الحقوني ابني فطم حاله، و عصبي كتير

السلام عليكم

اسمحولي احط مشكلتي انا ابني عمره 7 شهور ما شاء الله و الله يحفظه و يخليلي اياه. المشكلة انه من اسبوعين بيرفض يرضع مني قطعيا علما انه كان يرضع مني مرتين مرة بعد الدوام و مرة بالليل و الباقي عالصناعي لأنه حليبي ما كان يكفيه و لانعدام الزمن لأني بشتغل و ما عندي حدا يساعدني في البيت يعني كل شي على راسي. المشكلة انه من اسبوعين ما يرضى يرضع مني حتى لو أجوعه بيصير يبكي بعصبية. و حاولت أشفط الحليب و اعطيه اياه بالزجاجة بس مع الاسف حليبي نشف تماما. سؤالي هو اني حاسة بالذنب كتير و حاسة اني ما عملت اللازم لطفلي لأنه انا كنت أجاهد و أحاول عشان أتم ارضعه مني لحد عمر السنة على الاقل حتى لو بس مرتين في اليوم احسن من ولا اشي، انا الان محتارة هل ابني رح يتأثر سلبيا لأنه بس رضع مني 7 شهور بس؟ خايفة تطلع مناعته ما كويسة و الوم نفسي في المستقبل مع انني حاولت كل الطرق لزيادة حليبي بس ما نفع.

الجزء الثاني من المشكلة هي ان ابني الله يحفظه عصبي كتير و لما يبكي ينتف شعره و يمسك راسه، و ما بيحي انه أنزله من حضني. حتى بحطه على السجادة و بعطيه العاب ما بيهتم فيهم بس بدو أحمله. و اذا حطيته في حضني بيصير يلعب بس اذا لوحده بيصير يصرخ. و المشكلة انه ما عندي حدا يساعدني في البيت يعني ما بقدر احمله و اقعد فيه طول النهار لأنه عندي شغل كتير. مرات بحس حالي رح انجن :angry:

ارجوكم اللي عندها خبرة تساعدني
و شكرا الكم