ولدي مدمن .. في حل ؟؟

السلام عليكم


بنات بخبركم عن ولدي الكبير .. هو عمره 3 سنوات وشوي


المشكلة ان ولدي مدمن على شي اسمه توم & جيري ، يحب يطالعهم بشكل ما تتصورنه لدرجة انه يرفض الاكل ويرفض الطلعات علشانهم واذا بياكل ناخذ له اكله عند التلفزيون ..
ويمكن احنا عودناه اكثر لان ابوه يوم شافه يحب توم & جيري وايد قام واشترى له مجموعة CD اللي خلاه من يقعد من النوم الى لما ينام وهو يطالع :confused:

واللي مكبر المشكلة شيئين :

- ما يطالع التلفزيون الا وهو واقف جنب التلفزيون ويلصق فيه بعد وانا خايفة وايد على عيونه ..

- احنا عندنا تلفزيونين واحد بالصالة والثاني بغرفة النوم وهو ما يحب يطالع الا بغرفة النوم ومن يوم ما تعور واحنا غرفتنا معتدمة :sad: لانه ياكل فيها ويلعب فيها ويا عصاير انسكبت على سريرنا وعلى الارض هذا غير الاكل اللي منثر في الغرفة حتى ريحتها كل اكل :angry:

ومثل ما قلت لكم صايرة حياتنا وياه مخربطة لا ياكل معانا ويطلع الا بالغصب لان ما يصير نطلع ونخليه بروحه في البيت وحتى وقت النوم " مثل البارحة " قعد يبكي بشكل غير طبيعي ويبغي توم & جيري ومو راضي ينام حتى انا ما قدرت ودمعت عيني :sad: وزوجي اول شي حاول يكلمه ويفهمه ان الحين وقت النوم ولما ما نفع قام وعصب عليه لان صارت الساعه 12 ونص وهو يبكي ومو راضي يسكت او ينام ..

يا بنات ساعدوني .. مو عارفة شسوي معاه ؟؟ اليوم اول ما قعد بعد قالي ماما جوعان ويوم حضرت له شي ياكله قال يبغي يروح غرفتنا وطلب اني اشغل له توم & جيري وانا لاني كنت مشغولة وقتها اضطريت اوافقه واحطه له والحين كل ما اروح له احاول اشغله واخليه يقوم ما يرضى ، لا ويقولي ماما روحي برا :sad: