قصة ولادتي مع فوز المنتخب :)

التاريخ: 29\1\2007
الوقت: 11:00 مساءً
بعد مارجعت من بيت أهلي قلت خلني آخذ نص ملعقة حلول بودر عشان ينظف بطني...أمي كانت تقول ان في الشهر التاسع كانت تاخذ مسهلات بكميات صغيره يعني قبل الموعد بسبوعين تبدأ. وهذا اللي أنا سويته...خذت الحلول قبل موعدي ب 12 يوم..وقلت دام انه الريل بعده ما رجع البيت خل أمشي شويه في الحوي . و مشيت 20 دقيقه بس لأني حسيت بتعب.

التاريخ: 30\1\2007
الوقت: 8 صباحاً
بدأ عندي مغص خفيف...بسبب الحلول طبعاً...وكنت أسير و أرد على الحمام عزكم الله كل ساعتين تقريباً..والغريب انه عقب المغص كان يسير و يرد و يظرب في الظهر بس كان ألم عادي قلت هذا أكيد من الحلول.
وهذا اليوم كان الكل مرتبش لأنه مباراة كأس الخليج و كانت آخر مباراه بين الأمارات وعمان..بدأت المباراه و تباعناها أنا و زوجي و كان الألم بعده يسير و يرد..وأنا أقول حق عمري ما سويت خير يوم خذت هالحلول!
المهم خلصت المباراه و فزنا ورتبشنا حتى إني نسيت الويع...وبعدين رد عليه الويع و قمت أحسب الوقت و اكتشفت انه ايني كل 6 دقايق..أبيييييييييه...شو السالفه..معقوله هالويع كان ويع طلق!!!...وبسرعه سرنا المستشفى و قلت حق ريلي لا تفتح أربع اشاير لأنه كل السيارات طالعه فاتحه اربع اشاير عشان الفوز عن نتوهق وندخل في المسيره واحنا في حالة طوارئ ههههه... مووول مب وقته أنكت ههههه .
وصلنا المستشفى و شافتني الدكتوره و طلع انه الرحم مفتوحه 3سم معناته ولاده...فقلت حق الدكتوره بروح البيت بيب أغراضي .
وعقب ما يبت أغراضي ورجعنا المستشفى..قام الويع يزيد عليه وأنا طايحه على السرير ما وعيت إلا بهالماي الشلال اللي نزل مني...أمييييييي كان شعور يخوف و ركض ريلي زقر النيرسات و شلوني لغرفت التخطيط و قام الويع ايني كل 5دقايق أو أربع دقايق..مع انه الرحم مفتوح 7سم
وام ريلي تقول...ما شاء الله ها طلق بنت مب ولد..لأنه كان بارد ..مب ورا بعض..قلت سبحان الله..الله استجاب دعائي و هون عليه الطلق...بس كل ما يني ألم الطلق كنت أمسك أيد النيرس ولا أم ريلي بالقو وأمطهم جدايي..و يوم يخف الطلق أقولوم.. سامحوني سامحوني هههههه والله يوم أذكر هالموقف أضحك..
المهم ودوني غرفة الولاده و أنا الدعاء ما خاز عن لساني و أذكر اللي وصوني..وقمت أدفع والنيرسات يساعدوني يهوسون على بطني يدزون ويايه والدكتوره كانت ممتازه أعصابها هاديه وتقولي لا تخافين يوم بتيج الزنجه "push" والنيرسات يشجعوني يلا بووش ووبوش أكو نشوف الراس يلااااا بووووووووش...وسويت بوش أقوى ما عندي و طلع حمودي فديته و أسمع صياحه و اسمع النيرسات مرتبشين و أنا مغمضه عيوني و أردد ..
"اللهم لك الحمد والشكر كما ينبغي لجلال وجهك و عظيم سلطانك"
كانت الساعه 4:15 الفجر تاريخ 31 \ 1 \ 2007
بعدها دخلت ماماتي علي والدموع في عينها وأشوف ريلي عينه محمره و هو مبتسم يقولي أم حمود حمدالله على سلامتج و أم ريلي واقفه حارس عند حمودي اتشوف شو يسوونبه و تقولوم
"بس بس شو هذا لعوزتوه" هههههههه..
وبعدين يابولي اياه أشوفه...و أول ما فتحت عيني..أشوف هالقمر فديته.. الويه ويه أبوه و عيون أمه..وقول في خاطري.."يا الله ما أعظمك يا الله ما أكرمك..استجيتلي دعائي و هونت علي الطلق و أحسنت الخلق..أحمدك و أشكرك"..ومن كثر التعب حتى مارمت أصيح..بس عيوني كانت تغرغر..مع اني دقني بنقع ههههههههه ومن فرحتي بست الدكتوره بعد ههههههه :)

أحيد لبلاد كلها محتفله بفوز المنتخب و أنا محتفله بقدوم أول ولد لي... :)
بس بصراحه الحين عرفت قيمة الأم و تعبها و سهرها علينا والله احساس غير..حب من نوع ثاني..حب يعور القلب صراحه..ومافي أحسن من الدعاء..ومناجات رب العالمين في كل وقت...انه يعطينا القوه والصبر و يهون علينا تربية العيال لأنها مسؤوليه كبيره..وبعد المنتدى هذا علمني وايد أشياء استفدت من تجارب الأمهات ونصايحهم..الوحده المفروض ماتعتمد بس على المعلومات اللي في الكتب ولكن لازم تبحث و تقرا وتسأل عشان تكون مستعده و ما تنصدم وتخاف..لأنه الحمل كوم و الولاده و التربيه كوم ثاااااني :)

الله يهون على كل حامل و يرزق كل محروم...آمييين :)

سامحوني طولت عليكم.