تجمّع كل الأمهات اللي عندهم طفلين أو أكثر...و عقبال الجميع يا رب ينضم لنا..

وعليكم السلام والرحمة

وياهلا فيج اختي ويعطيج العافية خليتي لنا مكان نسالف فيه ونتبادل خبرات بعض ربي يجزاج خير

ويالله انا ببدي وبكون أول أم ترد ويارب يوفقنا لتربيتهم التربية الصالحة

انا عندي ثلاث اولاد ربي لك الحمد

الأول علي عمره 10 سنوات

والثاني أحمد عمره 5 سنوات وسبع شهور

والثالث عبدالله وعمره شهرين ونص تقريباً

وبما إن الفارق كبير حبتين بين عيالي فالتعب اللي اسمعه من أمهات كثيرين أخف عندي

بس بدا التعب يزيد يوم انهم الحين داوموا بالمدارس حاسة اني خلاص فقدت السيطرة

على نفسي وبأعصابي يعني سهر بالليل وقومة من صباح الله خير

يعني بالكثير أنام ساعتين ونص ومقطعة بعد مش متواصلة

هذا غير المشاغل اليومية بالإضافة إلى وجود البيبي الجديد وانتوا اخبر بمتابعته ومشاغله

وبالنسبة للمشاكل بينهم انا ما حاسة ان في مشاكل غير الحين شوي

اذا صاروا علاوي واحمد يلعبون مع بعض بالذات البلي ستيشن يعني كل جولة لعب

تنتهي بهوشة وحتى لو مو هوشة حقيقية تكون مصطنعة يعني يمزحون بخشونة

واخاف عليهم بالذات أحمد يتعورون والا يصيبهم شي جايد لا سمح الله

بس ربي لك الحمد كل مرة تجي سليمة :2_106:

ويارب يرزق كل محروم ومحرومة بالذرية الصالحة السليمة

هلا والله واخيرا حصلت مكان افضفض فيه ....

انا عندي محمد سنتين واربع شهور ... وعندي مريومه 11 شهر

طبعا حملت بمريومه يوم حمودي مسكين كان عمرة 9 شهور .. وطلعت للدنيا يوم عمر حمودي سنه واربع شهور انشغلت فالبنوته اكثر من حمود مسكين كان بين يدين اهلي والخدامة ..

بالنسبه لي واجهت صعوبه فالبداية لانهم بالليل كانوا يقومون ويا بعض وينامون ويا بعض فما كنت اقدر اتحكم فيهم ارقد منو ولا منو ... المهم الحين الامور صارت اسهل لانه حمود الحمدلله ما يقوم فالليل..

بالنسبه لحمودي عندي مشكلة الضرب وياه وايد يضرب مريومه ..

اما مريومه الحمدلله مريحتني لانها ما شاء الله تندمج ويا الناس من اول لحظه ما تصيح ولا تستحي هذا الي مخفف عليه

بس تبون الصراحه لولا الخدامة ما بقدر اتحكم فيهم هم ال2 لانه حمودي ما شاء الله عليه يتسلق ويتشيطن ضروري حد يكون وراه يمشي ... ومتعب شوي خاصتا اذا مرض ..

حلوين اليهال اييني شعور حلو يوم اشوفهم يلعبون يضحكون ويا بعض ..ويوم ينامون عند بعض الود ودي اكلهم اقعد ابوسهم وهم في عالم ثاني ..

حبايبي الصغاريه لو انم متعبين بس تحسين انهم ابرياء الود ودج اتيبن غيرهم وغيرهم ..

موضوع رااائع اخت مرموم واخيرا لقيت تجمع افضفض فيه

انا عندي محمود اربع سنين و3 اشهر
وبنوتي شام خانم عمرها سنتين و3 شهور تقريبا

الله يخليللي ياهم كل واحد فيهم اخذ دلال واخد حقه تقريبا لاني احاول قدر الامكان اني ما اميز وخصوصي انهم يفهمو تقريبا وخصوص شلم بلشت تستوعب

بس بصرااحة بحس لما انزل السوق على طووول اروح حق البنات بس محمود ابوه وراه على الدعسة يعني اذا انا قصرت ابوه دائما معه لانه حبيب ابوه

وبالنسبة للتعب ااااه مجننيني كل واحد بدو يلعب بالعاب غيره وعلى جكر وحمّة قلب من هالناحية بس حرام بيتفقو نوعا ما وبالنسبة لاطفال غيرهم وانا بنعمة كتييير من الله ولله الحمد والمنّة

انا عندي ولد واحد و حامل

بس حبيت اشوف اشلون راح يكون الوضع لمن اولد ان شاء الله

السلام عليكم و رحمة الله و بركاته

أهلا أختي أحلى شوق..

الله يبارك لك في عيالك يا رب... بس ما قلتي لنا إيش إنطباع أولادك بقدوم البيبي الجديد ؟

و هل الفرق بين العيال حلو ؟



أهلا أختي bj3a..

الله يحفظ لك محمد و مريم يا رب...يعني إنتي تحسي الفرق بينهم كان قليل ؟

في ناس تقول الفرق يكون سنتين...و في ناس تقول الفرق بينهم سنة...

بس أهم شيء يكونوا أصحاب مع بعض...ما تتخيّلي كيف حبّي للأطفال...و أحب كل واحدة تنوي تحمل و تجيب عيال :)



أهلا أختي الدمشقية..

الله يخلي لك محمود و شام و يبارك فيهم يا رب...

الفرق بينهم سنتين مناسب ما شاء الله...و ياللا شدّي حيلك تجيبي لهم أخ أو أخت إن شاء الله...واللا ناوية تأجلي الموضوع شويه ؟

لأني أسمع الناس يقولوا الواحد يرتاح بعد أول طفلين..




أهلا أختي lolu..

الله يتمم لك على خير يا رب...
كام بيكون الفرق بين عيالك إن شاء الله ؟ و هل شايفاه مناسب ؟

الله يسلمك ام مريم يااارب ويخليلك اللي عندك
بالنسبة الي ولزوجي مو مفكرين حاليا ابدا بموضوع الحمل الله يخليلنا اللي عنا ويبارك فيهم
وانا والله ركبت لولب ست سنين لان بصراحة ولادتي كتييير صعبة وكمان ولادي بيكبرو شوي ونقدر نحنا كمان ناخد نفس
الا اذا ربي اعطانا فالحمد لله على نعمه

وانتي خبرينا ام مريم عن بناتك ربي يحميهم؟؟

lolu;4373685:
انا عندي ولد واحد و حامل

بس حبيت اشوف اشلون راح يكون الوضع لمن اولد ان شاء الله

نفس وضعي بس عندي بنت وحده و حامل
بس جاني فضول أشوف كيف الوضع مع طفلين
و أنا راح يكون الفرق بين بنتي و اللي في بطني سنة و سبعه شهور

و أنتي يا أخت مرموم ما كلمتينا عن نفسك؟

مرموم;4374398:
السلام عليكم و رحمة الله و بركاته

أهلا أختي أحلى شوق..

الله يبارك لك في عيالك يا رب... بس ما قلتي لنا إيش إنطباع أولادك بقدوم البيبي الجديد ؟

و هل الفرق بين العيال حلو ؟

وعليكم السلام والرحمة

هلا فيج اختي مرموم وربي يبارك فيج وفي عيالج ان شاء الله

بالنسبة لانطباع عيالي بقدوم المولود الجديد

في البداية وقبل ما أحمل كانوا يحنون يبون بيبي وكل ما يشوفون

حد من العايلة والا حتى برا في السوق مثلا عنده بيبي يروحون له

ويلاعبونه مع اني ماكنت ابدا مفكرة أحمل هالفترة بس ربي لك الحمد

يوم شفتهم حابين يكون لهم أخ أو أخت قررت الحمل بعون الله

ويوم عرفوا اني حامل طاروا من الفرحة ويستنوني لمن أرد من مراجعات الحمل

وهات يا أسئلة شفتي البيبي وكم وزنه وشنو لونه وفيه شعر والا اقرع :poster_dev:

وكانوا يتمنون اكثر تجيهم اخت لكن ربي عطانا عبادي الحمد لله والشكر له

واللي أشوفه انهم يحبون اخوهم واحد يبي يعطيه حليب والثاني يبي يشيله

ومرة يبونه ينام معاهم بغرفتهم يعني لويه بس حلوة

وبالنسبة للفرق بين العيال انا أشوفه حلو لأني أحب أنظم حياتي

وما أبي واحد من عيالي ينظلم على حساب الثاني يعني أبي أعطي كل واحد حقه

بعدين احس ان العيال اذا كانوا صغار يبعدوني عن زوجي شوي وهالشي انا ما أبيه

وعذرا على الإطالة

الله يحفظ لكم عيالكم ويخليهم وعقبال ماننضم لكم...

السلام عليكم ورحمة الله وبركاته
أنا عندي حمود وفطومة وأعمارهم باينة في التوقيع ويم أجيب فطوم حمو د عمره أربع سنوات ونص
طبعاً أنا عندي أنه التأخير بين المواليد ليه سلبيات وليه إيجابيات وكذلك إذا كانت الفترة بسيطة

يعني مثلاً حماتي جابت حملت على بنتها وعمرها ست شهور وصح جسدياً تعبت لكن بما أن سنهم متقارب يعني اهتماماتهم متقاربة وربوا مع بعض يلعبون نفس الألعبا يحفظون نفس الأنشودات
أني أحس في صعوبة مع أحمد لأن يبغي يسوي لفطوم حركات كبار يبغي يدغدغها أو يحملها بدون فراش يعني مو مقدر أنها في سن كلش صغير وما يقدر يلعب وياها أي لعبة

بس الحمد لله
وحمود من قبل لا أحمل كان يحن يبغي دادا
ويوم حملت ستانس واجد وكنت أوديه يشوف الألترا ساوند ويايي ويستانس موت ويحب أخته واجد ولا يرضى أحد يقول بياخدها ويحب يعطيها أغراضه بعد

هلا مرموم

ان شاء الله راح يكون الفرق بينهم سنه و نص كان ودي يكون الفرق 4 سنوات بس الله ما كتب

مرموم ..

صارت اشيا بالغلط واخاف اكون حامل الشهر الي جاي ...:gum:

ادعولي ما احمل الا بعد سنتين ...

السلام عليكم و رحمة الله و بركاته

أهلا بكم أخواتي...

عن نفسي عندي بنتين الله يهديهم و يحفظهم و يبارك فيهم...

مريم عمرها سنتين و 6 شهور

و سارة عمرها شهرين

الفرق بينهم كان سنتين و 4 شهور و لله الحمد

أحس الفرق من سنتين لسنتين و نصف مناسب,,,

بيكون الطفل الأول قدر يتعلم على الحمام...و هذا مهم جدا

بدأ يتكلم و يعبر عن الأشياء اللي يريدها...و هذا يسهّل عليكي أمور كتير...

صار ممكن يعتمد على نفسه في أشياء كتير...و هذا بيساعدك بشكل كبير...

و أخد حقه من الرضاعة الطبيعية...و بالنسبة لي هذا أهم شيء...


و بالنسبة لك...جسمك أخذ راحته...و رجع كون الفيتامينات و المعادن و الحديد اللي يحتاجه...و بيظهر هذا الشيء بعد ولادتك الثانية...بتحسي جسمك ضعيف و عرضة للأمراض ووجهك أصفر...و الصحة عموما ضعيفة...لأنه الجسم مرهق من الحمل و الولادة...

الفرق أقل من سنتين متعب جدا للأم و الطفل...لكن طبعا إرادة الله فوق كل شيء...

و الله يرزق الجمييع يا رب من فضله..

يسعدني ان انضم لكم انا بعد ..


انا عندي حسين ، عمره الحين 3 سنوات ونصف تقريبا
وأحمد ، عمره الحين 9 اشهر ..

الفرق بينهم كان سنتين و8 اشهر ونصف :2_106:

كنت اتمنى ان الفرق بينهم يكون اكبر .. لكن ارادة الله ، والحمد لله على كل حال

طبعا الغيرة موجودة ، والصراعات موجودة وزادت لما كبر احمد ، وخصوصا انه حركي وشقي جدا ويضرب اخوه ويركب فوقه وحسين يقوم يتعامل معاه بخشونة في هالمواقف :qaq:

للحين ما اشوفهم يلعبون مع بعض بالعاب معينة لكن احيانا الاقيهم يتمازحون او بمعني ثاني حسون يلاعبه ويخليه يركب فوقه مثلا ، وان شا الله يوم يكبرون يتفقون مع بعض ويصيرون اصدقاء ان شا لله :21_207:

هلا فيكم خواتي الافاضل
بالنسبة لي انا عندي 3 اطفال الله يحفظهم وحامل بالرابع في شهري الثالث
عندي بنتي الكبيرة عمرها حاليا 4 سنوات ونص و ولد عمره 3 سنوات و3 شهور وبنت عمرها سنه و9 شهور ...

طبعا بالنسبة لي تعبت معاهم جدا وخاصة اني موظفه سهر وتعب وغير ذلك عيالي دايما في بيت جدتهم لاني ساكنه معاهم بملحق خارجي فالعيال ما يستحملون انهم يجلسون بدون ما يشوفون جدتهم واعيال عمهم ، وبما ان زوجي يدرس بالخارج وماينزل الا كل شهرين مرة فكان يسهر العيال ويخليهم براحتهم وكنت اضطر اخذ اجازة عشان انام الصبح استعدادا للمجهود اللي راح ابذله بالليل، حاولت مرة بعد ما سافر زوجي اني ارقد العيال من الساعه 8 المسا وفعلا انجحت الخطة بس للأسف تعبت نفسيتي ، لان ابوهم مش موجود وهم نايمين وانا ما اقدر انام هالوقت فكان البيت فاضي علي فرجعت اخليهم يسهرون بس لغاية الساعة 12 بالليل ، انا عارفه ان نظامي خطأ ، بس الوضوع راح يتغير لانه الاثنين الكبار راح تبدى دراستهم بالروضه يوم الاحد واكيد برقدهم بدري ..
اما بالنسبة للغيرة موجودة مع ولدي حمد واخته شروق يتهاوشن على القعده في حظني ويتهاوشون على الالعاب ، اما بالنسبة للكبيرة فهي تحب اخوانها وتموت في انها تتعارك مع اخوها ، حنونه على اختها ، وهي كانت اكثر وحده تبيني اجيب لهم بيبي عشان تلبسها وترضعها طبعا تبيها بنت .
التربية صعبة جدا خصوصا في تواجد اشخاص من اهل الزوج في نفس البيت ، الحركات اللي ممكن يتعلمها الطفل من الاطفال اللي اكبر منه بالسن والالفاظ اللي يسمعها ويرددها ، هذي كلها تصعب عليج عملية التربية فتكونين دائما معصبة ومتنرفزة وتعاقبين اطفالج ، انا وصلت معاي اني حطيت فلفل اخضر على لسان ولدي عشان ما يقول كلمة كلبه والحمدلله ما عاد يقولها مع اني مت وانا اعاقبة بهالطريقة بس كنت مجبورة ، حاولت بطرق كثيرة وما نفعت معاه الا هالطريقة مع ان هالولد بالذات من بد خواته اذا ضربته او هاوشته يجيني يقول بحبج ( فديته الله يهديه ويطرح فيه البركة هو خواته ) ...
السموحة طولت عليكم بس نسيت نفسي وانا اكتب ، ونشوف تجربة اللي بعدي ..
وبالتوفيق للكل ...

السلام عليكم ورحمة الله وبركاته

عجبني كلامكم ياحلوين

انا عندي 3عيال

حسن عمره5سنين و6شهور
وبنت سمها ولاية 1و6شهور ..........بينهم 4سنين بالظبظ
وبعدين جبت حيدر عمره 3شهور ونص
والله انا تعبانة شوي منهم بس الحمدالله هذي عطايا الله
حسن متعبني كثير في الروضة كل يوم طالع لي بشي جديد مرة يبي سيارة خاصة ومرة يقول انه
مايبي يروح ولايسمع كلامي مع انه كان ماشاالله عليه ولد مؤدب بس مادري ايش الي سواه كذا
وتعبانة ماعرف الحل معاه احس نفسي كل معصبة واصارخ على اقل شي

اما بنتي مع اخوها الصغير دايم تضربه وتاخذ لهايته مصاصته يعني حتى اخذت ليها وحدة بس ماتبيها ويعني اتمناهم يكبرون شوي علشان يخف التعب

تحياتي

السلام عليكم و رحمة الله و بركاته

أهلا بكم أخواتي الكريمات...

أشكركم على تفاعلكم...

تصدقوا حسّيت إني في ناس مثلي...يعني نفس الهموم و التفكير...

أطفال هالزمن صعب تربيتهم...و يحتاجوا متابعة قوية و إهتمام شديد..

لذلك بلاقي أغلب الناس على طفلين ثلاثة و ما تجيب أكثر...مع إني بحب الأطفال...

حتى الفروقات بين الأطفال بقت أكبر...زمان على الأربعين الواحدة تحمل...

الآن جسم المرأة ما يساعد.,...و تتعب لو حملت ورا بعض...و ما حد يساعدك و يربيهم إلا إنتي..

الله يكون بعوننا أجمعين...

و خلّونا نحاول نستغل رمضان بالدعاء لهم بالهداية دايما :)

السلام عليكم
شلونكم بنات
شخباركم ومبارك عليكم الشهر
وتقبل الله طاعتكم
مرموم شلونج وشلون بنياتج الحلوين الله يخليهم لج يارب
والله خوش موضوع حلوو تسلم الايادي يا ام مريم

انا عندي ولد عمره 2 و8 شهور
وعندي بنت عمرها شهرين وثلاث اسابيع تقريبا

والله حلوين ولذيذين بس التربيه صعبه وايد
يعني انا اقول الفرق يمكن ثلاث سنوات ونص الى اربع سنوات بعدين تحمل الوحده افضل يعني يكون الفرق ثلاث وفوق مو اقل
لان عن نفسي حملت وكان عمري ولدي سنة و9 شهور من حملت وانا تعبانه ونساة وكنت اجهض قبل لا احمل فيه اكثر من مره
ومع هالحمله رعاية صحيه زايده بحبوب التثبيت وابر التثبيت وتحاميل للتثبيت والابتعاد عن حمل الاشياء
وكان اول من تم مقاطعته ولدي احسه نفسيته تعبانه اشيله وانا بالغرفه ومن الفراش ولكن يبيني اشيله بره البيت او وانا صاعده الدرج
فكنت كله اقوله لالا في بييبي في بطني وما اقدر اشيلك
بدأ يستنفر
بعدين ثقلت وتعبت والله اهتم فيه اراعيه
بس مو مثل ما اكون مو حامل وعادي يعني اهتم اكثر
يعني كله تعبانه والجو حار
وبعد الولادة احس انه حاشه احساس اني شلته من قلبي وحطيت طفل بداله
وتعب والله وايد وايد تعب واستمرض
قلت هذي صغيره
ما تعرف
اهتم فيه اهو اكثر
ولكن اعاني والله اعاني وكل اللي حوالي يشووفون مدى معاناتي
يبكي الليل والنهار يبكي اكثر من الطفله الرضيعه
والله يكون في عوني وادعي ربي ليل ونهار انه يصبرني
ويقدرني على تربيتهم
والله كريم
:)
لو يرد فيني الزمن قليلا واعوذ بالله من كلمه لو
تفتح عمل الشيطان
لحملت بعد ان يكمل ولدي عمر 3 سنوات ونص
والحمدلله
الله يخليهم لي ويصلحهم
اسفه اسفه اسفه على الاطاله
من حر مافيني
هاهاهاهاهاهاهاهي



دمتم سالمين
اختكم شريفة

الموضوع أعجبني كثير

الحمد لله وبفضل من رب العالمين عندي طفلين

الاول علاوي فديت قلبه ويسلم لي عمره 4 سنوات وشهرين و3 أسابيع

والثاني بنوتتي القمر اللى من طلت بهالدنيا جابت الخير والفرح من وراها الله يحفظها لي

يارب ويخليها لي والله حياتي تغيرت بوجودها للأفضل وسميتها بنين وعمرها شهرين و 3 أسابيع


الفرق بين عيالي 4 سنوات الا يومين :2_106:


وأني أشوف الفرق واجد مناسب بحيث يكون الطفل الاول كبر وأعتمد على نفسه



والحمد لله الله سهل علي بولادتهم ولو ان الولاده متعبه

صدق التربيه حلوه وعجيبه بس أحيانا أصير مضغوطه ومو عارفه ألبي طلب من فيهم ....

بوسط حملي الثاني حدثت ولدي عن البيبي اللي جااااي بالطريج وهيأت له كل شي عن البيبي

وكلمته عن نفسه لمن كان ببطني ولمن طلع من كروشتي وخبرته انه البيبي اللي عندي راح يكون مثله

وطبعا كل شي مصور خليته يشوف صوره وهو ياهل وصور أطفال أخرين وووالخ

ومع ذلك اول 3 أيام ولاده صاد ولدي حاله صمت غريبه عجيبه مع بعض النظرات

ولكن بفضل من الله قدر يتعايش ويتكيف مع الوضع بمرور أول اسبوع تقريبا

والحين هو يحب ويموت في أخته ودايما يدلعها ويبوسها بس بعد الغيره موجوده ولو بجزء بسيط






أدري طولت عليكم بس الموضوع عجبني :2_106: