قصــة ولادتي بعبــــــــــــدالله :)

السلام عليكم ورحمه الله وبركاته :shy: :shy:

واخيرا رقد الوحش خخخ انا وابوه سميناه الوحش ... اليوم بحازيكم بقصه ولادتى .. واللى اتمنى من كل قلبي ان ولا وحده اتمر فيها ... بس ما اقول غير الحمدالله على عطية ربي .. وكم يسوى يوم اشوف ويه ولدى واسمعه يناغي ...فديت اليهال كلهم والله

موعدي كان في 23\2..هذا على حسب مستشفى دبي .. ودكتورتى الخاصه عطتنى 18\2.. والسونار 3\2.. واصح موعد كان 18 لانى ربيت في تاريخ 17..
من بدايه الشهر التاسع ماادري شو صار فينى مووول ماارقد.. سهر للفجر واللى زاد الطين بله ان انا و ريلي خذنا اجازه من دواماتنا تحسبا لاي طاري ع قولته وسهر وافلام وسوالف للصبح .. المهم كان الاربعاء وكنت تعبانه من المشي ...ريلي الله ايسامحه مشانى بالغصب ساعه وربع ومشي سريع جنى في ماراثون ...يوم صارت الساعه 12 قررت انى ارقد .. بس منو يقول ارقد .. صار الخميس والساعه اربع الفجر اتجلب واطالع الساعه ..وشكلي رقدت اربع ونص .. وانتبهت عالساعه 7 الم بسيط ولا ينذكر ...رجعت رقدت للساعه 9 ..نشيت ابا الحمام الله ايعزكم وشفت دم .... قلت لاه يا بنت صار الجد وشكلي بربي اليوم ...وعلى طووول سرت وعيت ريلي وسبحت وجهزت نفسي ...قالي ريلي بدال ما اسير المستشفى وايلعوزنى خل انسير انشيك عند دكتورتي الللى اراجع عندها ...يا خبير انته يا بو الشباب خخخ.. المهم سرنا ودخلت وخبرتها فالسالفه .. قالت بفحص ويالللللله من اهنا بدا الشي اللى جد جد سوالى ععقده فحياتي .. فحصت اشقد ايعور  قالتلى 2سم ..
واذكرت سوالف البنات فالمنتدى وقلت الحمدالله 2سم ومااحس باى شي ولا الم بالمره ..عيل اكيد ولادتى بتكون سهله ...خخخ حليلي ماادري اشو يتريانى
ريلي عاد اللى امسوى نفسه خبير قال خل انسير نمشي في مول عسب ايساعدنى المشي .. وسرنا السنشوري مول وبعدها مشيت فكارفور بدون هدف .. ومن بعدها سرنا الستى ونفس الشي مشينا ومشينا ...وبدا الالم اشوى اشوى .. وخصوصا فظهري ...صارت الساعه 4ونص وقلت حق ريلي خلالاص موول مااروم اكمل مشي ... وع طول سرنا المستشفى ..وافففففف نفس الشي يات الدكتورة وقالت فحص ... ياربي كرهت الكلمه حتى ... وفحصت .. على بالي بتقول 7 والا 8 قالت 2سم !!!!! انا اهنا بديت انحبط .. لاحظوا بديت .. يعنى ما انحبطت لان توه الناس ...وقالت انتى لانج بجر توه الناس ع ولادتج وانشالله بعد يومين بتربين !!!
ظهرت لريلي وخبرته ..قالي خلاص يومين يومين امرنا لله ...
اتحوطنا اشوى وعالساعه 7 ونص رجعنا البيت من التعب ...انا منتهبيه خلاص بس ابا ارقد .. صعدت غرفتى سبحت وتونى بحط راسي عالمخده ..حسيت بالم شرات الدورة ... واشوى وما احس الا بشلال ماى .. بديت اتنافض من الزيغه ....نزلت تحت وكانت الساعه 9 وخبرت بو الشباب ... ورجعنا مره ثانيه المستشفى بس بعد طلعه الروح لان يوم خميس ودبي زحمه عموما بس اتكون ازحم يوم الخميس... ودخلت عالدكتوره ونفس الموال ففففففففففففففففففففحص ....يالله لاحظوا هذي ثالث مره فنفس اليوم . وفحصت .. عاد كم تتوقعون .... انا قلت ع شلال الماى اللى نزل اكيد عشر مب 7 .... خخخخ يحليلي ... قالت ال2سم ماغيرهم ... بس مااقدر ارخصج لان خلاص الماى نزل عليج .. ودونى على القسم فوق وريلي يحليله وياي ه ...يوم صارت 12 قالي ارقدي انتى من يومين مب راقده وانا بنتظر بره ... حاولت ارقد ما رمت ..الالم ايروح ويرجع ..مرات يحمى ومرات يبرد ولا جنه فيه شي ...صارت اربع وتونى بغفل واسمع صوت وحده اتصارخ ..اتقول طلعوهم .. ياحليلها اللى عرفته بعدين انها حامل بثلاثه توام ماشالله عليها ...وبعد اشوى وحده ثانيه بعد اتصارخ.. يالله هذا بروحه تعذيب نفسي ... وما رمت ارقد بالمره .. يالله صا يوم الجمعه وما ربيت .. بديت اكتأب ...مرت عليه الدكتوره عالساعه 6 الصبح ...واففففففففففففف لازم تفحص ... وفحصت ... كم صرنا الحين اربع مرات فحصونى ... امتابعين وياي اربع مرات...وفحصت ..قالت 2سم!!!!!!!! والله كنت بصيح بس مسكت نفسي .. الحمدالله الحمدالله ع كل حال ....وقالت بتحط لي تحميله طلق صناعي وانشالله اتساعدنى ويتوسع الرحم اكثروبتمر اتشيك عالساعه 2 الظهر ...وحطت التحميله من صوب ... واشتغل الالم من صوب .. وريلي يحليله بره .. وكل ساه ايي ييلس اشوى واتي النيرس اتروغه بره ...والله ما انسى وقفته وياي .... يابلي ماى زمزم وقرى فيه وشربته واشوى ياب لي زعتر وشربته ...ونفس الشي الالم ايروح وايرجع ...وقمت امشي في الممر. عسى المشي ايساعد .. وعالساعه 2 يت الدكتورة وطبعا ولا بد تفحص ... وفحصت للمره الخامسه ... وقالت 2.5 سم ... ع كل ه الالممممممممممممم وبس 2.5سم ....الدمعه على طرف ارموشي بس ما صحت جدامها ...قالت بنصبر عليج اربع ساعات يمكن الرحم بروحه يتوسع بدون شي .. اذا ماصار تطور ... بنحطلج محللول الطلق ....قلت امري لله ... الدكتورةاظهرت من صوب ودش ريلي من صوب .. بس شفت ريلي جنى ياهل في اول يوم فالروضه ... صحت من خاطري ...مب من التعب ولا خوف بس حسيت انى ابا اصيح عشان ارتاح ....وارتحت الحمدالله .. هدانى ريلي بكلامه.. وقمنا انا وياه نمشي قالمستشفى ونركب الدري وننزل...والالم ايزيد.. يت الساعه 6 المغرب ...ويت الدكتوره بتفحصصصصص .. وفحصت للمره الكم ..السادسه .. قالت 4سم بس .. يعنى اربع ساعات فتح بس 1.5سم ...ورحت ع دكتور التخدير على اساس انى كنت طالبه ابره الظهر .. وقالولى لازم اتكونين 4سم عشان تاخذينها ....وثلاث مرات ايحاولون ايعطونى الابره ادق الابره في العمود الفقري .. واحس بالم فظيع فنص ويهي ...قالي دكتور التخدير ما نقدر نعطيج الابره فقرات ظهرج وايد قريبه من بعض ومافيه فراغ ....ورجعت بخفي حنين لقسم الولاده ...وحطولى محلول الطلق في ايدي .. وكمام الاكسجين ... وافففففففف .. زاد الالم صار موت ..صار كل ثلاث دقايق ....وريلي يحليله عند راسي .. وقبل كل اشوى اتيي النيرس اتروغه بره ع اساس ان فيه حريم فالقسم ...بس عقب فضى القسم وما تم الا انا ...صارت الساعه 8 ويت الدكتوره بتفحص ..وفحصت للمره السابعه ونفس الشي 4 سم ... والالم ايزيد وانا اقرى وادعي ....ويت دكتوره ثانيه عالساعه 11 ونص وبعد فحصت للمره الثامنه ...قالت 5سم..انا خلاص انتهيت حسيت كل عظامي اتعورنى .. وع نفس الموال للساعه 12 ونص يت الدكتوره وقالتلي ياماما بفحصج اذا اكثر عن 5سم بنصبر عليج اشوى بس اذا كان نفس ال5 لازم انولدج بقيصريه ....وفحصت للمره التاسعه ...قالت نفس الشي 5سم وبطانة الرحم سميكه فالرحم ما يتوسع بسرعه ... وبدا نبض البيبي ينزل ع جهاز التخطيط ...وخوفتنى الله ايسامحها قالت ان هالشي بياثر على مخ البيبي لان الاكسجين ما يوصله ومافيه ماي حوالين البيبي ....وزقروا ريلي وخبروه بالسالفه ويحليله شافنى اشقد متالمه وقالي عشانج وعشان البيبي نتوكل على الله وبيوقع قيصريه ....بتسالونى عن احساسي .. اجذب عليكم لو اقولكم انى كنت خايفه ..كان ما عندى اى احساس بالخوف ...بتسالونى ليش بقولكم مااعرف ....بعدها يت الاستشاريه اللى بتسويلي العمليه ... وقالت لالالازم تفحص ... بععععععد... افففففففف..... والله على هالفحص كله لازم كنت اربي طبيعي ... بس الحمدالله ع كل حال .. وفحصت للمره الكم ... اللى امتابعه معاى بتعرف خخخ للمره العاشره ...... دخلونى غرفه العمليات عالساعه وحده الا ثلت صباح السبت.. ريلي ايقولى وحده وتسع دقايق طلعوا البيبي ...وانا طلعونى من غرفه العمليات عالساعه ثلاث الا ثلث ...ماانتبهت الا واهم امودينى ع الغرفه واسال ريلي شفت البيبي ايقولى هيه ..بعدها شكلي غفلت وما انتبهت الا الساعه 7 الصبح يابلي ريلي البيبي ومارمت اشله بسبة العمليه ... شفته فديت هذاك الويه ...والحمدالله على نعمة ربي وعلى عطيته


يمكن بتسالون انا ليش ما خبرت حد من هلي .. والدتى متوفيه الله يرحمها وام ريلي حرمه كبيره وخواتى اصغر منى ... و انا وريلي متفقين ان ما نشغل بال حد وانخبرهم اول ما اربي ....بس ريلي خان الاتفاق ... ولما طال الموضوع اتصل باختى يوم الجمعه عالساعه 9 فليل وخبرهم ويحليلهم تموا ايحاتون الين ما ربيت ...

سميته عبدالله ... والحمدالله وزنه 3 كيلو ... بس تم فالشيشه ثلاث ايام عسبة بو صفار ....وانا ظهرت من المستشفى عقب عشر ايام ...

ربي ايسر عليكم كلكم ..وايسهل اموركم وتنعمون بولاده سهله ولا يحرم اى حد من نعمة الذرية... اميــــــــــــــــن يا رب العالمين ...

شكلي قلت قصه حياتي ... بس ماعليه استحملونى