قصة ولادتي

خواتي ادري انكم مشتاقين تسمعون قصة ولادتي بعد ما انتظرتوني اولد بفارغ الصبر
خاصاً اني حطمت الرقم القياسي في التأخير اسبوعين من الشهر العاشر
المهم سمعوا اللس صار
بتاريخ 8/6 يوم الجمعة كان ايجيني ألم خفيف واروح كل بين 10 دقايق بالضبط بس قلت هذي أكيد
انقباضات عادية شكلي ما بولد إلا اذا كملت الشهر العاشر وظل الألم وياي ليوم السبت ما تغير كل 10 دقايق
المهم واصلت بألم الخفيف الى المغرب قلت خلني بقوم بصلي وبقرأ سورة مريم ويا سبحان الله كلما قريت سورة مريم زاد الوجع علي ، المهم قلت بسوي العشه وبعشي بناتي يمكن في ولادة وبعد العشه قلت بريح اشوي لأني
حسيت بدوار راس توني بقوم وينزل على الماي بكثرة وقلت لزوجي خلاص الحين اتأكدت ولادة
والمسكين فرحان ايقول لي ما بغيتين يعني بتولدين مو مصدق الفقير المهم طلعنا من البيت بوديني المستشفى
قلت ليه ما بروح المستشفى الحين احس ان الألم اقدر استحمله يعني توني بالبدايه ودني الممشى خلني بمشي اشوي
بس للأسف ما رضى ايوديني وداني الى أمي وأخذناها المستشفى ويانا
بس تدرون من وصلت المستشفى نزلت على كميه ماي كبيرة وعلى طول كشفت على الممرضة جان اتقول لس
4 سم وجتني حالة احباط المهم خذوني غرفة الولادة وجت الدكتورة وكشفت وصرت 5 سم
المهم ومن الساعة 9 الىالساعة 11.30 زاد الألم بحيث اني ما اقدر استحمله واحس اني عندي برغبة بالدفع
الممرضة كشفت على قالت لي بعدش 5 سم ولا تحاولين تدفعين بتتعبين وبيتعب البيبي وبصير راس البيبي
شكلة طويل ، المهم اترجيتها ابغي ادفع بس ما خلتني بطحتني على جنب علشان ما ادفع وصارخت عليها وناديت الدكتورة
وقلت ليها ابغي ادفع احس اني بولد بس ما رضت الدكتورة وقلت ليها خلاص تعبت ابغي اتسون عملية ابغي ارتاح
بس عطتني ظهرها ومشت عني قالت لي ما في عملية انتي زينه والبيبي زين ما في داعي للعملية
قلت خلاص عليا وعلى أعدائي حاولت اعدل روحي وانبطحت على ظهري واخذت نفس عميق واول ما زاد
الألم بديت ادفع والممرضات يصارخون على مو راضين بس ظليت ادفع وما شفت الإ ثلاث ممرضات
يركضون عندي وايقولون لي يالله عصري عصري البيبي بيجي
والحمد لله كلها 10 دقايق ووصلت آمنه للدنيا وأحلى ما في الأمر اني خليتهم أمام الأمر الواقع ويا سبحان الله
انفتحت من 5سم الى 10 سم بسرعة وابشركم بشارة اني ما احتجت للشق وما سووا لي جراحة
والحمد لله على كل حال واقبال يارب كل الحوامل الله يسهل عليهم