انا متعقده من نفسي =(

السلام عليكم بنات...


باقولكم سالفتي ... انا بين فتره وفتره تجيني حاله واقعد اشك في نفسي وافقد الثقه في نفسي ... يعني اقول انا مب حلوه او انا فيني كذا وكذا واتضايق وااااااايد من نفسي ... واقعد ساعات اصيح ... وبالساعات وماسكت ولا ابي اشوف حد وان حد كلمني مارد عليه ...

انا يابنات مشكلتي ان مزاجي هو اللي متحكم فيني ... يعني مثلا اختي تسالني سؤال عادي جدا وارد عليها بطريقه كلش مب مقبوله ... والمشكله انها اختي الاكبر ... يعني مثلا تقولي تبين اسويلج شاي معاي عاد انا اكون جي متنرفزه اقولها لا مابي يعني تدرين اني ماشرب هالاشياء ومابي اشله تقولين لي يعني وجذي ... حاولت اتغير والله بس مافي فايده هاي طبعي من زمااااااااااان ...

وبصراحه صارلي فتره مرتاحه وطبيعيه مع شويت عصبيه :sad: لكن مع قبل يومين جاتني الحاله مره ثانيه ... يعني قمت احس اني مب راضيه عن نفسي واقول انا ماستاهل شي ولا حققت شي وجايبه المشاكل حق اهلي وحق نفسي ومامني فايده والله واكتأب واقعد اصيح واتم بروحي وان حد جا يكلمني مارد عليه وان رديت يستغربون والله مني ومن طريقتي يقولون هاي اشفيها :confused:

والله وبعدها احس بالذنب اقول حرام ليش كلمت اخوي العود جذي ولا ليش زفيت اختي الصغيره مع انها جايه تخفف علي ... وانا من النوع العنيد واللي راسه يابس يعني لو ماسويت اللي في بالي اتضااااااايق واعصب بطريقه مب طبيعيه =( وكله اصارخ .. انا مب قصدي والله بس انفعل ...

والحين بصراحه اكثر موضوع مأرقني ومزعجني ... اني ابي اضعف مع ان خواتي يقولونلي انتي مينونه .. جسمج عدل وجي ... وحتى امي تقولي حافظي على جسمج .. بس انا مب مقتنعه وابي انزل اكثر ... وضربني وسواس بعد الحين ... وصرت ماكل شي بالايام غير شويت فواكه والوم نفسي بعد لو كلت فواكه ... يعني مثلا طول اليوم ماكلت الا فواكه ومب وايد بعد وتحسفت بعد ماكلت وقمت الوم نفسي واقول ليش كلت والمفروض ماكنت اكل :sad: ... واشرب شاي عشان يخفف علي الآم الدوره =(

بنات اللي ابي اعرفه ... هل انا متعقده من نفسي صج ؟!؟ وهل احتاج لدكتور نفسي ؟!؟ ولا انا طبيعيه ؟
مع العلم انا من النوع الخجول وايد ... اللي استحي وايد بس وقت الجد اصير عصبيه وغير ... ونقطه ثانيه انا اخاف اكلم الناس يعني اخاف منهم ... حتى لو بكلم عامله في مطعم او شي اكون مرتبكه وخايفه ومابي اكلمها ... حتى خدامة بيتنا احس ماقدر اكلمها وجي ... تخيلتو الوضع شلون ... واحس اني ابي اسوي وايد اشياء بس انعدام الثقه في نفسي يخليني اتراجع وانحرم من وايد اشياء .. لدرجه اني صرت اشوف اي وحده جريئه احسدها والله اقول ياحيها ياليتني نفسها =( واقول هي شكلها عادي لكن واثقه من نفسها ومحد هامها ياليتني اصير جذي ... وبس .. مع العلم ان الكل يقول عني حلوه .. انا اقتنع شوي بس اقول لا .. يمكن الناس يقولون اشفيها هذي ولا هذي مب حلوه ولا يعلقون اي شي .. اخاف من تعليقات الناس والله حتى لو كانت بينهم وبين نفسهم ... ماحب انجرح .. لان اقل كلمه حتى لو كانت عاديه تاثر فيني وايد واتم افكر فيها واتعقد زياده ... عشان جي انا ماقدر اسوي شي جدام الناس واكون مرتبكه حتى لو شي بسيط ... يعني مثلا لو انا في عرس وخاطري ارقص مع البنات عالمسرح احس ماقدر والسبب ان الناس بيشوفوني ويمكن يعلقون او شي =(


وبعد في وايد ناس من اللي اتعامل معاهم يقولون اني مغروره وشايفه نفسي ... وانا والله لا مب جذي ولا شايفه نفسي بالعكس احب الخير للكل واحب اساعد الناس ... بس والله مادري ليش الناس ماتفهمني .. يعني مثلا رفيجتي تسولف معاي عالمسنجر تقولي امس كان عندنا عرس خالي اقولها صج مبروك وشسويتو ان شاء الله استانستو وبس وبعدين اسكت ... وهي مثلا تكون مصوره وتبي تراويني بس تشوفني ماسالتها عن هالاشياء ولا سالتها شكنتي لابسه وجي فتحسب اني مابي اعرف وان هالشي مايهمني فما توريني .. وانا والله مب قصدي جي ... انا ماقولها وماسالها لاني والله كل قصدي ان ماحرجها بسؤال او شي يمكن هي ماتبي تراويني ولا تبي تقولي فما قدر اقولها شي يحرجها ... يعني وايد اشياء جذي احطلها حساسيه بزياده وتصير مشاكل ... انا اخاف احرج حد او ادخل في شي مايخصني او ازعل حد من جي اخلي كلامي وتعاملي سطحي ...

وشي ثاني .. ادري عورت راسكم اسفه والله بس مالقيت افضفض الا اهني ... انا اذا شفت وحده اعرفها في مكان عام اسوي نفسي ماشوفها مب عشان شي لان مادري اذا اروح اسلم عليها ولا لا ... يمكن هي ماتبي فليش احرجها =(


انا من زمان اعاني جي ... وافكر وايد اتعالج عند دكتور... اشرايكم ؟!؟ واسفه لاني طولت عليكم =(