عيزة اشطب شقتي (ساعدوني يبنات مصر ارجوكم)

السلام عليكم ورحمة الله وبركاته

اخواتي انا رورة مسجلة معاكو من زمان في المنتدى، انا تجوزت من سنة واحدة وجبت بنت امورة ماشاء الله عليها، الي هي صورتها تحت اسمي

المهم انا اتجوزت وسافرت علاطول عالكويت من غير ما اشطب شقتي فمصر، وكنت عيزاكو تساعدوني في اني اشطب شقتي لأنها كبيرة اوي وانا هبعتلهم الفلوس فمصر وهم هيشطبوها هناك (اخوات زوجي) وعشان كدة مش عرفة اي حاجة فأي حاجة

المهم انا هوصفلكو الشقة عشان تبقو علا نور

الشقة 140 متر عبارة عن الشكل الي بين القوسين ( ] )

تدخلو من باب الشقة علا نص الشكل دة.. فاهمين ازاي

الي هو الريسيبشن، لأن الشكل دة عبارة عن الريسبشن بس وهو مفتوح علا بعضه علا فكرة وفي في نهاية طرفين الشكل غرف النوم هوصفهالكو بعدين

المهم، تدخلو من باب الشقة علا نص الريسبشن الي هي الغرفة الوسطانية، خلاص
تلائو عمودين مدورين وشباك كبير في وسط العمودين
وفكل غرفة من الريسبشن في شباك كبير

يبأة دلوقت انتو واقفين علا المدخل الي هو نص الريسبشن.. لما تمشو شمال تدخلوو على الغرفة الي انا عيزة اعملها سفرة، وبعدين موصولة بطرقة كبيرة الطرقة فيها المطبخ والحمام وغرفة النوم الرئيسية.
والطرقة الكبيرة دي هي نهاية الشكل الي انا عملته دة

اوك.

وانتو واقفين علا المدخل لو مشيتو يمين هتدخلو علا الجزء التاني من الريسبشن وهو الغرفة الي انا عيزة اعملها أنتريه، وبعدين نوصل لنهاية الحرف من الناحية التانية وهي عبارة بردو عن غرفة مفتوحة عالريسبشن عيزة اعملها معيشة
وبعدين في غرفة أطفال مقفولة

انا حاولت ارسملكو شكل الشقة عشان بردو تكونو مشيين معايا مظبوط، بس ياريت تفهمو لأن الكتابة مش واضحة خالص، حرف العين معناه (عمود) وحرف الشين معناه (شباك)
0الملف مرفق بالموضوع

علافكرة انا عيزة اعمل المطبخ مفتوح عالسفرة، وعيزة اعمل سبوتات في سقف الشقة كلها حتى الحمام والمطبخ، الحمام عيزة اعمل فيه بانيو مدور، والمطبخ بتاعي مش كبير اوي عيزة اعمله حاجة شيك وياريت يكون من قبنوري، والحوض في الحمام عيزة اعمله داخل رخامة كبيرة وتحته مقفل عبارة عن دولاب صغير عشان احط فيه الفوط وادوات التنظيف واعتقد بردو الحاجات دي عند قبنوري.، وهعمل الشقة ان شاء الله مستويين
فكرت اعمل الشقة اللون الأورانج وهوريكو اللون في الصفحة المرفقة، بس لسة مش عرفة اعمل لون السيراميك ايه، وسيراميك الحمام (حمامي كبير) والمطبخ.
وكمان لون غرف النوم

المطلوب:

بليز بليز بليز..

عيزة اعرف سعر كل حاجة وياريت لو في نماذج والوان وافكار حلوة.. بس تكون في الحدود عشان المبلغ الي هشطب بيه مش كبير اوي. وياريت كمان الأماكن عشان مش عيزة اتعب الناس معايا فمصر في التدوير واللف.

لو في اي اخت لسة مشطبة شقتها تقولي السيراميك بكم واسعار قبنوري ايه والبياض في شقة زي دي هيتكلف اد ايه وشغل الاسبوتات في السقف والمطبخ والحمام وكل الحاجات والتفاصيل دي ياريت تقولولي عليها

وكمان حد يساعدني في اختيار لون غرف نوم مناسبة

والعمودين جوزي عايز يعملهم مرايات مربعات صغيرة بس انا مش مقتنعة خالص حسة انها موضة اديمة وهتبأة عاملة زي النايت كلوب :(

وبجد هبأة مبسوطة اوي لو تفاعلتو معايا وهدعيلكو من البي
مش ادرة اوصفلكو انا شايلة هم الموضوع دة اد ايه :(

واهو يبأة الموضوع مرجع حلو لكل اخت داخلة علا تشطيب شقتها

وجزاكن الله خيرا

رابط لون الحائط الي عيزة اعمله

http://go.3roos.com/MXU7Yn8DPbT