تجربتي مع مها خان - منتديات عروس

د

داااانه

عروس مشاركة

11-05-2007 | 10:12 PM

السلام عليكم

اليوم يغيت اشارككم بتجربتي مع مها خان ... فيه حد مايعرف مها خان؟

مها خان مصممة العبي الاماراتيه من دبي ...

كبدايه دعايه و يوله و شو مديح وكلالالالالالالام! يخلي الواحد ينغر

قررت في يوم اسير افصل ...و صار... عقبها باسبوعين سوولي تلفون من صوبها و تعالي استلمي!

قلت انا خلاص العباة جاهزه .. و كل يومين يسوولي تلفون تعالي و تعالي

عرضو علي انه يطرشونها لي عن طريق ارامكس و قلت انا شو هالخدمه الحلوة و استلمت العبي
وكنت مستانسه انه استلمتها قبل الكل ... لكن للاسف طلعت القياسات ابـــــــــــــــدا مب لي

اتصلت ف مها و عرضت عليها المشكله ... كلمتني بكل برود و بدون اسلوب انه "تفضلي عندنا" عشان نعدلها

تعنيت و وصلتلها البيت مع القياس اللي يبته اول مره ... و اعتذرتلي و قالو بيفصلولي من اول و يديد

طبعا التفصيل يباله اسبوعين غير!

ف نفس الوقت استلمنا عباة مرت اخوي وكنا واثقين انه القياسات بتكون مضبوطة

لكن للاسف ...

اهني طرشنالها العباة مع القياس عن طريق ارامكس و للاسف تم الغرض اسبوعين ف مكتب ارامكس التابع لدبي بدون اسلاتم

مع انها ترد على مرت اخوي تقولها ماشي طلبيه!

تقول انها توصل ارامكس وتسالهم طلبية باسم "فلان"!!!! الطلبية باسم المرسل اليه مب المرسل (بكسر السين)!!!

واخير بعد معــــــــــــــــــانــــــــــــــــــــــاه و متابعه من صوبنا تم استلام العباه من مكتب ارامكس

عدلو العبي ف 3 ايام و طرشوها لنا عن طريق ارامكس ...
للاسف للمره الثانيه القياسات مب مضبوطه لي و لمرت اخوي!!! و ياخسارة البيزات المدفوعه

و هذه تجرتي السيئه مع مها خان

همسة: مجموع المبلغ المدفوع لها 15 الف درهم! على عبي مب قياساتنا!

ح

حوره

عروس مشاركة

13-05-2007 | 10:48 PM

السلام عليكم

الله يعطيج العافيه والله اشكثر يمدحونها وعن عباياتها والله اعرف خياط هندي يسوي عبي احلى عن عبيهم سيري خذي لج عباه وفصليها وفي واحد هندي يسوي شغل مغربي اوكي

ودمتي بود

j

juliet&rambo

عروس رائعة

13-05-2007 | 11:01 PM

هيه صدقج.. انا سويت لي عباه ب1200 درهم طلعت زباااااااااااااااااااااااااااله في اللبس

والخيوط اتنسل ... ولا شفت شراتها في بو هيل .. مت م الغصه .. وقررت اني ما اتعامل وياها موليه..

انصحج بمحل في الشارجه يجنننننننننننن .. والحرمه راعيت المحل واااااااااايد حبوبه ..

وسوت لي عبي ماشاءالله ذوق ... بسعر ممتاز اسم المحل "المرسى" في مركز عهود.. الشارجه

بالتوفيق غناتي .. وربي يعوض عليكم..

w

wispy girl

مشرفة سابقة

14-05-2007 | 04:47 AM

ماعندي تعليق غير الله يهدي بناتنا يارب:)

a

awaw

عروس نشيطة

14-05-2007 | 06:55 AM

الله يهديكم تصرفون مبالغ مبالغه في عباه
أختي همسه في اذنك فكري مليون مره قبل صرف مبلغ كبير شرات هذا المبلغ
يعني موزعلانه على السعر زعلانه على القياسات
في كثير من المحلات تبيع و تفصل عبي وايد حلوه
و لو عندج افكار يطبقونها لج.

مع تحياتي

ج

جرناسه

عروس نشيطة

14-05-2007 | 07:16 AM

الله يعينج - صدق البنات من يسموعون وحده خلاص اتفصل واشتهرت خلاص على طول يسوون عندها
بس عن تجربتي انا معاها ابدا ماكانت حلوة
كنت مفصله عندها وقلتلها ليش مقاساتج كلها اليد ضيجه وايد قالتلي هاي هي مقاساتنا ونحن نمشي عليها
بعدين عادي قلت يالله هاي حق المناسبات خلها تكون ضيجه
ويوم خلصت العباه اتأخرت عليها مده قصيره يعني ما استلمتها بالتاريخ المحدد
الله يشهد انها مده قصيره اتصلت وقالت اذا ما بتستلمينها بتكون لشخص ثاني هذا وانا دافعه عربون
يعني الواحد يوم يشتهر يكبر راسه
رغم ان الحين موديلاتها متوافره في كل مكان والحمد الله لقيت احلى من موديلاتها وكل ما نيلس مع البنات نسأل عنها محد يمدح اسلوبها ولا حتى معاملتها

m

miss pinky

عروس نشيطة

14-05-2007 | 07:55 AM

مرحبا بنيات ... بصاحه كلامكم صدق

انا بعد اتعاملت معاها فصلت لي عباتين حق زهبتي و طلع الاجمالي 2500
و لما استلمت العبي احس اني ماحب البسهم !!!! قياساتها ابدا مش حلوه ... و حتى قطعة الشيله الي تستخدمها الساري ينكمش !!! مع اني ما غسلتها و كويتها بخار... بس مادري شو السالفه
الله يهديهم مع ان عبيها واااايد شكلها حلو ... بس للاسف المقاسات ما تنضبط عندها

ف

فيافي2005

عروس مشاركة

14-05-2007 | 08:38 AM

مب مجبورين تفصلون عندها شوفوا غيرها وتراها مب بنت البلاد باكستانيه يعنى بنات البلاد مسحبل تسوى جيه وتتعامل بالطريقه هاى مهما كان و فلوسكم هيه اللى كبرت راسها والسياره الاخر موديل من بيزاتكم شارتنها

د

داااانه

عروس مشاركة

14-05-2007 | 02:34 PM

حوره.....................مشكوره حبيبتي والله يعطيج العافيه

د

داااانه

عروس مشاركة

14-05-2007 | 04:11 PM

juliet& rambo...................... ان شاءالله اجربه واعطيج رايي
انسه فله ......................ويهديج ويانا ان شاءالله
awaw.............لا اختي زعلانه على القياسات لان العباه عايبتني ف اكيد بدفع فيها ومشكورهاختي

جرناسه .........................مشكوره عالمرور
miss pinky...................صدق اختي القياسات ابدا مش مضبوطه وقطع الشيل لا الساري ولا دجى الليل
فيافي2005....................اسعدني مرورج وتعليقج على موضوعي

d

donya2007

عروس جديدة

20-05-2007 | 07:56 AM

السلام عليكم
لو سمحتم أبغي رقم مها خان اذا حد عنده رقمها

ضروري

ت

تــوته

عروس جديدة

20-05-2007 | 08:02 AM

اممممممم والله الواحد يخاااف يغاامر الله يعين

ن

نثيه

عروس مشاركة

20-05-2007 | 01:49 PM

مرحبا اختي دانه ياهلا والله

بصراحه كلامج صحيح 100% و فعلا لا تعامل و لا أسلوب و لا شي
صدق كبر راسها

نست ان هالعبي الفاشله هي اللي كبرت بيتها و خلتها تركب احسن سيايير
الحمدلله والشكر الواحد يوم يطيح على نعمه المفروظ يحمد ربه

و ان الله يحب ان عمل احدكم عملا ان يتقنه
لاكن لا قياسات ولا خامات ولا شي

الله يهديها صدق بتقطع رزقها بيدها
بس هي لازم تعرف ان في غيرها مليووووووووووون حرمه تصمم عبي احلى عن عبيها
و اهم شي طبعا الاسلوب و التعامل مع الزبونه بشكل يرضيها يخليها تروح تمدحها عند الكل

donya2007

بصراحه مادري على أي أساس تبغين رقمها هههههههههههههه

تحياتي للكل

d

donya2007

عروس جديدة

21-05-2007 | 08:42 AM

dear i don't need the number for me ...some of my friends need it so please send it to me if u have it

please

ب

بنت بو خليفه

عروس نشيطة

24-05-2007 | 05:37 PM

مرحبا اختي..
بخصوص المصممة مها .. الصراحة انا متفاجئه من كلامج عن مها وانا الصراحه اتعامل معاها تقريبن من اول مابدت وعمري لين اليوم ماشفت منها شي قياسات مضبوطه على الاخر موديلات في قمة الاناقة والروعة ودليل نجاحها تقليد محلات وايده في بوهيل لعبيها..
بخصوص انه شيلها مش من قماشات دجى الليل او الساري انا اقولكم انتوا غلط واقمشتها اصلية 100% ومافيها شي ينعاب..
اختلاف الري لايفسد للود قضية..

ا

الوتر المنسي

عروس جديدة

28-06-2007 | 03:37 PM

الغاليه رقم مها خان ممنوع وضع الارقام على العام

ا

ام_منال

عروس جديدة

30-06-2007 | 12:52 AM

الله يهديكم بس انا سرت معرض العروس وشفت ازياءها والله ما يدخلون الخاطر بس الله كريم وكل شي يتعوض الغاليه والله يوفقج

u

umnasser

عروس متألقة

01-07-2007 | 03:12 AM

انا سبق و كتبت تجربتي وياها ،، ما عندهم امانه في الشغل ،، يعني الي تشوفينه شي و التسليم شي ثاني ،، و يوم تكلمينها ترد عليج كأنج تشحتين منها او طالبتنها شي ،،، و جنها نست اني من الكستمر الي خربت لهم ،، ردت ايام العيد طرشت مسج دعايه حق العيد العود،، جان ارد عليها و اذكرها بالسالفه ، ،، جان تقولي انزين اكيد الرساله يتج بالغلط !!!ّ!!!!!!!!!!!!!!!!!!!!!!!!!!!!!!!!!!!!!!!!!!!!!

ما شي اسلوب!!!

M

M!sS_CuTeYaH

عروس نشيطة

01-07-2007 | 03:58 AM

والله ماعندكم سالفه
عبايتين ب15 الف
انا الحمدلله
اختي مصممه بس للحين هب معرفه وايد
و تصمم عبي و فساتين اعرس و فساتين سهرات
و انا ماعلي غير اني انقي الموديل او هي تسويه على كيفها
و العباه عندها اذا كلش كلش كشخه ماتتعدى ال3000
و المقاسات اذا طلعت مب مضبوطه لكم اللي تبونه خخخخخخخخخخ
اسوي دعايه انا شوو؟؟
انا عني ماجربتها و بعد شي مصممه اسمها هدى والله عباياتها مسسسسسسسسخره
جنه فستان رقاصه مب عباه

ط

طيوبه

عروس رائعة

25-07-2008 | 01:21 PM

اوافقج الراي 100 % لا اسلوب ولا معاملة

والسنه اللي فاتت سويت عنها عبايه ب1200 والسنه هذي عبايتها صارت اسعارها مبالغ فيها ولما قلت لها

قالت لي انا ماسوي عبي 1200 !!

والصراحه صار شغلها مايسوي

وفعلا الاسلوب نعمه