قصة ولادتي والحمد لله على كل حال

السلام عليكم ورحمة الله وبركاته
إليكم قصة ولادتي

أنا كنا عاطيني موعد 6/6
بس من الثقل والتعب اللي كان هالكني من السادس
كنت مقتنعة إني بقدم عن موعدي
وكنت أدعي أنه من بداية التاسع أولد
المهم دخلت التاسع
وكل يوم يمر تعتفس نفسيتي لأني ما ولدت وقمت آخذ إجازة عن الشغل من التعب ومن النفسية الزفت
وهلكت روحي من المشيطول التاسع

ومرت الأيام ولا ولدت إلى أن جى يوم 3/6
وقلت بتبخر يمكن تتسرع ولادتي
والليل عقب ما رجعت من المشي اتبخرت قبل لا أنام
والصبح قعدت بروح الشغل ويوم دخلت الحمام شفت بقعة دم استانست ةقلت إن شاء الله بداية الولادة وقلت لزوجي وقال الحمد لله وما راح الشغل قال بقعد أحاتيش هناك
وجاني ألم وحرارة مثل لين أول ما تنزل الدورة
وظل اللم وياي للعصر بعدين كل شي راح كأن شيء لم يكن

وحزنت وطلعت العصر مشيت والليل مشيت ورجعتي رديت تبخرت
يوم ثاني قمت بروح الدوام ونفس الشي شفت بقعة دم قلت ما يصير بروح المستشفى بجيك شالسالفة
ورحت السلمانية الطواريء وقالوا ليي عنق الرحم مغلق مو متوسع ولا سم
والتخطيط زين والدكتورة قالت لي بداية توسع
ورجعت البيت حزينة
المهم كان هدا اليوم 5/6
ويوم ثان رحت الشغل والشغل مستغربين كل من شافني انزهق ويقول سمجيبنش
وظليت إلى 9/6
وعقب صلاة الصبح حسيت ريح تاخدني ظهري تحت تظل فترة خميس دقايق وتروح وتكررت كذا مرة حسيت أنه قربت الولادة
بس ما قلت لزوجي
وكان عندي موعد عند الدكتورة رحت ولا قلت ليهم عن شي
ومن شافوا انه طاف موعدي ودوني للتخطيط
ويوم جت الدكتورة شافت الورقة اللا تقول ليي
اكو في طلق الجهاز يبين
هدي وحدة وهدي الثانية
وجيكت عنق الرحم قالت مبدي بيتوسع إن شاء الله الليلة انتين والدة
ورجعت البيت وظلت الريح تجي ورديت العصر مشيت
ومن المغرب عقب صلاة المغرب زاد الألم وقلت الفترة بين الألم والثاني
وقعدت في غرفتنا وزوجي عانى على ما نيم ولدي لأن متعود أني أنيمه وكل حين يسأله ويش فيها الماما وليش ما جت تنيمني
المهم ما نام اللا على ال12.30
وكان الألم يجيني كل عشر دقايق والقوة زادت ألم أسفل الظهر أحس أنه بيدوب عظمة الحوض
المهم عقب ما نام حمود أخذني زوجي ومرينا على أختي لأن طانت مصرة تحضر مع أنه ما كنت أبغي أحد يشوفني وأني أتألم
ورحنا التخصصي
ودخلوني وشافوني اللا يقولون 2 سم
وحطوا عليي السيلان وجابوا ليي الأكسجين والتخطيط شغال ويراقبون الطلق

وتم الألم يدبحني حتى الأكسجين ما أحسه يفيد
والممرضة والقابلة ويايي
والممرضة تهمز في ظهري
وأن يماني قادرة وكلما طالعت الساعة
أقول متى

وبعدين شافو الللا 4سم
وجت الدكتورة وقالت ليهم اعطوها ابرتين تخفف الألم
في العضل
وعطوني والله ول أحس اثروا في الألم
عقب ساعة ردوا شافوا اللا يقولون ليي 8سم وقالوا ليي قربتين
وعقب شوي جت الدكتورة وشافت اللا تقول ليي ألحين كمل التوسع 10 سم
بنفتح كيس الماي واتصلوا في الطواريء عشان يطرشون دكتور الأكقال وقالت لزوجي لأن كان يروح ويجي وجى زشجعني وقالت لي من يجي الطق ألحين ادفعي وفتحت كيس الماي
وقمت أدفع مع الطلق
لكن من كثر ما هلكت روحي مشي
من أدفع ويبين الراس وباقي شوي ويطلع تخلص طاقتي وما أقدر 3 إلى أربع مرات
وقالت ليي حاولي وطولي الدفعة وأني أقول ليها تعبت ما أقدر بموت اسحبوها بشي ولا طلعوها هلكت
بعدين قالت بس بسحبها وويا الطلقة من بين الراس سحبتها وطلعت فطوم القمرة ربي يحفظها ويسلمها الساعة4.40
الفجر
وسيدة ودوه لدكتور الأطفال وأخدوا يجي نص ساعة يفحصونها
وعلى فكرة زوجي من أول طلقة وبديت أدفع ما قدر يستحمل منظري وأني أتألم وطلع ورى الستارة
ومن ولدت جاني والباقي سرههههه

وراح وصورهم وهم يفحصون فطوم فيديو وبعدين جابوها ليي القمرة وحبيتها وردوا أخدوها
وتوتة توتة خلصت الحدوتة