بنتي ريلها .............

بس ما فهمت قصدج حبيبتي
اذا تقصدين ان رجلها مقوسة
احتمال يكون لين عظام
انا ولدي كانت رجوله مقوسة وتاخر في المشي وطلع عنده لين عظام(كساح)
انا اشوف انج تودينها الطوارئ السلمانية وهناك طلبي دكتور اطفال يشوفها
ويسوون لها تحليل دم او اشعة وبيعرفون اذا كان كساح
وما قلتي لي جم عمر بنتج ؟؟

كم عمرها ربنا يحفظها لك ويسعدك بيها؟؟

مرحبا اختي
بقول لش سالفة صديقتي عندها بنت الله يحفظها شهر 11 راح اتكمل السنتين ، المشكلة من اول ما مشت بنتها لاحظت تقوس بريلها بس قالت اكيد هذا من المهاد لأني ما مهدتها يوم كانت صغيرة بس كل ما كبرت بنتها زاد التقوس ومن زود ما التقوس واضح بريلها أثر على طول البنت لو تشوفينها توقولين قزمة وبالصدفة كان عندها موعد للتطعيم لسنه ونص وقالت بخبر الدكتور عن السالفة ومن شافها الدكتور قال ليها عندها كساح بدرجة كبيرة لأن عندها نقص بفيتامين د بس قال الأحسن اتودينها عند اخصائي يمكن ايكون تشخيصي خطأ، وعلى طول السلمانية والدكتور سوى ليها اشعة قال ما فيها اي شئ البنت سليمة ، بس تعرفون الأم بدت اتوسوس ودتها اخصائي ثاني أيد الدكتور الأول وعلى طول حولهم على السلمانية علشان ايفصلون لها جهاز لريلها والحين المسكينة ما تمشي الا بالجهاز لأن الجهاز يخلي الريل سيدة علشان ما تتقوس والسالفة بطول بتاخذ ليها سنتين تقريبا هذا اذا خلت الجهاز عللى الأقل 18 ساعة باليوم وتعرفون طفلة ما تقدر تلعب ولا اتنام من هذا الجهاز فنصيحة مني اختي وديها باقرب وقت لأخصائي وشوفي وان شاء الله خير

ما توف شر بنتش ياوهج وبسرعة وديها دكتور أطفال
عندش دكتور مارتن في الأمريكي اللي في سار واجد زين بعد دكتور قاسم عراداتي في التخصصي ودكتورة ميناكشي في التخصصي بعد ممتازين

ماتشوف شر ان شالله رئيي خذيها لاخصائي افضل وممكن يوصفلها حذاء طبي
ربي يحميها

بنتي عمرها 3 شهور

اتي اقصد القدم وليس الساق

بس القدم مايل لليمين

اختي افضل توديها المستشفى خل يكشفون عليها .. ما راح تخسري شيء... وفي المقابل تتطمني عيها..

ان شاءا لله كل شي طبيعي

اختي وهج الدموع لا تسكتين عن بتتج
ترى انا من البحرين وولدي تاخر في المشي
وكان دايم يحاول يمشي ويتخطى بس ما يقدر يمشي عدل
ولا يقدر يركض
وبسرعة يطيح وكل اوديه المستشفى ويقولون طبيعي
واقول اليهم سوو اليه تحليل او اي شي ابي اطمن ما يرضون
ويوم كمل سنة و6 شهور وديته لفحص وبعد ما رضو وقوالو اليي طبيعي
وبعد اسبوعين وديته وقالو اليي طبيعي وقلت للدكتورة اليوم ما اطلع الا مسوين لولدي تحليل
وباصرار وكانت النتيجة بعد 10 ايام وللاسف ولدي طلع فيه لين عظام (الكساح)
وعطونا تحويل السلمانية وتعالج ولدي والحمد لله الحين عمره ثلاث سنوات وطبيعي
ولك شي فيه اوكي
عشان جدي اختي اقولج المستشفى ما يهتمون وكل شي عندهم طبيعي
بس انتين راكضي على بتج وتحركي قبل لا تكبر وتزيد المشكلة
وطمنيني عليها لاني فعلا احاتي بنتج لاني مريت بهالاحساس من قبل
وما عليها شر