إلحقوني عملت تمليس بس فروتي تحرقني

السلام عليكم

بنات انا عملت تمليس كيماوي لأول مرة في مشغل يمدحوه وايد أمس، وبصراحة اختي كانت مسوية عندهم من قبل نفس التمليس وشعرها طلع حلو وناعم وأملس.

بس المشكلة ان البنت اول ما حطت كريم التمليس على شعري كامل حسيت بحرقان في فروة راسي والبنت قالت لي لازم استحمل شوي لمدة نص ساعة عشان تظهر النتيجة. المهم اتحملت وانا ابي اصيح من الالم.

بعدين غسلت لي بشامبو التمليس وكونديشينر . حسيت بشوية راحة وخف الالم وبعدها قصت شعري تدرجات، وغسلته مره ثانية لضمان ان الكريم كله راح .

وعملت استشوار. اول يوم وهو امس كان شعري جاااااااااف رغم انه مالس بس اخذت منها سيروم كريستال وحطيته قبل النوم والصبح حطيته ، احس جفاف شعري بدأ يخف، بس المشكلة في الفروة.

بنات فروة راسي احسها احترقت . لما ألمسها احسها شوي صلبة كأنها جافة وتعور باللمس وشوي أحمر، وشوي تحرق بس مو كل مكان يعني أماكن معينه وهي منتصف الرأس الى المقدمة شوي، والجانب الايمن من الفروة. وما اقدر اغسل راسي الا بعد 5 الى 7 ايام مثل ما قالت لي والا بتروح النتيجة.

أنا سألت البنت عن الحرقة اذا بتروح قالت طبعا مع الوقت تروح. اللحين انا مرعوبة ان شعري يطيح( بس بأمانة لحد اللحين ما طاح شي من شعري واحسه طبيعي)

بس لما اقرا بنات يقولو بعد أيام طاح شعرهم ارتعب. اختي لما سوت هالتمليس قبل 8 اشهر تقريبا شعرها ابدا ماطاح، هي ما تتذكر اذا الفروة حرقتها او لا ، وشعرها ما شاء الله لحد اللحين ملمسه ناعم صح الشعر الجديد اللي طلع طالع مجعد بس السابق بعده ناعم الملمس كأنه طبيعي.

بنات ارجوكم طمنوني بموت رعب والله مرعوبة شعري يطيح ومادري شو اسوي، اخاف اسوي زيوت اللحين وتصير نتيجة عكسية، يعني لازم انتظر لحد ما اغسل شعري اول، اللحين ما احط غير السيروم واحاول احطه عالفروة عشان يهدأ الحرقان. اخاف ان فروة راسي حساسة وما اتحملت.

ممكن احط كريمات شعر مثل كريم فاتيكا وبناتين وغيرها في هالفترة قبل الغسل؟ وهل تظنو ان هالشي طبيعي وبيروح مع الوقت؟

بس أمانة ما تخوفوني أكثر والا بصيح والله بصيح :confused: