بســـــــــم الــــــــلـه الـــــرحمن الرحـــــــيم
قصيدة للشاعر الكبير ضيدان بن قضعان... (( ياوجودي ))
يا وجــودي كل ما هــــبّ نسناس الشمـال *** وجـــد من حدّه زمانه عــلـى اللـي مـا يبيـه
وياوجودي كل ما اضحيـت ثـم مال الظلال *** لا غــــفـــت عينـي ولا ذقـت شـي ٍ مشتهيـه
وجد من قفّى وهْـو فـي رجـا كــلمـة تعـال *** وإلتفت من عقب ماْ اقفى ..ولا أحد ٍ لدّ فــيه
الله الله كثير من القصائد تكون بدايتها توجد لكن ماهوب بنفس القوة والجمال هذا
يذكر الشاعر ان كل ماهب نسناس الشمال حس بالضيقة والجور المعروف
ان هبوب الشمال قاسي وجاف ويذكر لنا كل ماجى الضحى لاجاه نوم ولا لذ له زاد
ويشبه نفسه في البيت الثالث بالمقفي اللي يتوجد ان احد يناديه ولا من منادي ويوم
التفت الشكوى لله بصراحه بيت كاني اتخيله قدامي يعني تصوير عميق جداااااا ...
ويا عذابي لا دنـا الليـل مـن روس الجبـال *** وانتهى يوم ٍ من العمـر مـا عـــــاد أرتجيـه
لايزال الألم والعذاب مستمر ويزداد كل ما قرب الليل وانتهى يومه بدون رجعه...
وانتي أبعد من سمـا الحـلـم ووصالـك محـال *** يا بعد من هلّ دمعي ضحـى الفرقـا عليـه
وبدا الشاعر يبين لنا اسباب المعناة بوصف وصاله مع محبوبته بالحلم وحالته بعد الفراق..
يـا غناتـي لا تحسبيـن دمـــعـي يـوم ســال *** ضعـــــف ولاّ خـــــوف ..ولاّ كـذا ولاّ كذيـه
والله إنـي مـــــن رجـال ٍ يضـدّون الـرجـال *** لكن الحظ ّ الردي ..ســاق دمعـي كـل أبيـه
طبعا البيتين هاذي مايحتاج ابين الجمال فيها وهو يبرر ان دموعه مانزلت بسبب
الضعف والخوف انما نزلت بسبب حظه الردي معها اللي ساقه لهالحال اللي هو فيها...
ووالله إنـي كلـمـا دار حولـيـك الـجـــــدال *** قمت كنّ الموت يشّـر علـى قلب قبـرى بديـه
ووالله ان قد لي وانا اصّد لا جالـك مجـال *** صـــــدّة اللـــــي لا تضايـق تذكّـر قبـر أخيـه
طبعا بدت الغيره تبين في هالبيتين واذا جا طاريها من احد حس بالموت والغبن...
ومن سألني قلت مـدري..وإذا عـاد السـؤال *** قلت له تكفى سؤالـك تـرى ماهــــو وجيـه
وش تبيني اقول عن من ترى ذبحـي حـلال *** والخطا منها عليّ صـرت أحبـه وأهتويـه
عذرها لو مـاْ تْعـذّر مثـل واضــــــرب مثـال *** واحد ٍ ما يعـــــرف الحـرّ الاشقـر يشتويـه
في البيت الاول كان يتصدد عن انه يجيب طاريها وكانه مايعرف شي عنها
وعقب ماضغط عليه بالسوأل هل باللي في الخاطر وجابه من تاليه حتى قال
انه من كثر حبها صار يعشق حتى خطاها ويوصف بانها لو ماتعذرت.. بضرب الامثال
ياساتر واللي مايعرف للصقر؟؟؟
وان رجعنا للـتـواصــــــيـف لله الـكــــمــال *** لاْ انتهـى ليـل المـــــــزاييـن جاتـك تبتـديـه
كنّهـا غــــفـل ٍ مــع البـدو طاويهـا الحـيـال *** مـا يميّـز وصـــفهـا إلا نبـيـه ٍ مـــــن نبيـه
هل السبحه صاحبنا وبدا يتغزل فيها وشوف كيف الوصف اللي عليه الكلام...
وصف بداية جمالها بنهاية جمال المزايين الله الله وبعدين وصفها ب الغفل وهي
الناقه الغير موسومه اللي طاويها الحيال يعني السمينة وكل ماسمنت الناقه زاد جمالها
واذا كانت الناقه غير موسومه وسمينه صعب تعرف ومايميزها الا نبيه من نبيه
يعني واحد باخص في حرش العراقيب...
وآهنـي اللـي وصلهـا وذاق مــــن الــزلال *** رشـــفة مــع غفلـة النـاس مـن فيهـا لفيـه
وعـــزتي للي سواتي عــــــشق مالا يطال *** ويوم طاله ضــــيع الحــــلم بين امـــه وابيه
ياْ اول أحـلام الطفولـه علـى حــد ّ الخيـال *** الرجــى باللي حمى البيت مـن حملـة بريـه
حال دونك سيف عنتـر وتاسـع حول حـال *** باْثر حول ٍ حال دونك وانا ادعى هيـه هيـه
هيه ياللي غـرّك الحـسـن واطغاك الجمـال *** والله أني اـــموت ما شفت لأوصافـك شبيـه
انشهد انه واهنيه لكن الرجا في اللي حمى الحرم سبحانه من حملة ابرهه ...
ويذكر ان اللي حالي بيني وبينك هو ظرف قوي وشبهه بسيف عنتر لقوته
وانه مر عليه وهو يناديها تسع سنوات حول ورى حول.. وشوفوا حلاوة الربط
بين البيتين.. هيه هيه هيه
لـو يسـام الحسـن والتيـه بجـــنيـه وريــال *** ما بقــى فـــي سوق غيـرك ريـال ولا جنيـه
كيـف أهـــــــدّك للمقاديـر وانتـي راس مـال*** راس مال ومال..والمال ماْ يغـطـي السفيـه
يقول لو ان الجمال ينباع كان مابقى عند غيرك ولا ريال لان كل الناس بيجون لبضاعتك
وطبعا وصفها بعد كذا براس المال اللي لازم يحافظ عليه وانه مايعطى لسفيه س ف ي هـ
حافــظك حفظي لعينـي ورمشـي لـك جـلال *** وانتـي تْشحّيـن بالما..وانـا شفّـــي مـــويـه
شايف ٍ ظلمـك وساكـت وطـال الليـل طــــال*** لا تركتي طــعن قــــلبـي وانـا مـا قلـت ليـه
لو بقــى للهيـل صـــبـر ٍ علـى فـوح الـدلال *** ما بقـى للهيـل صـــــبـرٍ علـى شـي ٍ يجيـه
هنا يوصف صبره بانه على وشك وشبهه بالهيل بانه مايصبر على فوح الدلال...
كنت احـــــسـب ان الغــلا زال واثره لايزال *** فــــي الحشا ماكـــنه الا دخـــيل في الوجيه
ساقني حبك عـــلى المـــوت وسنيني هزال *** والظروف اقسى مـــن الظلم للعرض النزيه
وانتـي تْسوقيـن عــــقلـي علـى حـدّ الهبـال *** تحسبين ان مـــن بغى شـي يقـدر يشـــتريه
ولاّ انا يـا وجـــــــد حالـي وجـود ٍ مـا يقـال *** وجـــــد مـن ضـحّـى بغاليـه لْرضـا والـــديه
ويا وجودي بأول العمــر قبـل ألبـس عقـال *** وجد من باع آخر العمر ..في رغبـة ذويـه
ويا وجودي كل ما هـبّ صوتـك من شمـال *** وجد من حدّه زمانه عــلى اللي ما يـبـــيـه
في النهاية رجع الشاعر للتوجد من جديد مثل ما بدى بالقصيدة...
منقول