إلى امي في دار العجزه!

السلام عليكم .. هلا بكم جميعا.. في هالموضوع انقل لكم موضوع من مجلة
فواصل للكاتب رفيع الشأن ...فإليكم موضوعه المؤثر جدا ...



مأساة حصلت من فتره كان ضحية هذه المأساة ام وانا للاسف
اعرف ام هذا القبيح المتبجح ..رمى امه من كم شهر في دار العجزه
ضرب بكل الاعراف والقيم والرحمه عرض الحائط وحاولنا فيه كثيرا ان يرجع
انه للبيت لكنه رفض مرضاة لزوجته وخاصه ان امه في حاله يسئه ومحتاجه
له في هالوقت وحبيت اني اكتب رساله باسمه لامه بالنيابه عنه لعلها
تؤثر فيه اسود الوجه ..






إلى امي الحبيبه تحيه طيبه وبعد::

ابعث برسالتي هذه وانا على علم بأني لن اوفيك حقك لانه مهماعملنا اوتعبنا
في حقك فهو ناقص امي الحبيبه تعلمين لماذا انا مقصر في حقك؟
لاني هيس اربد(صدقت ) مانيب كفو تضحيتك وصبرك علي ,عطيتيني
وانت في رجا اني اصير رجال واكون لك سند يوم تضيق بك الدنيا طلعت عقب
تعبك ما اسوى نعالك الله يعز نعالك مني ويكرمها مني,
امي وربي اني مانيب كفو الحليب الي رضعتيني اياه والله يمه منيب كفو
ادنى شي في هالدنيا عندك يمه .
يمه انا قليل ادب مع انك ربيتيني احسن تربيه,امي انا كل الزين عندك يوم
اكون اشين خلق الله عند الناس ,تعبتي وضحيتي وسهرتي الليل بطوله في رجا راحتي
وقمت النهار من اوله في رجا خدمتي ويوم بغيت اتزوج يمه وزوجتيني
وساعدتيني على الزواج وبيعتك ماوراك ودونك عشان توفرين لي المهر
وترحميني من الدين والسلف وقطة الوجه والحاجه للناس بيعتك هدومك
يابعد روحي عشان البس انا احسن الهدوم وبيعتك فرشك عشان افرش انا احسن
الفرش لكن طلعت قليل خاتمه
بالآخر فضلت الزوجه عليك وجالس انا ووجهي اتميلح عندها ابغى رضاها
وتاركك بالاسابيع ما اسأل عنك ويوم تقول تبي كذا قلت لبيه ويوم تقولين
بعد طلعة الروح والمستحي يا امك ابي كذا قلت يمه ايش قلتي ما سمعت
جعلني الصقه (آمين )
امي يامن هلت دموعها يوم مرضت وبللت جبهتي من غرقها يامن سهرت جفونها
يوم مرضت يامن شغلتها ثلاثين عام ماذكرتها فيها ولا عام ,يامن تضيق لاضاقت
بي الوسيعه ويوم تضيقين انتي تكتمين ضيقتك خوف اتكدر واضيق وتجي
الضيقه عندك وتروح وانتي في رجا الرحمن يفكها وانا في غمرة
الفرح بين احضان المره تاركك بين جدران القهر تذوقين مرارة ارذل العمر
امي تجي الايام وتروح مانذكر فضلك بشي ويوم تزعلين تطوف ايام مانرضيك
وكن حنا نقول في خاطرنا امنا مردها بترضى ويوم تزعل المره تربح محلات
الذهب لا بارك الله فيني (آمين) امي حلاوة الروح تنبعث منك يوم انا
اكون في نشوةالفرح وتعاسة الروح تنبعث مني يوم تكون المره زعلانه
(جعلها ماترضى) امي ادري انه لو تهل دمعه من عيوني تهل دموع عينك
في رجا تلحق دموع عيني لكن من قباحتي اني قبيح معك اجمل ما اكون مع
زوجتي (نذل)مع ان المره ماطلبت مني اني اكون بهالنذاله وعند المره
ان العاقل خصيم نفسه ,طيب وين العقل يمه وانا اسوي بك كذا تدرين يمه؟
ليش اسوى بك كذا؟لاني قليل اصل يمه اخاف اوصف نفسي بالحقير اظلم الحقراء
لان الحقير حقير مع الناس ارحم مايكون مع امه انا مدري وش اسمي عمري
امي ادري لو بجيك واقول سامحيني بتسامحيني لكن السؤال يمه
انا استاهل رضاك؟ادري في حشاشة جوفك تقولين لو ماشالك القلب تشيلك
عيني وملحفك جفوني يانور عيني يالي لو جاك المرض قلت ياليته فيني
لكن يمه ظنك بصير رجال واقوم بجزء من مليون جزء من فضلك يمه هذا
سؤال مايجاوب عليه غير رجال اثمرت فيه تربيتك ويرده اصله الطيب
الي للاسف ماهوب فيني يمه(صدقت) امي ادري انك جنتي وناري وادري
ان رضاك من رضا الرحمن وغضبك من غضبه لكن شفتي قوتي يمه متبجح
ومتجبر حتى على طاعة رب العالمين ,انكل فيه ولكنه بيجي يوم بقابل
فيه العزيز الشديد سبحانه بيحاسبني على مثقال ذره فما بالك
بانتهاك حمرته ..امي راحتك دقايق وعذابك معي شهور يوم ترتاحين تكونين
في هم يوم ويوم اضيق تركبك هموم الدنيا كلها ..وادري يمه اني لو بجحدك
العمر كله واجي على فراش الموت اقول يمه سامحيني بتقولين عمري مازعلت
منك يانظر عيني عمري مازعلت منك يابوي عشان اسامحك.امي مدري يمديني
الحق عمري وارجع لك وارجع لحضنك الصادق الدافي الحنون ولا الدنيا بتاخذ
معي دورها في نكران جميلك وجحودك .. امي تكفين لاتخليني ادري انك ترفعين
كف الدعا لي ليل ونهار لاكليتي ولا مليتي لكن ادعي لي بحسن الخاتمه
الي ماهيب باينه من عصياني ..لانه من حبه ربه وفقه بطاعته وطاعة الوالدين
وكيف بيحبني وانا مغضبه فيك؟امي انا في رجا الله ثم في رجاك تسامحيني
تكفين يمه سامحيني احب رجلك سامحيني قبل لا اضيع مع انه ماعندي ادنى شك لكن
ادعي الله يردني لك قبل فوات الاوان لانه كنوز الدنيا ماتعوضني لحظه
اكون بها بعيد عن رضاك امي وربي لو اجلس اذكر فضلك بينشف ريقي وبتذبل
جفوني وبيظهر الشيب في راسي وانا للحين ماذكرت طفولتي وتعذيبي لك .. امي تكفين
سامحيني تكفين قبل لا اصير في قبر لا انيس ولا ونيس غير عملي الصالح والي بعيد
مني وانتي غاضبه علي .امي فدوتك الزوجه والاولاد والمال ما غباني يمه
رحت للزايل وتركت الدايم وربي لو اقطع لحم اولادي لك طعام ماوفيتك جزء من فضلك
لكن وش اقول غير اني قليل اصل مايثمر فيني حليبك الي قطره منه في الحقيقه هو الحياة
وهو العطاء وهو كل شي سبحان الله جعل حليبك في صدرك وهونفسه الي يضمني
يوم تضيق بي الصدور .
اللهم اني اسئلك بكل اسم هو لك سميت به نفسك ان تغفر لنا زلاتنا وان ترحمنا
برحمتك اللهم من طغى بوالدين فرده ردا جميلا او خذه اخذ عزيز مقتدر
اللهم من اراد بوالديه خيرا فبارك له ووسع له في ماله واولاده وابسط له الدنيا
وارحمه بالآخره ,واللهم من طغى بهم فارحمهم برحمتك تحول به بينه وبين طغيانه
وتريه من عجائب قدرتك ماتحول به بينه وبين عقوقه ,اللهم اني اسئلك
الفضل كله واعوذ بك من العقوق حتى قليله واسئلك حسن بر متبوع بحسن خاتمه
واعوذ بك من عقوق متبوع بسوء عاقبه .اللهم انك رحيم بعبادك فارحمنا ووالدينا
برحمتك رحمة تحول بها دون عقابك وصلي اللهم على محمد وعلى آله وصحبه وسلم ...



بنـ الرياض ـوتة..