شحالكن حبيباتي؟؟عساكن بخير و عافية
الصراحة انا هاي اول مرة اكتب موظوع في هالقسم بس محتاجة رايكم لانه احس محد قادر يفهمني او يعطيني راي يعجبني
نحن بيتنا اليديد ما باقي شي و يخلص و انا من قبل فكرت في لون غرفتيه و كنت مختارة اللون الاخظر حق الصبغ و بخلي الديكور وردي على فوشي يعني لون يكون فرفوشي و يفتح النفس مابا الغرفة تكون كئيبة..يعني تقدرون تقولون تقريبن حاطة الوان هالصورة في بالي
الله يعزكم الحمام اخترته و ركبوه خلاص لون السيراميك ابيض و اخظر فاتح
واخترت ارضية الغرفة جرانيت لونه بيج و هذي صورته بس لونه عالطبيعة افتح
انا غرفتيه حجمها زين مش صغيرة ولا كبيرة و انا ناوية احط فيها السرير مع الكوميدينو و التسريحة و ابا احط كرسيين مع طاولة و مفكرة احط الكبت الصغيرون اللي يكون كله ادراج و ناوية احط اكسسورات وايد فحجرتي يعني اباها تكون حلوة و فرفوشية و كلاسك و تفتح النفس :21_207:
و غرفة الملابس بيكون فيها الكبت للملابس و مفكرة احط عند مدخل غرفة الملابس مثل هالستاير اللي تكون من خرز على اساس تعزل الحمام و غرفة الملابس عن غرفة النوم شرايكم؟
الحين عاد محتارة في الاثاث خشب ولا حديد انا احس الخشب افخم بوايد بس احس الخشب الغامج ما يركب ويا اللون الاخظر و الفوشي و الخشب اللي فالصورة فوق انا ماحب لونه وايد و احس انه يخيس بسرعة و مب بالعة لونه مادري ليش و بعد في نفس الوقت انا فخاطريه الاثاث يكون خشب لانه حتى الكوميدينو و التسريحة بيكون شكلهم ارقى و انا وايد عندي اغراض و بستهلك الادراج اللي فالكوميدينو و التسريحة..و عمري ما شفت تسريحة حديد يعني احس شكلها بيكون عبيط و اباكم تشورون عليه شو الاثاث اللي اختاره و بيناسب الوان غرفتيه خشب ولا حديد و اذا خشب اتوكل على الله و اخذ هاللون الفاتح؟؟ مع انه مب داخل خاطري وايد بس هو الوحيد اللي احسه يناسب الوان الغرفة
و اذا عندكم افكار للغرفة و اكسسوراتها و اكسسورات الحمام عزكم الله و الوان للصبغ عطوني اياه فديتكم لانه بعدني ما صبغت و مفكرة اخلي 3 جدران لونهم اخظر فاتح و الجدار اللي بيكون عليه السرير يكون لونه اخظر بس اغمج بدرجة او درجتين عن اللون اللي على باقي الجدران شرايكم؟
و تقريبن كل الاكسسوارت و المفرش اباهم لون وردي و داخل معاه الاخظر:SOFA:
و مشكوورين مقدما و يا ليت ما تردوني خايبة لانه املي فيكم كبير ادري اني طولت عليكم بس حبيت اقولكم كل شي افكر فيه و حاطتنه فبالي عشان تساعدوني بافكاركم المبدعة:9_28:
والسموحة منكن
اختكن في الله جود الحزن
