جواب لكل اسألتكم..تجربتي كاملة مع اللولب..

السلام عليكم ..

بسبب كثرة الأسئلة عن اللولب واعراضه .. حبيت اني اكتب لكم تجربتي الكاملة مع اللولب .. عشان اوفر لكم اكبر قدر من المعلومات الشخصية واريح بالكم ..

طبعاً كلنا نعرف ان اللولب وسيلة لمنع الحمل ..

وهذا تقريباً شكله ..







ركبته في نهاية الأربعين بعد ما ربيت بولدي .. وتميت مركبتنه لمدة سنتين و شهر تقريباً ... وشلته قريب من كم يوم بس ..

خلوني اقولكم احساس التركيب ..

بما اني ركبته وانا في نهاية الاربعين ... يعني بعدني عندي مخاوف من اي شي يلامس المنطقة الحساسة بسبب الخياطة .. تألمت شوي يمكن عشان الخياطه بعدها .. ويمكن من دكتورة لثانية يختلف الموضوع .. بس بعد ما حطيته حسيت بشوية تقلصات خفيفه نفس الدورة .. وانتهت على طول ...

اعراض الدورة مع اللولب ...

اللولب يحتاج مدة اقصاها 3 شهور عشان الجسم يتعود على اللولب .. ويا انه الجسم يتقبل اللولب خلال هالفتره .. او انه يرفضه فممكن ينزل مع الدورة ..

1- الآم الدورة تكون اشد نوعاُ ما عن المعتاد .. بالذات اول كم شهر .. كنت احس انه اتييني تقلصات قوية واحس اني بطرد شي من جسمي .. لكن فتره واختفى الاحساس ..

2- الدورة اكثر غزارة وكنت احس بضعف وقت الدورة لأني افقد كمية كبيرة من الدم ..

3- بداية الدورة تكون بنقاط شبه السودا حتى سوادها غريب .. هالشي لاحظته اختي بعد .. وممكن تستمر هالنقاط 3 ايام بعدين تبدا الدورة تنزل بغزارة .. ونهايتها بعد تكون بنقاط سودا تستمر 3 ايام .. (هذا الشي الي خلاني اشيله قبل رمضان)

4- لاحظت انه مع اللولب المهبل يكون ناشف او ينشف بسرعه ما اعرف ليش.. لكن بدونه الوضع افضل ..

تقريباً هذي هي كل الاعراض والمساوئ اللي اذكرها في اللولب ..

تعالوا نشوف المحاسن ..

1- تكونين مرتاحة البال طول الشهر ولا تشكين انج حامل او غيره يعني راحة في الاعصاب .. نادر ما اييج هالخوف ..

2- الرجل عادة ما يتضايق بوجود اللولب لأنه ما يكون نازل من اللولب شي سوى خيط صغير عشان يدل انه اللولب موجود .. احياناً الدكاترة يخلونه طويل زيادة عن اللزوم وهذا الشي يضايق .. فاطلبوا تقصيره ووضعه بشكل مناسب ..

3- راحة للرجل والمرأة ... يعني ما يصير في خوف وحرمان عشان الحمل ... والي تبا تأجل حملها لسنوات افضل لها اللولب ..

اما موضوع الحمل بعد ازالته ما اقدر احكم فيه .. في ناس يتأخرون وفي ناس ماشالله يحملون على طول .. اما وضعي انا مأجله فكره الحمل لمدة بعدني ..

احساسي بعد ما شلت اللولب ..

1- ما تحسين بألم كبير وقت ازالته يعني شي بسيط اللي هو الم بس وقت فتح المهبل لكن في طرفه عين تلقين نفسج خلصتي .. وبعد ما شلته حسيت بالتقلصات الي ياتني اول ماركبته وسرعان ما زالت ..

وهذا كل الي اذكره من تجربتي مع اللولب وان شالله اكون جاوبت على اكثر اسألتكم ... واذا في اي استفسار انا حاظرة.. ويفضل الكشف الدوري على اللولب كل 6 شهور عشان تتأكدين انه في وضعه الصحيح وكل شي سليم

تحياتي لكم ...