حبيباتي ............ لأني أعتبركم مثل أخواتي .. بكون صريحة معكم .. وأفضفض شوي ..
زوجي من النوع الصامت جداً ... وللحين مو متأقلم مع حياة الزوجية ... يعني مفكر نفسه للحين عزابي ..:qaq:
مع إنا متزوجين من فتررررررررررررررة طويلة .. لا يغركم عشان ما في عندنا غير بنت ههههههه
المهم خليته على راحته تقريباً 3 أسابيع ما قربت منه ولا أحتكيت فيه .. وعشنا كأننا بيت عزابيه .:dd: .
ولأنه ما تأثر وكان الوضع عااادي عنده ... قلت بسوي حركة جديدة يمكن يفرح فيها أو حتى يتفاعل معي ..
هو بالعادة يطلع من العصر ويرجع 10 ونص أو 11 بالليل ...
أول ما طلع بالعصر أخذت دش مطول .... وطلعت نشفت شعري ... وعجنت عشان أسوي عشاء خفيف ... لأنه من مدة رافض يتعشى ... يبي يحافظ على جسمه لأنه دايم بالصيف يسافر برى هو ومجموعة من أصحابه ...
المهم .. صليت المغرب ولفيت شعري بالبكرات والسيروم ... وعلى بالي بعد ما أخلص لف شعري برسل له رساله أكتب فيها :
( خطيبي الغالي أكيد مشتاق لي ونفسك تشوفني كثر ما أنا مشتاقة لك .. وتبي ناخذ راحتنا بالكلام .. عشان كذا أبي أقولك ..أهلي اليوم بيزورون أختي وما راح يرجوا قبل الساعة 12 وأول ما يطلعوا راح أدق عليك عشان تجي على طووول .. )):smile:
مع العلم أنه عايشين ببيت لوحدنا وأهلي وأهله مو بنفس مدينتنا ... بس يعني حررررركة ..
وتعالوا تشوفون وش حصل ... وأنا ألف آخر بكرتين بشعري رجع ... مو معقولة بعد المغرب يرجع البيت ... ما عمره سواها بس عاااد حظي المنيل على عينه ...
ومع ذلك ما استسلمت قلت بكمل الخطة ... طبعاً هو رجع لأنه في مباراة ويبي يشوفها بـ art
رحت المطبخ سويت بيتزا ووردات الجوري وكعكات السميد وبعد ما خلصت طلعتها تبرد ورحت صلحت مكياج كامل ..... طلعت عروووسه هههههههههههههههههه
وكل الفترة هذي ما شافني لأنه بالمجلس يتابع .... وأنا خلصت الميكب .. رجعت المطبخ سويت شاي وجهزت صحون التقديم وفناجين وبراد تقديم الضيوف ...وبعدها لبست بنطلون جنز وبلوزة وردي غامق مع إكسسوار كامل وتعطرت بعطر جابه لي من فترة بـ 490 ريحته تجنن (( وكانت مفاجئة إنه جاب لي هدية لأنه حتى الهدايا ما يحبها ... بس لأني كتبت طلبات البيت وكتبت تحتها عطر إسكادا الجديد ... وكتبت أدري إنه مستحيل تجيبه بس حبيت أستهبل يمكن حن علي وجاب عطر على ذوقه ))وفكيت شعري طلعت شيء >>>> من يشهد للعروسه ههههه
وأول ما خلصت كل شغلي كتبت له ورقة فيها :
حبيبي كنت متوقعه ما ترجع إلا متأخر مثل كل يوم وكنت برسلك رسالة تقول :
خطيبي الغالي أكيد مشتاق لي ونفسك تشوفني كثر ما أنا مشتاقة لك .. وتبي ناخذ راحتنا بالكلام .. عشان كذا أبي أقولك ..أهلي اليوم بيزورون أختي وما راح يرجوا قبل الساعة 12 وأول ما يطلعوا راح أدق عليك عشان تجي على طووول .. )) ... بس أنت رجعت وخربت المفاجأة ومع كذا راح أكمل الليلة وأتمنى إنك تسايرني والحين بعد ما تقرأ رسالتي أبيك تلبس كأنك راح تقابل خطيبتك من جد وتجي للمجلس ....وحطيت الورقة عالسرير عشان أول ما يدخل يقرأها ..
طبعاً قبل ما البس نومت بنتي لأني منعتها لاتنام بعد المغرب عشان تنام الساعة 10 أو 11 المهم نامت تقريباً 11 إلا ربع وترك الشغالة معها ولبست ولما كنت أكتب الرسالة سمعته يقفل التلفزيون وعرفت إنه بيدخل ينام .... حطيت الورقة عالسرير وطلعت بسرعة ... ولما دخل الحمام أكرمكم الله يغسل أسنانه ويستعد للنوم (( على غير عادته أول مرة ينام 11 )) رحت أنا والشغالة بسرعة حطينا كنبة كبيرة بالمجلس وأبجورات حمراء وزي كذا ... المهم طلع من الحمام ولمحنا نشيل الكنبة للمجلس ..... وبعدها قفلنا الباب وكملنا التجهيز وراحت الشغالة عند بنتي ... أنتظرته شوي ما جاء قلت اكيد يلبس وبعد ما طول رحت فتحت الباب لقيته مقفل النور ونااااااااااااااااااااااااايم :cry:
ههههههههههههههههههههههه آآآآآآآآآه يا بطني هههههههههههههههه
قلت له قرأت الرسالة قال إيوة بس أنا ما أحب الحركات هذي وبعدين قدام الشغالة ترى حتى هي إنسانه وماله داعي تسوي كذا قلت طيب ولو ما عندنا شغالة عادي أسوي حركات زي كذا قال لا ما احبها ... قلت طيب عالإقل طالع فيه شوف لبسي شوف شكلي قال إذا تبين تجلسين معي أو تكلميني تعالي أجلسي هنا ... يعني بغرفة النوم ... والنور مقفل وهو مغمض عيونه حتى وهو يكلمني ............. ههههههههههههه تقولون يكلم وحش :angry:
قلت له ابي أحرك علاقتنا شوي مليت من الصمت والتجاهل .... المهم طفشت وطلعت ودخلت المطبخ عشان أتعشى .... لحقتني الشغالة ... وترى أعتبرها مربية لبنتي وما أحب أسميها شغالة لأنها عاشت فترة طويلة بالسعودية كمقيمة وليس كعاملة وحتى هي قصتها قصة تصلح فيلم ... وأحيان أعتبرها صديقة تنصحني بخبرتها في الحياة .... :flower:
وقالت إيش فيك قلت لها ما رضى يجي قالت خلاص هو ما رضى يطلع أنتي روحي له .. لا تعطينه فرصة يبتعد عنك أو يتحجج إنك أنتي اللي مقصرة معه ... خليك انتي الفاهمة وقلبك الكبير ...
رجعت عنده وشغلت السهارية(( لمبة صغيرة حمراء )) ما رضت تشتغل ... رحت غيرت اللمبة وشغلتها أحترقت ههههههههههههههه قلت الليلة باينة من أولها ... وأخذت أبجورة وشغلتها عشان أتكلم معه ........... وناقشته شوي بعلاقتنا وإن طريقة حياتنا كلها خطأ ولازم تتغير ... ونصير زي إي عائلة ثانية ... نجلس مع بعض نتكلم نناقش أمور حياتنا .... وقال إن شاء الله ... وتكلمنا شوي .. بعدين تركته ينام عشان ما يتأخر عن دوامه الصبح ... وطلعت تعشيت ونمت مع بنتي بغرفة ثانية ..
ههههههههههههههه جت الحزينة تفرح ما لقت لها مطرح هههههههههههههههه
ومع كذا دائماً أضحك وأسولف للكل والجميع فاكرني سعيدة ومبسوطة ... وعاااااااااادي عندي
وفعلاً .... أحيان أفكر الحياة مجرد طريق عبور والآخره هي مقر الإقامة عشان كذا عادي لو تعذبت أو أنقهرت أو أنحرمت بالدنيا لأني أرجو حسن الجزاء والثواب والسعادة بالآخره .. وأملي بالله كبييييييييييييييييييييييييييييييييييييييييييييييير .. اللهم إملأ قلبي بحبك وأرزقني خيراً من عندك ..
أكيد كثير منكم بينتقدني عشان علاقتي بالشغالة مو علاقة رئيس ومرؤوس بل علاقة صداقة وأخوة في الله ... بس هي كانت عايشة بالسعودية ومتزوجة هنا وكان عندها شغالة وبيت ملك بس حصل خلافات بينها وبين زوجها وسافرت ولأنها تبي تشوف عيالها بإي طريقة أضطرت تجي المملكة بتأشيرة خادمة ... عشان تتطمن عليهم بين الحين والآخر .. وهي كبيرة وملتزمة ودائمة المحافظة على الصلوات وقيام الليل وصيام التطوع وقراءة القرآن عشان كذا أرتحت لها ..:clap:
ههههههههههههه شو رايكم بالحركة ... مو حلوة للأزواج اللي يتقبلون الحركات الرومنسية
يعني ترسلي الرسالة وبعدها بساعة تتصلي أو ترسلي تخبريه إن أهلك طلعوا ولما يجي تكوني مقفلة الباب بالمفتاح عشان يدق جرس وتقولي مين وتفتحي وأنتي مستحية كأنه فعلاً خطيبك .. وتدخليه المجلس وتسأليه وش يشرب بااارد ـ قعوة عربي أو تركي أو شاي طبعاً مع الحلى أو المعجنات ... وتتكلموا في خطبتكم وأول مرة شفتوا بعض وشوقكم لبعض عند سفره أو تأخره عن الزيارة وزي كذا ولما يقرب منك أو يسوي شيء جرئ تقولي لاا وتخجلي وتتلعثمي كأنك من جد مخطوبة لسى وبعد فترة تقولي يالله خلاص صار لازم تمشي أخاف أهلي يرجعون ويشوفونك هنا وحركات زي كذا .....
ههههههههههه قصة قصيرة هذي مو بفكرة رومنسية ... أخاف ينقلوها لركن القصص هههههه
سوري عالإطالة ... وأرجو إنها تفيدكم ..... وأتمنى الكل يدعو لي زوجي يصير رومنسي ..... :shy:
أقص أصبعي الصغيرة إذا صااااااااااااااااااااار :dd: :mad2: :dd: