يحبني ويريد أن يتقدم لي

السلام عليكم ورحمة الله

اسمعوا قصتي بس بدون عصبية وابي منكم الحل

أنا فتاة ملتزمة ورزينة ومحجبة من عايلة محترمة ومب انسانة طايشة
تعرفت على شاب عن طريق الانترنت انا من الامارات وهو بعد اماراتي تعلق بي كثيرا واكتشفت فيه انه ما عنده خبرة في البنات وانه خجول واني اول بنت يكلمها استمرت علاقتنا عبر الهاتف فقط حوالي 7 شهور من بداية علاقتنا أنا قلتله شو الهدف من علاقتنا بس تمضية وقت ولا وراه هدف
قالي من علاقتنا اني يكلمني لانه يبيني وبيتقدملي بعد ما يحصل على وظيفة لانه ما يشتغل
قلتله انزين بس انا من ناحيتي ما حبيت استمر في العلاقة لاني قلت اخاف انتظر سنين وهو ما بيحصل عالوظيفة وانا بيفوتني قطارالزواج فكنت اتهرب منه لاني كنت خايفة على مستقبلي انا اؤمن في الحب ولكن ليس الحب الذي يدمر مستقبل فتاة وترفض فرص جيدة لانها اتحب واحد فلاني كنت اتهرب عشان انهي العلاقة بشكل يحس انه ما ابيه بس مب لاني ابي اتعرف على حد ثاني كنت ابي اتوب وانتظر الزوج عن طريق الله
هو كل ما افاتحه اني انا ما اقدر انتظره لين يحصل شغل وألمحله اني بتركه وانا ما ابي سنين تفوتنا ونحن على هذي الحالة يبكي بكاء حتى أمر من بكاء الطفل يترجاني اني ما اتركه لاني صرتله اقرب من اخته وامه واهله لانه كل ما يضايق بشي يقولي وانا اريحه بنصايحي واخفف عنه همومه
فوعدني انه بيحصل شغل اكيد خلال سنة وبيسوي المستحيل عشان نكون لبعض
مع العلم انا شفته وهو شافني مرة وحدة بس من بعيد وفي مكان عام
انا انتظرت 7 شهور وما حصل شي والشاب ما حصل وظيفة مع انه يدور فقاطعته 3 شهور عشان ما ابي اذنب فرد يطرشلي مسجات انه ما نساني وبيسوي المستحيل عشان ياخذني
بعد هذيله ال3 شهور وفعلا حصل وظيفة وايد زينة وسوا اللي وعدني اياه
بس كانت في مشكلة انه لاني غبت عنه ها الشهور بدأ يتهمني اني شايفة شوفة ثانية واني ما ابيه وكل ما اطلع مع اهلي ارجع البيت اكلمه يشتمني ويقول ليش تطلعين بدون حاجة رايحة اتدورين ناس ثانيين تتعرفين عليهم ولازم اطلع مع اخواني ووايد كلام يمس كرامتي وشرفي
قلت حق امي السالفة كلها لانها قريبة لي وهي مثل صديقتي تنصحني وما اخبي عنها شي
يعني ما اسوي شي الا امي تدري عنه و مع انها كانت رافضة تماما اللي اني اسويه واني
اعصي ربي بهاي العلاقة ولازم اتركه لانه ما شي فايدة والزواج عن طريق الانترنت فاشل
فبعد ما اتوظف الشاب قالي انه بيعرفني على اخته عشان بعد شهور من توظيفه بيكلم اهله وبيقولهم اني صديقة اخته عشان يتقدملي يعني يخطط كيف يتقدملي
بس امي رفضت نهائيا لم عرفت انه قالي كلام يمس شرفي وكرامتي
قالتلي هذا الشاب ما يصلحلج ابدا مثل ما قالج كلام الحين بيسمعج اكثر باجر لا خذاج وشكله ما يثق فيج
فقلتله امي رافضة وانت شتمتني فوعدني انه ما بيعيدها مرة ثانية واني تصرفاتي تخليه يشك فيني وعدني انه ما بيقول اي شي مرة ثانية.

فانا مب عارفة شو اسوي اذكر بكاء رجل انا مب قادرة انسى بكاءه ورجاءه لي اني ما اتركه وانه سوا المستحيل عشاني ولا كلام امي هو الصواب وانه كله ها الحب بيتلاشى عقب الزواج وبشوف وجه اخر وانه فعلا الانترنت طريق غير ناجح

افيدوني بس بدون عصبية انصحوني كاخت لكم في الله :flower: