تجاربكم مع خرم اذن بنتكم

بنتي كملت شهرين تقريبا لما خرمت لها اذنها بعد الحاح من الأهل بضرورة خرم الاذن الحين قبل بعدين

خاصة اني لما اطلع فيها المول الكل يفكر انها ولد و الطريقة اللي بتساعد الناس يفرقون هو الحلق

المهم خذتها عيادة خاصة و عندهم حلقات مخضوص عشان الخرم

و احترت و انا انقي اللون لانه الالوان كلها حلوة

و البنت بكت كثير و هم يخرمون لها اذنها و ما سكتت لين رضعتها

و الدكتورة عطتني مرهم فيوسدين عشان ما تلتهب الاذن

ووصتني ما اشيل الحلقات لمدة ست اسابيع

و لازم تنتبهي و انتي تغيرين لها ثيابها انها ما تشبك بالحلق و بعدين تتعور البنت

و ان شاء الله ما يصير عليها شي

تحياتي :)

هلا اختي
اول شئ لازم تنتظرين لأنها بعدها بنتش صغيرة
انا جذية اول ما جبت اول بنوته لي قلت بروح اخرقها بعد ما اطلع من الأربعين بس قالت لي الدكتورة خليها اتكمل شهرين وتاخذ أول تطعيم وبعدين اخرقيها
وفعلآ انتظرت ووديها المركزالصحي بس الممرضات طردوني وخلوني انتظر بالخارج وبعد اشزي رجعوها لي وهي مسكينه تصرخ وآذانها لونها أحمر ، سألت الممرضة وياليتني ما سألت خبرتها بشنو خرقتيها قالت لي بيدي اتصوري اختي رزت التركية فيها كأنها اترز دبوس هذه الطريقة القديمة وللأسف ما زالو يستخدمونها اكثر المراكز
أما بنتي الثانية وديتها صيدلية وكلها غمضة عين وخرقتها صج صاحت بس مو ذاك الصياح بسرعة سكتت
وأما الثالثة بعد وديتها صيدلية بس أحلى ما في الأمر انهم ايحطون بنج موضعي في الأذن وبعدين يخرقونها بجهاز مثل المسدس ما صاحت بس فتحت حلجها وصكته يعني كان الألم قلقل جداً
وتدرين اختي وديت كاميرا فيديو معاي وصورتها واهم يخرقونها
أما بنتي الرابعة عمرها الحين شهر و18 يوم بنتظر لين اتكمل الشهرين واطعمها وبعدين بوديها اخرقها بالصيدلية
بعدين بعد الخراق اول ثلاثة ايام احط فازلين او مرهم على الأذن وخلاص
وهذي تجاربي مع بناتي

انا نفس الاخت humsat77 وديتها صيدليه بس بنتي كانت كبيره شويه كان عندها 4 شهور
وطبعا قالولي اتاخرتي بس الحمد لله راحت وحطلها مخدر وعلطول بالمسدس عيطت ثواني
وخلاص والحمد لله
طبعا هو وراني نوعين نوع رخيص بشوفه في السوق وطبعا مارضتش اخده وفي نوع تاني نظيف بتختاري الحلق متعلق
على حاجه عرضاه ولما بتنقيه بيجيبلك العلبه وهو فيها مقفول ومعقم وهو ده اللي بتاخديه لانه الصيدلي هو اول واحد فتحه
والحمد لله بنتي كويسه ولا مرهم ولا حاجه وشكله شيك كمان لان النوعيه دي بتكون نظيفه اهم حاجه قبل مايبقى عندها وعي يعني قبل 6 شهور
وربنا يوفقك
ولازم تكوني معاها عشان لو عيطت تديها تتيتينه او ترضعيها

أنا بنتي عمرها 7 شهور وللحين ما خرمت اذنها....كل مره أتريا فرصه تكون فيها البنت بخير لا زكام ولا سعال ولا شي بس الحمد لله على كل حال.....بشوف يمكن في رمضان اخرملها اذنها....ليش العجله....

تسلموا على الرد
يعنى في رايكم لازم انتظر لحد ماتكمل شهرين؟؟

انا في رايي تنتظرين تكمل شهرين

احنا عندنا في البحرين في الصيدليات مايرضون يخرمون اذنها قبل

ليش مستعجلين عليها بعدهي صغيرة

ولين خرمتين اذنها كل يوم تقريبا خلي على اذنها فازللين عشان ماينسد الخرم

تحياتي: العــــاشقة

انا بنتي خرمتها وكان باقي لها يومين وتكمل 3 شهور
وديتها الصيدلية وسوولها بالمسدس بس كا ابوها معاي
وصاحت مع اول اذن وما رضت تسكت وابوها عصب علي
وقال لي يالله نمشي ما يحتاج الاذن الثانية تخيلوووا
وعصبت عليه وبعدها وافق وقال لي بطلع السيارة وما اتيين ابها السيارة والا وهي ساكته
واللي في الصيدلية الكل قام اطالعنا ويضحك علينا واحنا نتهاوش على الطفلة وخرم اذنها
وبعدها حطيت لها فازلين بس ليلة وحدة وللحين تمام

احنا مايسون عندنا بالصيدليات عحنا طبيب اطفال يسويلها.. اليوم وديتها عشان اخرمها بس دكتور طلع مسافر وقالوا لي عادي هم يسون من اول اسبوع بعد الولادة

اختي انا لما كنت صغيرة

خرمت الممرضة اذني وانا توني طالعة من غرفة الولادة بساعتين تقول امي طلعت من المستشفى وانت منخرمة وقاضية

عادي مايضر وماأثر علي وهالحين انا مخرمة 3 خخخخخخ


بس اخي هالحين عمرها سنة ونص

انا موديتها اخرمها كان عمرها ست شهور صاحت شوي اول ماخرموها بس مجرد ركبنا السيارة سكتت وعادي ماطلع دم ولاشئ

والافضل تخرمينها بدري علشان ماتكبر اكثر وتصير تحس وهي صغيرة بتصيح شئ وتسكت مو مثل لما تكون تتحرك او تمشي ويألمها


بالتوفيق اختي

اذن بنتي ضغيييييييييييييييييييييييييييييييييييرة
مستحيل اخرمها الحين بيصير الحلق اكبر من اذنها ههههههههه
عمرها الحين 4 شهور ..لين يصير عمرها سنه بعدين بخرمها
كلها ضغطة مسدس وانتهينا..

نصيحه اخرميه الحين كل اذاني الاطفال صغيره اريح لك ولها
انا خرمت بنتي وهي عمرها 3 اسابيع ورتحت

تجربتي.. كل من قال عادي من اول اسبوع
بس انا كانت كاسرة خاطري .. وايد صغيرة وضعيفة ..
فحطيت بالي ما بخرمها الا بعد اكمال الثلاثة شهور يكون استقوت شوي

ولما كملت الثلاثة شهور صارت عندنا حالة وفاة :( فأجلت الموضوع شهر
وما خرمتها الا بداية الخامس




وديتها الصيدلية وهناك ممرضة خرمتها مسدس بعد ما رشت بنج موضعي..
والالم كان خفيف.. توقعت اقوى الصراحة

وعطتني بعدين مرهم خاص للجرح استعمله مرة يوميا لمدة 7 ايام..
مع تحريك الترجية يوميا ..

وعدت على خير..