بنتي مسببة لي حالة نفسية .... ساعدوني

خيوه
مسامحة بس كأنش استعجلتي على فطامها
المفروض قبل ما تحاولين تفطمينها ادورين على البديل يعني كنتي المفروض تعطينها حليب بالفراولة خليها تشرب بالعود
انا بنتي الحين عمرها سنه وعشرة شهور وان شاء الله بفطمها خلال هاليومين من المرضعة بس الحمد الله عودتها من صغرها تشرب العصائر والحلييب بنكهاته بالعود " الشفاطة " أو " القشة "
حاولي معاها خيوه

هلا ومرحبا فيك
اختي الله يجبر بخاطرك انت الوحيدة اللي رديت علي
يمكن استعجلت بس شسوي
انا اعطيها بشفاطة لأنها ماتبي الرضاعه بس ماتبي ولانوع ولايعجبها شي

ساعدوني ماحد عنده حل

عزيزتي اسألي الطبيب عن ادوية كالسيوم ( شراب ) للاطفال واعطيها اياه اذا مارضت تآخذه ممكن تحطيه لها بالعصير او اي شئ تحب تاكل او تشربه وبكذا يعوض عدم شربها للحليب، مع انه مافي شئ مثل الطبيعي بس الله يعينك حبيبتي وكل شئ ربي يقدره اكيد له حكمه فيه.
ربي يحفظها لك ، ويرزقك برهـا.

فعلا أختي أنتي غلطتي


كان بالبدايه قبل فطامها تعوديها علي العصائر والحليب

ومن ثم تفطميهااا


حاولي أختي وبإذن الله راح تتعود


ترى هذي غلطتك كانت غلطتي بولدي بالظبط

أني فطمته بسن أصغر من بنتك وما عودته على الحليب

بس بعدين حاولت وياااه وما يأست خصوصا ولدي من النوع العنيد

وحتى قااام يشرب المرضعه والكوووب وكنت اعطيه نيدو مابعد العام الاول

اهلاخواتي فديت قليه.... واحى شهد
قدر الله وماشاء فعل ...
انا اعطيها دوا كالسيوم بس ز ماقلتي اختي مافي زي الطبيعي
وبنتي من النوع العنيد لمل اعطيها الحليب على طول تكبه على الأرض
والله ماني عارفه شو اعمل اياه الله المعين ويهديها لي

مشكورين على الرد خواتي

لو انتي بدأتي معاها بالتدريج كان تعودت على تركه من نفسها


انا عملت لبنتي كذا

قطعت معاها بالتدريج مرتين او مراات في اليوم

وبالعكس

بس اول اسبووع تعبتني وبعدين خلاااص

يا اخوات شوي شوي على الاخت.. خلاص الامر صار الحين .. واللوم ما منه فايدة..

المهم اختي جربتي الحليب الطازج ( المراعي ولا غيره ) تفورينه وتحلينه بعسل او شوية سكر؟
مع الافطار والعشاء .. حبيبي ولدي كان يحب هذا الشيء.. وانا كنت اشرب معاه بعد لأني كنت حامل.
وكان بعمر بنتك بالضبط..

اشربي معاها عشان تتشجع.. ومرة وحدة زين عشانك تقولي الكالسيوم مش ولا بد عندك بعد :)

الله يعينج اختي ويعيني انا بعد ...

لانه بنتي ترضع طبيعي ومب متقبله المرضعه وناويه اخلط الطبيعي بالصناعي بعد ما تكمل السنه بس ماني عارفه كيف ...

من طاحت للدنيا وانا احاول اعطيها الماي والعصاير بالمرضعه وهي رافضه ..

بس انتي حاولي تعطينها حليب بالفراوله (ابوقوس) اليهال كلهم يحبونه ... فيه منه حليب عادي (من دون النكهات)

ترى حليب الفراوله فيه نكهات لاكنور طعمه غير عن المراعي .. وابوقوس طعمه غير .. حاولي والله معاج

السلام عليكم خواتي

انا اشوف ترجعي ترضعيها طبيعي وتفطميها بالتدريج
واقول لكل الاخوات لاتعودونهم عصيرات خارجيه (يعني مو طازجه)
وحليب بالنكهات عشان السكر اولا بيخرب اسنانهم وثانيا يسبب لهم
ارتفاع سريع في الطاقه وبعدها انخفاض سريع واعراضها انه الطفل
تشوفيه بعد مايشرب العصير بشويه يصير نشيط زياده ومايسمع الكلام
ويتنطط وبعدين بعد مايروح السكر تشوفيه هادي زياده عن اللزوم ومتعب.

وبالذاااااااااااااااات في المرضعه لا عصير ولا حليب بسكر او نكهات لان المرضعه
تخرب الاسنان بسرعه. بالكاسه اهون.

وبالنسبه للقطع التدريجي جربتها مع بنتي الكبيره تخلطين شوي شوي.
اذا الطفل يشرب 150 مل تخليها 120 حليبه العادي و30 الحليب الطازج (للي فوق
10 شهور) وبعد يومين ثلاث يصير 100 عادي و50 طازج وهكذا.
وكل طفل مختلف عن الاخر. في بعضهم ينتبهون زياده للطعم يعني ممكن طفل يحس
بالحليب الجديد اذا كان 50 مل وفي اللي ماينتبه وكل واحده تجرب على طفلها.
اذا شفتيه ماحس ب50مل في البدايه خليكي عليها وزيدي بعد يومين. واذا انتبه
نقصيها ل30 لحد مايتعود وهكذا. بنتي كانت على الصويا لانها كانت تتحسس زمان
منالحليب البقري بس قبل ماتكل السنه راحت الحساسيه وفي اسبوعين تعودت
الحليب الطازج (بدووووون سكرولا عسل ولا نكهات) بالطريقه هذه والله يوفق الجميع.

تعبت من كثر الهذره :21_161:هههههه الله يعينكم. عشان كذا ما ارد على المواضيع اتعب من
كثر مااهذر.ههههههه

اختكم

نسيت ارد على صاحبة الموضوع:sm215:
اختي اشفطي لها حليب الصدر وفي رضاعه سوي الحليب الصناعي
(30 او 50) وبعدين حطي عليه الطبيعي واعطيها.
ولازم تشربي حليب كاستين باليوم (قليل الدسم) او لو ماتحبين الحليب
تكثري أجبان صلبه, زبادي والله يعينك.
خبرينا ايش يصير. الله يعينك.

اختك

مرحبا خواتي
الحال على ماهوعليه بنتي المنتصرة ((حشى حرب))
هلا اختي جمانه ان شاء الله اجرب الحليب وتحبه مع اني كنت اجرب اغلي النيدو وماحبته

مرحبا bj3a
الله يعين الجميع الأمومة مو سهلة
مشكورة اختي

هلا اختي nightingale
المشكلة جف الحليب
الله المعين

لاتنسوني في الدعاء

...إسإلي دكتور أطفال إن شاء الله يفيدج ...أنا رايي ما في أحسن من الرضاعة الطبيعية

السلام عليكم

أختي ادري انه جف. بس ممكن يرجع ثاني.
اذكر يوم كنت حامل ببنتي الثانيه وكنت في عيادة الأطفال
سمعت واحده تقول انها قطعت نفسها بالسكين وطلع الجرح
عميق فأعطاها الدكتور حبوب قويه (مدري يمكن كانت مضادات
حيويه) المهم انها ماقدرت ترضع بنتها فجف حليبها. قالوا لها ممكن
ترجع ترضعها طبيعي بس الشغله صعبه شوي. انا جاء دوري عشان
اوزن بنتي وماقدرت اسمع باقي الكلام. اعتقد لو حاولتي تستعملي
شفاطه كل كم ساعه شوي ممكن يرجع الحليب مره ثانيه.
بس اسألي الدكتوره كيف وإن شاء الله تفيدك.
الله يوفقك اختي.

مرحبا اختي bestsmile
سألت دكتور وقال لازم فتر ةوتتعود بس احس انه طولت

هلا nightingale
ماودي ارجع من جديد
وحتى بنتي احسها ماتبيه لانه بعد يوم من فطامها قالت تبي ويوم جيت اجرب رفضته
مشكورة

السلام عليكم ورحمة الله

والله الله يعينك أختي إن شاء الله تنحل المشكله عاجلا
غير آجل.
بس هي بنتك الحين تاكل زبادي وجبن عشان على الأقل يعوضها
شوية كالسيوم. جربتي معاها الحليب السائل. أنا كنت أكككره
حليب النيدو والبودره حتى الحين ماأقدر أبلعه.
حاولي الحليب السائل وإذا مانفع مافي غير تغشيها في أكلها.
يعين لو تاكل زبادي اخلطيه بشوية حليب سائل.
أو جربي معاها الحليب الملك شيك الطبيعي يعني جيبي فراوله
أو مانجو أو الفاكهه اللي تحبها واخلطيه بالحليب. وكثري
الفاكهه في البدايه عشان ماتنتبه للحليب.
ههههه الله يعيننا على أولادنا والله أنواع الابتلاءات. هههه
الله يجعله في ميزان حسنانتا.
جربي أختي وقولي لنا ايش يصير وإن شاء الله تنحل المشكله
أو ربنا يلهمنا الحل. وادعي كثييييييييير واستغفري.
الله يعينك ويفرج عليك.