ممكن مساعدتكم

السلام عليكم ..بتمنى كل من يشوف موضوعي وعنده فكرة او حل انه يساعدني

لاني بصراحه شاعرة اني عايشه بجحيم
بدي اعرض عليكم المشكله وتساعدوني بارائكموافكاركم وانا متاكده انكم ماراح تتاخروا او تبخلوا علي

انا رومانسية كتير ومن اول ماوعيت على امور الزواج وانا نفسي ارتبط بانسان مثقف وواعي وهادي ورومانسي ..وكنت بتخيل ان هاي الصفات ممكن تكون موجودة بانسان وممكن انا الاقيه وارتبط فيه ونكون سعدا مع بعض
ارتبطت بانسان تعرفت عليه واقتنعت بشخصيته وحبيته وحبني وصار بينا نصيب وارتبطنا بعد معارضات من اهالينا بس حبنا كان قوي وصمدنا لغاية ماوصلنا للي بدنا اياه

تفاجئت بعد الزواج بعصبية زوجي الشديدة ..مابقدر اكلمه وقتها
بيحب دايما يفرض سلطته ورأيه لحد ماشعرت ان شخصيتي قدامه صفر مع اننا اتفقنا على كل الامور تكون بالنقاش بينا ..في يوم صارحني وحكالي انا عارف اني بشد عليكي كتير وخايف الغي شخصيتك انا انبسطت لاني حسيت انه منتبه لهيك شغله ..بس للاسف كانت مجرد كلمه
فصرت مااحب احكي لانه دايما بيحاول يقلل من قيمتي وانا بطلت احب افاتحه بهيك موضوع
فصرت كاني بدي بس اعيش وامررايام والسلام
كل يوم بحس اني ماعدت البنت الي شخصيتها قوية ..وشعرت اني كنت طول عمري باحلم وبس واحيانا اندم على ارتباطي بهاد الشخص

كمان رومانسيته قليله ..فلما لقيت انه مابيهتم انا كمان صرت اطنش شي اسمه رومانسية واحيانا بيحكيلي انتي مش رومانسية فبسكت وبكتم بقلبي لاني انا بقمه الرومانسية وماكنت بحب يكون هيك شكل حياتي الزوجيه بس هي الي انفرضت علي فرض تكون بهاد الشكل
حتى بغرفه النوم مابحب البس وارتب حالي واعمل ميك اب ..وهاي نقطه تقصير مني بس خلص مابلاقي شي بيشجع
نفسي عصبيته اقدر اتحكم فيها اقدر اساعده يتغلب عليها ..او على الاقل اقدر اتكلم معه باي موضوع بيكون مدايقني مع انه دايما بيحكيلي انا حبيبك وصديقك وزوجك ومافي بينا اي حواجز

طيبة قلبه كبيرة وانا مابنكر هيك ..بس الشغلات التانيه بتغلب على هاي الصفه الحلوة
حب بعرف انه بيحبني بس مابيحب يظهرلي حتى بمعاملته
حاسه اني مش قادرة افهمه ..ووسيلتي للتخلص من كل هالاشياء هي البكاء وهو اكتر شي بيكرهه يشوفني ببكي ..
نفسي اقعد واحكي معه بهاي المواضيع كلها بس مابقدر ..بحس ان شجاعتي بتخوني ودموعي بتسبق كلامي فبفضل اني اسكت

بجد نفسي حد يقولي شو اعمل
كيف اغيره واغير نمط حياتي الي انا عايشه فيه وشاعره فيه بالتعاسه
زوجي في صفات كتير حلوة ..بس باعتقد انه مابيظهرها حتى مايشعر بان شخصيته ضعيفه قدامي
هاد احساسي ....

باتمنى من اي اخت عندها راي او فكرة ماتبخل علي فيها

ومشكورين