صباح الخير يا بنات
كم مره قمتوا من النوم متاخرين و بالويك اند و انتوا خاطركم في خبز لكن مافي وقت تسون العجين و تتريونه يخمر ...بيكون استوا وقت الغدا
اليوم يايبتلكم خبز خمير لكن من خير تخمير ...و ما بطول عليكم
المقادير
بيضتان
2 م ك سكر
2 م ك باكن بودر
3 م ك زيت
ماء ورد + زعفران + هيل مطحون
كوب طحين
نص كوب حليب طازج
نص كوب ماء
ذره ملح
الطريقه
اول شي نخفق البيضتان
بعدين نضيف السكر و الزيت
بعدين ماء الورد المنقوع فيه الزعفران و الهيل
ذره الملح
كوب الطحين و ملعقتين من الباكن بودر
نص كوب من الماء و نص كوب من الحليب الطازج
و نخفق و نخفق و نخفق العجين .... و كل ما خفقنا اكثر زاده عدد الفتحات و الفقاقيع في الخبز بعدين ....هذا شكل العجين لازم يكون سائل اخف من عجين الكيك ...اذا احتاج ماي زيدوا ...المهم يكون سائل
بعدين انيب مقلاه و نخليها تسخن ... و ندهنها بالزيت دهن خفيييييف ... و نصب فيه مقدار من العجين ... و لما ينشف السطع و تطلع فيه الفقاعات و الفتحات مثل الصوره
نقلبه على الوجه الثاني و نخليه يحمر
و هذا شكله يوم يخلص
و استمتعوا بالطعم و بالريحه الذيذه الي بتصحي اهل البيت كلهم ...
و ابو العيال الي بيشكرج و بيقول ما شاء الله على زوجتي قايمه من الفجر تعجن لنا العجين و تخبز لنا
او الوالده تقول ما شاء الله علي بنتي وحليلها من الفجر قايمه تسوي لنا خبز ...ربت بيت على امها ما شاء الله
و لا تنسون الشاي بالحليب بالهيل وبالزعفران
هني و عافيه
