ريلي والحمل...

السلام عليكم ورحمة الله وبركاته

خواتي وحبيباتي .. ادري ربشتكم بمواضيعي هذي .. بس غصب عني كل ما احس بغصه ماحصل غيركم اشكي له ...

سالفتي ويا الحمل ما تخلص سبحان الله احس ربي يسكرها علي من كل صوب كأنه هالشي مب زين لي ما ادري ...

من شهر كنت مقرره اني اليوم اروح اشيل اللولب .. عشان قبل رمضان .. والسبب اني مابا افطر في رمضان 10 ايام بسبب نقط تستمر ..وهالشي كله من اللولب طبعاً ...

انا قلت لريلي وهو عادي عنده موافق .. لكن الي مافكرت فيه اني اناقشه في رأيه في الحمل ..

يعني كنت اقول انا بشيله هالفتره لكن ان شالله بمنع طبيعي عشان ابدأ افكر في الحمل على شهر 2 .. منها يكون اني ما اربي في رمضان الياي .. ولا يكون وقت امتحانات واكون تخرجت .. وبعد قلت له هالفكره وهو عادي اوكي كل شي نفس بعضه عنده ..

امس قلت خلني اناقشه وافهم فكرته .. لأنه ولا مرة قالي نفسي في يهال او شي من هالكلام .. احس عادي عنده يقعد 5 سنين زياده فوق الي نحن فيهم بدون عيال ..

امس قعد يقول انا مابا يهال لين ما احس اني سويت شي صدق حق مصبح .. يعني اكون كونت له شي يفيده بعدين مابا اييبهم فوق بعض واظلمهم ...

اوكي انا موافقه على هالشي وهذا كلام سليم .. لكن ولدنا بيكمل 3 سنين ولا عنده اخ او اخت ... وامور ريلي متبدله في الدوام ان شالله للأحسن ..

رجع قالي عقب وانتي مش متحمله واحد بتقدرين على اثنين ؟؟ (قمه الاحباط والله) صح اني عصبيه وايد وكله اتضارب ويا ولدي لأنه عنيد وراسه يابس ويتم يضربني لكن مع ابوه يصير الحمل الوديع ..

يعني كأنه خايف على مستقبل عياله وياي ... تغصصت وسكتت..

رجع قالي والحمل بيكون جي على مشروع التخرج ووحامج صعب مافيني تتعبين ودراستج تهملينها وتقولين انا السبب .. (يعني انا ما قلتها اول مرة بقولها في الثاني ليش ؟؟)

كل الموضوع يحسسني انه لي انا بروحي .. .قراري وتفكري واتحمل انا نتايجه عشان ما احسسه انه كان عقبه في دراستي ..

من عقب هالكلام قلت له خلاص ليش اشيل اللولب .. مابستعيل عليه بتركه لين ما انته تكون مستعد .. قال لا روحي شليه مثل ما انتي مقرره وعقبها بنشوف اوضاعنا ان شالله

في داخلي حزن والله ليش احس انه قراري بروحي ..؟؟ ما اييني نفس الرياييل ويقول لي انا ابا ياهل يالله متى تحملين .. ابد ما ياني سمعت هالكلام منه..

وحاولت افهمه انه اباك تشاركني في الراي وما يكون قراري بروحي .. يقول اوكي عادي انا ابا عيال بس مش الحين ..

وانا من البدايه ماقلت ابا الحين ... كله اقول شهر 2 ان شالله نبدا نفكر ..

واليوم شافني كله سرحانه وقعد يكلمني ويحاول يقنعني اني اشيل اللولب وانا رافضه اقوله ليش شو بستفيد وانته ما تفكر في الفترات اليايه ..

يقول لا عادي شليه مب مشكله .. مادري كلامه مش مقنع .. وحاسه بغصه في داخلي مب عارفه اوصفها شو المفروض اسوي مادري .. مابا احس اني انا الي ابا عيال وهو لا .. كأنه الموضوع عنده واحد ..

شو تشورون علي اروح اشيله اليوم واتوكل على الله واللا ارفض اشيله لين يقولي بروحه شليه ؟؟

سامحوني لو كنت مخربطه بس هذا تفكيري من امس ...