرية التعليم والتسميع لأ تسلية وأظن هذا هو منهج حضانتها وأن البنت جدا مستمتعة هناك بدليل إنها حافظة

ممكن تشتري لها مصحف المعلم في مصحف لأحد القراء لا أذكر اسمه خطييييييييييير فعلا فيه القارئي بصوته وصوته معدل كأنه طفل يقرأ ... وفيه عدة خيارات لتكرار الآيات والآية والواحدة ... سأقوم بعمل بحث عنه في المواقع التي أرتادها وأحضر لك رابطه ... سيفيدك ويخفف الضغط عنكم وعنها ...

&

ღ رآقيهـ ღ‏

مشرفة سابقة

22-09-2007 | 04:20 PM

السلام عليكم ورحمة الله وبركاته

الله يهديك ام سعيدة حشى مب سورة تحفظونها هذي بنت 3 سنوات وجذي تسوون فيها حرام عليكم صراحة

احنا نكرر الدرس للطلبة 10 حصص عشان يستوعبونه وهم بالصف الاول يعني عمرهم 6 او 7 سنوات مره الدرس عبارة عن لعبة ومره مسابقة ومره بالبطاقات ومره بالاستماع يعني بها العمر يحتاجوا للتنوعي والتكرار مثل ما قالتلك مرموم

شلون عاد بنتك 3 سنوات الاب يحبسها ويضربها حرام صراحة بتكرهونها بالدراسة جذي

حبيبتي اشتري كتب علم نفس تربوي للاطفال متوفرة وفيها طرق حلوة عشان تعرفي كيف توصلي المعلومات بطريقة حلوة لاولادك

واالله يعينك على تربيتهم تربية صالحة ان شاء الله ويكونوا من افضل ما يكون :)

أ

أوراق الخريف

مشرفة سابقة

22-09-2007 | 10:22 PM

السلام عليكم ورحمة الله وبركاته

اولا حبيت اشكر كل من رد على موضوعي بالفعل اتقنت وكنت حاسه ان اسلوبي واسلوب زوجي غلط 1000% وربما هي اول طفله لنا فنحن نجرب كل الطرق الصارمه طمعا للحصول على الطفله الخارقه.. واحس ان المسافه بيني وبين ابنتي اصبحت بعيده بحيث احس اني ظللمتها كثيرا..

أختي !أنثى!
مشكوره حبيبتي على الرد الطيب وممكن من ردود الاخوات الكريمات باذن الله تستفيدي وتطبقيه على ابنك وان شاء الله يكون من الذريه الصالحه يا رب..

أختي مرموم
صدقيني الى الان قلبي يتقطع لها.. وتركتها في حال سبيلها.. صدقيني ليس لدي خبره بهذه الامور.. المشكله هي اول طفل ونحن نجرب فيها كل شي.. يعني بعد فتره نعرف شو الصح وشو الغلط.. وكلامج صحيح هي في روضه اولى كيف نضغط عليها.....؟! احرجتيني بهالكلام وكلامك صح..
اشكرج حبيبتي على الرد وربي يجزيج الخير ويحفظلج عيالج ويجعلهم من الذريه الصالحه باذنه..

أختي أسماء زكي الدين
كلامك لفت انتباهي كثيرا وكم بقى قلبي يبكي لقرأت كلماتك التي هي بالفعل صحيحه 100% والتي ادركتها الان.. وكما ذكرت في الرد اني حصلت على بنت ما شاء الله تبارك الرحمن ذكيه ولكن طمعت للمزيد اردتها ان تكون اذكى الحفيدات بنسبه لجدها وجداتها.. فكرة فقط في لحظه اني اريد الكل يؤشر باصبعه السبابه هذه هي سعيده بنت فلانه ما شاء الله ذكيه وشاطره ولم يصل احد بهذه الشطراه قبلا في العائله كلها.. اعوذ بالله من الشيطان لحظة ضعف تحكم فيني وفي زوجي.. وثقي بي هذه آخر مره افعل فيها هذا.. لن ارغمها على اي شي لا تريده وسوف انظم وقتها واتبع تعليماتك اخيتي وبارك الله فيكي ويحقق الي في بالك والي فيه الخير لك..

malaakأختي
مشكوره حبيبتي على الرد.. وثقي هذي آخر مره اخلي ابوها يمد يده عليها.. وبخليها على راحتها.. المشكله مثل ما كتبت وبرد اكتب هذي اول طفله وعن نفسي مااعرف كيف اتصرف اخت زوجي قالت لي المدرسه تشتكي ان سعيده مش حافظه الاية وزوجي يحاول يحفظها وعصب لانها في كل مره يقوليها سمعي البنت تتعب ما تبغي اتسمع وهي حافظه هذا الي خلاه يعصب.. استغفر الله العظيم ان شاء الله ما يتكرر هالشي..
وتسلمين حبيبتي على الرد اثلجتي صدري والله.. وربي يحقق الي في بالج والي فيه الخير..
وشكـــــــــــــرا..

ع

عروس كتكوته

عروس مشرقة

22-09-2007 | 11:27 PM

ام سعيده وحمدان

حرااام بنتج وايد صغيره المفروض يبدون وياهم بالاشيا السهله والسور القصيره والاحاديث

ا

ام علي33333

عروس مشرقة

23-09-2007 | 12:12 AM

الله يخلي لج سعيده واخوانها وابوها قولي امين
وتقومين بالسلامه
والحمدلله الخوات ماقصروا وانا بعد استفدت منهم والله
وبشرينا عنها فديتها شو مسويه الحين:)

ن

نورة المزيونة

عروس برونزية

23-09-2007 | 12:39 AM

آنه اشتغل تطوعي في مركز تحفيظ قرآن واحنا نقبل الاطفال من 4 سنوات وتكون طريقة تحفيظ القرآن بالترديد او الحفظ الجماعي او سماع المسجل و 3 سنوات صغيره بس حاولو انكم ماتضغطوا عليها ومثل ماقالو الخوات الي قبلي.

h

humsat.77

عروس جديدة

23-09-2007 | 09:06 AM

هلا اختي
موضوعوش عور قلبي ودمعت عيني بصراحة لأن بنتك بعمر بنتي بس للحين انا ما وديتها الروضة قلت بخليها بعدهي صغيرة واشوف بنتي ما شاء الله عليها تحفظ بالتكرار خاصا الأناشيد اللي تعرض مثل ما قالوا الأخوات التكرار هو اللي يعلم الشطار ، خفوا على البنت اشوي لا تخلونها تكره الدراسة من الحين ترى المشوار جدامها طويل والله يخليها ليكم واتشوفونها عروس
والسموحة

&

ღ رآقيهـ ღ‏

مشرفة سابقة

23-09-2007 | 12:19 PM

هيه حبيبتي المصيبة اول طفل ينظلم الواحد يجرب فيه كل شي عكس الاطفال الي بعده :)

والامهات العاملات ما يتوفر لهم الوقت الطويل عشان يتفرغوا لتعليم عيالهم مثل الامهات الي بالبيت

الله يعينا و الله مو شوي

م

مناهل78

مشرفة سابقة

23-09-2007 | 02:20 PM

أختى الله يعينك عليها كل العيال جذي،، بس أستغرب كيف بهالعمر يعطونهم يحفظون سور طويلة، ماقول مايقدرون يحفظون، بس تدريس الروضة مثلا يختلف عن تدريس معاهد تحفيظ القرآن..
هدوا بالكم معاها ولا تاخذوها بالشد، وماشاء الله الأخوات ماقصروا معاك أختنا أمساء وملاك فادوج بخبرتهم..

أنا ولدي بعد معذبني ماعطينه حرف الألف، وأنا قاعدة أعمله بكتاب الحروف اللي عندي بالبيت،، أنا أحاول معاه، وهو يفتح لي كتاب سبايدرمان ويشرح لي عن سبايدر والبناية اللي تعلق فيها،، شكله من البداية بعد بيتعبني معاه...

أ

أسماء زكي الدين

مشرفة سابقة

24-09-2007 | 12:22 AM

حبيبتي أم سعيدة أنا سعدية جدا بردك أختي

والحمد لله الذي جعلنا عونا لبعضنا بعضا

وأهم ما أود أن أطلبه منك ألا تضعي تلك الحادثة دائما لتؤنبي بها نفسك

كلنا وقعنا في أخطاء مع الطفل الأول وكان لنا حقل تجارب

لكن أحيانا لا نجد من يوجهنا الوجهة الصحيحة ويعيننا على أنفسنا

ودائما أختي لا تتمني لأبنتك أن يشار بالأصابع إليها لكن تمني لها الصحة والعافية في الدين والخلق دنيا وآخرة
وقتها ستحبي كل ما يصدر عنها حتى شقاوتها ووقتها فعلا ستلاحظي أن ابنتك مميزة بين الجميع ربنا يسعدكم بها ويسعدها بكم

أ

أسماء زكي الدين

مشرفة سابقة

24-09-2007 | 12:35 AM

رانيا البحرينية;4413270:
أختى الله يعينك عليها كل العيال جذي،، بس أستغرب كيف بهالعمر يعطونهم يحفظون سور طويلة، ماقول مايقدرون يحفظون، بس تدريس الروضة مثلا يختلف عن تدريس معاهد تحفيظ القرآن..
هدوا بالكم معاها ولا تاخذوها بالشد، وماشاء الله الأخوات ماقصروا معاك أختنا أمساء وملاك فادوج بخبرتهم..

أنا ولدي بعد معذبني ماعطينه حرف الألف، وأنا قاعدة أعمله بكتاب الحروف اللي عندي بالبيت،، أنا أحاول معاه، وهو يفتح لي كتاب سبايدرمان ويشرح لي عن سبايدر والبناية اللي تعلق فيها،، شكله من البداية بعد بيتعبني معاه...

:21_131: :21_131: :21_131: :21_131:

بصراحة رانيا الله يعينك

موت ضحك من عبودي .... بيجننك :21_235: تقولي له شرق راح يقول لك غرب

ولا كأنك بتتكلمي معاه نفس اللغة :poster_war:

اعرف أسلوبهم أنا ...

كأنهم آخر جيل كده

أنا ما أذكر معاذ وجهاد غلبوني في الدراسة مثل جمانة (أقصد في ذلك العمر) :21_131:

اليوم قلت أكمل معاها الواجبات أصرت تلون البضة بلون موف قلت ما عليه بيضتها وهي حرة فيها

طيب يا بنتي أكتبي تكتب الباء وما تكتب الثلاث نقاط تحتها

أقول فين النقط ؟!

تقوم تحط لي نقطة واحدة وأسألها فين الباقيين تحط الثانية والثالثة هههههههه أحيانا أكتبها الحرف نصف الصفحة بس بدل ما أفقد عقلي وأعصابي

جينا لحرف الألف (ترى كلامي أقصد به اللغة الأوردية) أقول لها أنطقي الحرف

تقول ما أعرفه يا ماما هذا الحرف ؟

قلت لها أي حرف هذا اللي ما تعرفية (تتحايل عليّ أتحايل عليها) :21_131:

قالت هذا الحرف ... اللي هو ألف مد آآآآآآآآآ

:21_235:

لكن ترى يا رانيا الطريقة الحديثة ما بيعلموا فيها الحروف بالترتيب ... :21_131: العلم تقدم بشكل غريب :21_235:

م

مناهل78

مشرفة سابقة

24-09-2007 | 09:26 AM

صدقتي ياأختى أسماء هالجيل متعب بالهم طاير في أمور اللعب وغيره،، الله يكون بالعون، هالتلفزيون والشخصيات تأثر بعقولهم.... الله يعينا جميعا ويعين أم سعيدة عليها..

!

!بنونه!

عروس فضية

24-09-2007 | 03:54 PM

الله يعينك اخت ام سعيده

والله اليوم هو اول يوم بيعطوا ولدي واجبات من بدأوا الدراسه

صار لهم 3 اسابيع مدري وش كان يعطونهم ؟؟؟ بس اتصدقي يوم جلست معاه شفته بيكتب

حرف الدال[COLOR="Red"] د بروحه وكمان قعد يسمع لي فاتحته القرآن وفوقها بعض الادعيه للدخول الى

الحمام والخروووج والله استغربت كيف تعلم كل هذا وهنا عرفت انهم طول فتره الاسابيع

الاولى بيعلموهم بس بدون واجبات بس مجرد تكرار ولعب عشان بس بيرغبوا للدراسه

فعلا تعبت معاااه اليوم ولأول مره وللحين ما كمل واجباته بس شسوي طلع ياخذ له فتره نقاهه[/COLOR]

أ

أوراق الخريف

مشرفة سابقة

25-09-2007 | 02:46 PM

السلام عليكم ورحمة اللــــــــــــه وبركاتــــه

هههههههههههههههههههه سوالفكم اتضحك.. ربي يخليلكم عيالكم..

الحمدلله هالاسبوع غيرت اسلوبي معاها نهائيا واحس انها صارت وااااااااااااايد قريبه مني..
يعني ابد ما ايبلها طاري المدرسه الا يوم ترجع منه اسالها شو لعبتو شو عملتو وترد عليي وهي فرحانه وعقبها ابد ما اسالها ليوم الثاني تروح المدرسه.. علشان لا اذكرها فيه واكرها فيه..
الحمدلله الامور ماشيه حيل وخليت زوجي يقسم بان ابد ما يمد ايده عليها واي شي يصعب عليه من التعامل يرجع لي وانا افهمها.. الحمدلله الامور ماشيه بطيبه الحمدلله والشكر لكم خواتي الكرام.. ومنكم نستفيد..

وشكرا..

t

the queen82

عروس رائعة

25-09-2007 | 05:05 PM

الله يكون في عون الجميع احنا لازم ناخذ عيلنا بالهداوه من تجربتي ياليهال يزدون في عنادهم إذا شافوا الأم متوتره عشانهم يمكن البنت حاسة أن أمها راح تنشغل عنها بمولود جديد

أ

أم أغلى فهد

عروس جديدة

26-09-2007 | 02:24 AM

أختي انصدمت حراام عليكم بنتك وايد صغيرة ثلاث سنين بس ومطالبة تحفظ سورة القارعة أصلا السن الاساسي للروضة هو أربع سنين وهذا المعمول عندنا ويكون التدريس باللعب والاناشيد وترديد السور القصيرة والطفل بهذا السن غير مطالب بالجلوس وتقييده بالكرسي علشان يحفظ ويدرس وراها مشوار طويل وهي طفلة صغيرة ولا تعلمونها على إذا حفظت بنعطيك شيء حلو واللي خلاني اكتب وقلبي معورني أن عندي بنت عمرها ثلاث سنين مثل أختها طبعا ماراح أدخلها روضة إلا لما تكمل الاربع سنوات لأن هذي قناعتي
والله يحفظ لك عيالك يا أختي وعيال المسلمين آميين

ف

فلوره

عروس مشاركة

26-09-2007 | 10:21 AM

الله يوفقكم ويعينكم على التربية

وبالفعل اختي بنتج صغيرة 3 سنوات وكم شهر

انا ولدي عمرة نفس بنتج
بس لحد الحين ما اخذته للحضانة
صغيرة وصراحة في هذا السن يعلمون الطلبة على الكتابة
وبيتعب كثير

صديقتي اخذت بنتها في هذا السن
لحد الحين وهي في الصف الثاني
تتعب كثير من الكتابة

حاولي يا اختي انج اشغلين لها شريط قران في السيارة
مكرر

او قدمي لها هدية مثلا

حفظة ولدي سورة الفلق
بهاي الطريقة
- شريط ونكرر لها السورة
- او بالحوافز ( هدية - حلاوة من المحطة - العاب )

اما بخصوص انها ما تسمع يا اختي
تعرفين انت دلع البنات

نفس الشيء ولدي
يقول ما اعرف
يخربط في الاية
بس اصبر عليه وقام روحة يسمع من غير ما اقول له

...................