عطوني حل لمشكلتي مع زوجي

al7aboba:
اختي انصحج انج تحاولين ما تييبين اعيال لين ما تستقر العلاقه بينج وبين زوجج
لان اليهال مالهم ذنب اييون في بيت فيه ام وابو مايكلمون بعض ولا يهتمون في بعض
ترى اليهال وايد يتأثرون بسرعه

Anamel:


مشكلتي انه زوجي ما عنده وقت لي ابدا ابدا
دايما مشغول اما بالدوام او بالنادي او بالشيشة
وحتى لما يكون في البيت ما احس بوجوده لانه يكون يلعب على الكمبيوتر بالساعات وطبعا يتجاهلني تماما
احس انه ما يتقرب مني الا وقت النوم يعني اذا يبغي مني شي
بس اذا ما في شي ما يقترب مني نهائيا وحتى ينام ويعطيني ظهره
اذا طلبت منه انه يبوسني او يحضني او انه نتكلم على الاقل يتضايق كثيرا ويؤنبني على طلباتي الكثيرة
يعني انا انام معاه حتى لو كنت تعبانه او ما ابغي بس احاول اني ارضيه بس لما اطلب منه شويه حنان يبخل علي حتى بها الشي لدرجة اني اندم واحلف اني ما اطلب منه اي شي ابدا ابدا
ابدا ما يطلعني لا السوق ولا اي مشوار الا نادرا وبعد الحاح شديد مني
ولما نطلع يصير نكدي جدا ويبدأ يتحرطم ويتشكى على اي سبب وعلى اي شي
ولما احاول اني اكلمه او افتح معاه اي موضوع يسكت تماما واحس وكاني اكلم نفسي
او يرد علي باني كثيرة الكلام وانه ما عنده اي تعليق على موضوعي وباختصار شديد

احس اني مش متزوجة بالعكس احس بالوحدة اكثر من الاول
لاني ما اتكلم مع صديقاتي وايد وهو ما يخليني اطلع معاهم ابدا
يعني من البيت للدوام لبيت امي او جدتي بس
هذه حياتي المملة

احاول اني اضفي جو من المرح على حياتنا بس ما في فايدة
لما اقوله شو رايك نطلع يبوز ويزعل ويطلع لي الف مشكله ومشكله
طيب شو اسوي هذا الشي الوحيد اللي ممكن يخلينا انغير الجو يعني نطلع وندور ونستانس وبالمرة نكون مع بعض

صرت اكره اني اطلع مع زوجي لانه طول الوقت يكون مبوز وزعلان ويتشكى ويحاول انه ينتقدني على اي شي وكل شي
علما باني احاول بكل جهودي اني ما اقصر معاه في اي شي
بس بعد ما في فايدة

احيانا اقول بتطلق وبرجع لبيت اهلي ليش اعيش معاه وهو ما يباني الا لوقت النوم
بس اراجع نفسي واتذكر انه الوالد مريض بالقلب و انه امي مريضة بالضغط وانهم ما راح يستحملون صدمة طلاقي!!!

اكثر من مرة جلست مع زوجي وفاتحته في الموضوع وكلمته ابصراحة شديدة عن اهماله لي
وعن شعوري بالوحدة وعن احتمال انحرافي اشوفه يتاثر شوي وبعدين يرجع يلعب على الكمبيوتر
وكاني ما اتكلمت ولا قلت له اي شي بالعكس يرجع يتجاهلي في الاسابيع التاليه واكثر عن الاول

قبل الزواج كان انسان ثاني يقولي انه ما راح يتركني ولا لحظة وراح نطلع مع بعض للسوق ولكل مكان وكان يهتم فيني ويكلمني دايما ويسمعني كنا مثل الاصدقاء بس الحين احس انه هو ما يدري عني ولا عنده خبر عن حياتي وعن مشاعري و عن اللي يصير واللي ما يصير معاي


احس بالوحدة الشديدة وبشكل لا يطاق .... اما اني ارجع لحياتي اللي كنت عايشتنها قبل الزواج يعني ارجع لصديقاتي وشلتنا الحبيبة واكمل دراستي يعني بعد الدوام اروح ادرس يمكن اشغل نفسي شوي عن الشعور بالوحدة او اني انحرف واتقبل كل واحد يحاول يتقرب مني !!!

ارجو النصيحة من كل وحدة تدخل وتقرا موضوعي