قصة ولادتي بالغالية ( مودة ) .. حياكم الله

بسم الله الرحمن الرحيم

والصلاة والسلام على أشرف المرسلين سيدنا وحبيبنا محمد صلى الله عليه وسلم،،


الحمد لله اللي أنعم علي بولادة بنتي الغالية مودة في يوم 15/7/2007 واللي أراد اله إنها توصل قبل موعدها بأسبوعين في ولادة كانت جدا متعبة لي في الأسبوع 37 و4 أيام بس الحمد لله اللي بيده التساهيل ..

طبعا البعض من خواتي وبالذات اللي كنت وياهم في تجمع حوامل شهر يوليو كان يعرف معاناتي ببداية حملي ويا الضغط لين 3 شهور ، كان يوصل لـ 140/90 وفي هالفترة ما كنت آخذ أي أدوية ومن بعدها إضطريت آخذ حبوب aldomet ثلاث حبات يوميا تبع الضغط بس بدون فايدة ، لين أحد وصفلي عيادة العلاج المثلي وبديت آخذ دواهم والحمد لله الضغط مو بس خف إلا راااح بلا رجعة طبعا بالإستمرار لين ما ولدت .


طبعا ما أقولكم الضغط هذا اللي جاني في بداية حملي أثر ع البيبي وتغذيته عن طريق الحبل السري وقلل من وصول الدم لبنتي فديتها وفي كل مراجعاتي الدكتورة كانت تقول وزن البيبي قليل وما هي قاعدة تزيد أبداً وضروري أولد بطلق صناعي عشان البنوتة وخوف من فقدها وبصراحة كنت أطنشها دايما وقلت خلني أجرب وحدة ثانية عشان آخذ بأكثر من رأي وللأسف أيدت كلام طبيبتي وفعلا أصرت على توليدي الإجباري ..

طبعا سلمت أمري لله وتوكلت عليه وقلت تعب 9 شهور ما ودي تروح في غمضة عين وتروح علي بنتي فديتها ورحت لموعد الطلق الصناعي ونوموني 5 ساعات خلالها أجروا لي الفحوصات اللازمة وإجت ساعة الجد لما وصلت دكتورتي عشان تبدأ تسوي لي التحميلة الأولى وياااااا وجع وضعها في الرحم ،خبرتني ما أتحرك أبدا من السرير وإنتظرت تبدأ الآلام ما فيه ولا شوية وإجت عشان تشيك تشوف هل إنفتح أولأ شافت ولا 1 سم مفتوح وقالت بنسويلك تحميلة ثانية ونفس الشي ما رضى ينفتح رحمي أبدا وهنا بديت أخاف شفت الكل من نرسات تجمع وحدة تحط لي أكسجين والثانية تحط لي جهاز تخطيط الجنين والثالثة تشوف ضغطي وحصلته مرتفع فوق وهنا بديت أبكي وزوجي حولي يهديني ويواسيني وأنا لا حول لي ولا قوة ( على فكرة ما أخذت أحد من أهلي عشان ما أضايقهم بسالفتي ) ، وإجت الطبيبة مرة ثانية تقولي ضروري ولادة قيصرية لأن البيبي بدت دقات قلبه تضعف والضغط عندك إرتفع وإنتي في حالة ما يسمح إننا نأجلك ليوم غير وهنا بدت المناحة ورفضت في البداية وما كان منها إلا إنها تسمعني دقات قلب بنتي فديتها اللي فعلا ما قدرت أسمعها صح .. وتوكلت على ربي وقلت ما بودي أفقد بنوتي وجهزوني للعملية وكل شي تم بسرعة وعاد ما فقت إلا وبنوتي في حضني الحمد لله ومسكينة طلعت فعلا ضعفونة وصلت بوزن 2 كيلو و300 غرام يا حرام والله كسرت حاطري والحمد لله ما إحتاجت للحاضنة ، وتميت منومة 5 أيام في المستشفى وكل من زارني كا ينتقد وزنها يا حليلها ، عموما ولله الحمد بديت بالجد أول ما طلعت من المستشفى وكنت أكثف الرضعات لها وزدتها حليب صناعي غرشتين في اليوم وصار وزنها بعد 40 يوم من الولادة 4 كيلو تبارك الرحمن .. حتى الطبيبة إستغربت كيف إرتفع وزنها في هالفترة البسيطة وطمنتني إن صحتها عال العال الحمد لله .

هذي قصتي بالتفصيل والسموحةع الإطالة ، وأتمنى السلامة والولادة السهلة الميسرة لجميع خواتي الحوامل ويا رب تطلعوا منها بسلامة وإعذروني يمكن في قصتي نوع من التخويف بس تراها مجرد حالة من آلاف الحالات اللي الإنسان ما يعمل لها حساب أبدا ..

تقبلوا تحيتي وترقبوا صورة مودة في القريب العاجل بإذن الله ..