صبايا الأردن ..

يا الف الف مبرووك


الله يتمملكم على خير

ولا يهمك انا مستعدة اساعدك على قد ما بقدر

خلص ما تبكي;)

شكرا كتير كتير يا أحلى الكلام :shy:
والله يجبر بخاطرك زي ما جبرت بخاطري (f)

بس إنت من أي بلد ؟؟ من الأردن ؟؟ لأني بصراحة بدي أسأل عن مكاتب خدمات أفراح بعمان (اللي ممكن يقدمولي: DJ وتصوير فيديو وفوتوغرافي و تنسيق أزهار في الصالة لللوج وطاولات المعازيم وممر العرسان، بالإضافة لتقديم المؤثرات الضوئية) وبدي أسأل كمان عن صالات الأعراس (بدي صالة تكون دخلتها غريبة)، وبدي أسأل عن فرقة زفة سورية، وفرقة دبكة فلسطينية، وفرقة رقص باليه، وبدي محلات تأجير سيارات ( بصراحة نفسي بسيارة ليموزين بسواق أو سيارة كشف بمقعدين)، وبدي أسأل عن تأجير الباصات، من وين وبكم؟، وبدي أسأل عن مطاعم بمنطقة الهاشمي الشمالي مشان نطلب فطاير مشكلة للعشاء يوم السهرة وبدي إياه يكون قريب من البيت، وبدي أسأل عن محلات تأجير فستان الزفاف ومستلزماته، بالإضافة لمحلات البطايق ..

... إلخ ، طلباتي كتاااااااار، وهاد اللي متذكرته بشكل عام ..

فإذا إنت من الأردن يا ريت لو بتقدري تفيديني بهالمواضيع،،
وإذا مش من الأردن فألف ألف شكر إلك :clap: بكفي ردك ..

مبلا حبيبة قلبي بالاردن

و حاليا الزفة السورية .. رح اشفلك اللي زفوا اختي
لان زفتهم خياااال بجد و بيعملوا فقرة لعب بالسيف و الترس .. حتى اللي بيزف كلمات زفته كتير حلوة
باخد رقمهم منها
.. رح تنبسطي معهم كتير

و الباقي بشفلك ياهم
كل ما وصلت لشغلة بحكيلك عليها

بالنسبة للمعجنات مش بالضرورة يكون قريب من البيت نشفلك واحد بيعمل كتير طيب و بتخلي حد يجيبلك ياهم اول ما بيجهزوا و هيك بيوصلوا سخنين
ولا شو رايك

مرحبا أحلى الكلام (f) (f) (f)

ما راح تعرفي قديش إني مبسوطة لإنك طلعت من الأردن ، ما اتوقعت بصراحة ..

والله إني كتيييييييييييييييييييييييييييييير فرحانة ..

(8) الله يسعدك يا رب (8)

حبيبتي أنا كتير محتاسة ومتوترة، خواتي التنتين مش عندي، وإخواني الاتنين كمان مش عندي، وإمي متوفية، ما عندي حدا أتناقش معه في هيك أمور :sad:

إلي سنة كاملة متابعة الأعراس وتجهيزات العرايس سواء ع النت ولا بالحقيقة، وتقريبا عندي فكرة بكل التجهيزات.. وخلصت تقريبا كل المشتريات، باقي علي الحجوزات، وراح أكون ممنونتك إذا بتقدري تساعديني فيها (r)

بالنسبة للمطعم، والله من اللخمة ما دارتلي إنو فيه توصيل للمنازل، معك حق ..

وبالنسبة للزفة السورية، الكل بحكي إنها بتكون فايعة، يا ريت لو بتقدري تجيبيلنا رقمهم، أنا بصراحة محتاجيتها بس للزفة، لأنو لصالة الرجال راح أدور على فرقة دبكة فلسطينية ..

بالنسبة لمكاتب خدمات الأفراح، بتقدر تخدميني فيها إذا بتعرفيلي أسماء المحلات مع إيميل حدا من اللي بشتغل فيها، مشان إذا بدي أتناقش بالتفاصيل، مش راح توفي الشغلة معي إذا راح أضل أحكي تليفونات دولي، يعني بدي أغلبك، إذا بتعرفيلي محل منيح، بس اتصلي عليه تليفون وإسألي عن موقعهم الإلكتروني (إن وجد) وإذا ما فيه إلهم موقع، إحكيلهم بدك إيميل أي حدا فيهم مشان اقدر أراسلهم ..

بالنسبة لباقي المواضيع، وصلتني شوية معلومات عنها، بس بعدني بدور :think: ، راح اخبرك بكل شي بتوصل لإلو أول بأول ،،

الشغلة الوحيدة اللي ممكن تكون صعبة، هي فرقة رقص الباليه !!!
ما عندي أبدا أي فكرة من وين ألاقيها، أنا بدي إياها بس مشان ترقص على أغنية وحدة بالعرس، فترة الكيك شووو، كحركة جديدة، بس مو عارفة مين ممكن يدلني عليها ؟؟

بعرف زودتها عليكي، سامحيني، دخلتك بقصة ما إلك فيها ..

بس إن شاء الله ربنا بيسرلك بنات حلال يخدموكي يوم عرسك وعرس أولادك :flower:

حبيبة قلبي

تسلميلي


اعتبريني متل اختك ولا يهمك


بعدين افكارك روعة الصراحة

فكرة البالية كتير حلوة
رح شفلك بالمركز الثقافي الملكي اكيدفيه
و في مكاتب بيرتبولك العرس بطلباتك رح شفلك ارقامها تشوفي تحكي معاهم و بببعت الارقام عالخاص


خليني ارتبلك الامور

و ع فكرة ما عم تغلبيني لان انا نفسي عم ارتب لعرسي بشهر 8 هههههههه سبحان الله شفتي الموعد شو قريب لبعض

كتير اشيا رح اشفلك ياها معي

الله يتمملك على خير

بس مو ما تعزميني ;)

مرووشة رح ابعتلك رقمين لمنظمين اعراس

واحد اسمه بيرفكت داي Perfect day و هاد اللي بنصحك فيه مكاتبهم بصويفية

و في كمان بيت الضيافة هدلون بالبيادر

شوفي الانسب منهم و للأسف ما عندهم ويب سايت

هلا حبيبتي (f) (f) (f)

ريتو ألف ألف ألف مبروك ..

(i) إيمتا عرسك بالزبط، إن شاء الله بقدر أحضره، وإذا إنت كنت موجودة بعمان بوقت عرسي أكيد راح تكوني أول المعازيم، أنا عرسي لسه ما حددت إيمتا، وأكيد راح يتحدد حسب الحجوزات، بس ما بناسبنا إلا مابين 15/8 لغاية 25/8 لأنو هاي الفترة راح يكونو كل قرايبنا المغتربين موجودين فيها بعمان،،

:idea: خبريني عنك .. شو ترتيباتك للعرس، وشو حجزت وشو اشتريت .. يعني، لوين وصلتي بالتجهيزات ؟؟
اخترتي الصالة ولا لسه ؟؟؟

(t) ع فكرة أنا شاركت بمنتديات تانية، وكانو البنات بسألو بعض عن محلات تأجير وبيع فساتين العرس، في أكتر من وحده رشحو هالمحلات، (إذا بعدك ما اشتريت فستانك) روحو اتفرجي عليهم، أو استنيلك شوي، بلكن بتنزل تشكيلة جديدة ع الصيف، المحلات همي:

(8) كاشيه بشارع الوكالات
(8) غلوري بشارع الوكالات
(8) جاسمن بشارع الوكالات
(8) دومتريوز بالدوار السابع
(8) النفيس بالصويفية
(8) رامز خلف السي تاون
(8) بركات خلف السي تاون
(8) غزل الدولية للأزياء بالصويفية
(8) السيد للأزياء بالصويفية

طبعا هالمحلات عمري ما دخلتها :think: بس البنات ذكروها بمواضيعهم ..

وشكرا كتير على اللي بعتيلي إياهم، أنا راح أحاول أحكي معهم وأشوف أسعارهم، وشو الخدمات اللي بقدموها، وكل ما أعرف شي بخبرك :yes: ..

ياللا منا نشد حيلنا، قدامنا 4 شهور ما بدنا نزنق حالنا بالوقت :gum:
(o) خلينا نخلص كل الحجوزات قبل بوقت، وبنتسلى بالمشتريات ..
ويعطيكي ألف عافية :flower:

والله يا حبيبة قلبي لسا مش عارفة اي يوم بس النية انو بشهر 8

مع ان جد شي لخبط الامور شوي
بس بنقول خير ان شاءالله

و اذا ما ضل على موعده ممكن يتأجل شي شهرين مش اكتر

عالفستان انا عم اشوف بس ما عجبني شي لسا
و بقول لحالي اشوف عالصيفية شو رح ينزل
و يا مكتر محالات بدل العرس

عالصالة عجبتني قاعة فندق سدين
مرتبة كتير و اهم شي ما فيها عواميد يعني الكل بيشوف الكل و الكوشة و محل الرقص

الزفة اكيد السورية اللي قلتلك عليها بس عم يشوفولي الرقم ما جابوه لسا
و عم افكر اجيب زفة مصرية
حلوة زفاتهم
و ولاد عمه لخطيبي
بدهم يهدوه الزفة الفلسطينية
حاسة رح يعجقوا الدنيا
بس قلت لحالي خليهم ينسبطوا ههههههه
و في اختلاف تكون مو مختلط و انا حابة تكون مختلط بس بالخير ما رح زعل حبيبي رح اعمل اللي بده ههههههههه

و بيني و بينك مع كل هالدوشة نفسي اخطفه و نهرب بلا عرس بلا هم خخخخخخخ


و لسا دوشة تجهيز البيت
هي اللي مكركبة حياتي
يا محلى ترتيبات العرس

قولي خلينا فيكِ هلأ لان انتِ بعيدة و لما تيجي اكيد الوقت قصير رح يكون يا دوب تشمي نفس


خبريني ايش بيصير معك مع اللي اعط\يتك ارقامهم حتى لو ما اتفتي ب شي معهم
نحاول احنا نرتب لحالنا


تسلميلي حبيبتي

الله يعافيكِ

(f) مرحبا أحلى الكلام (f) ..

الله يتمملك على خير، وإن شاءالله ما بتأخر عرسك، تنفرح سوا :flower: ..

(r) بعتت مسج لأبو عصام ولماهر مشان يبعتولي إيميلاتهم، مشان نتناقش ع التفاصيل (8) (8)

:cool2: أبو عصام اتصلي هلا، حكالي إحنا بنقدر نزبطلك كل اللي بدك إياه، سألني وين أنا ووين خطيبي، فحكيتلو خطيبي بأبوظبي وأنا حاليا بالضفة، وحكيتلو إني نازلة بشهر 6 على عمان، وعرسي بشهر 8، فحكالي معناتو فيه معك وقت، لما تيجي بشهر 6 بنزبط كل الأمور، وبس

:smile: ما حبيت أسأله عن الأسعار لأنو هو اللي متصل، استحيت، بس حكيتلو بدي أعرف الأسعار مو بس مشاني ، مشان مجموعة صبايا أعراسهم على الصيف، بدي أردلهم جواب، مشان يحددو ميزانية معينة لمكتب الخدمات، حكالي مو مشكلة إنت أعطيهم رقمي ..

بالنسبة لماهر، بعتلي مسج إنو راح يتصلي الساعة 3 الظهر..

هاد اللي صار معي بس ..

لما يتصل راح أخبرك (t) ،،

مرحبا أحلى الكلام :flower:

حبيت أعرفك أكتر بحالي ،،

(}) ({) اسمي رشا واسم خطيبي ماهر، إحنا من الضفة الغربية بس معنا جوازات أردنية، مقيمين بالإمارات، بس حاليا أنا بالضفة (فترة زيارة)،،

أنا وخطيبي مو قرايب، ومو من نفس البلد، بس أهلي وأهلو معارف من 30 سنه، بس لما اتعرفت عليه، ما كنت أعرف هو ابن مين ولا حتى هو ما كان يعرف أنا بنت مين :cool2: ، تعرفنا على بعض بآخر سنة لإلي بالجامعة ( من 3 سنين) ، هو أكبر مني بسنة وكان بشتغل، ساعدني بمشروع للجامعة، كنت كل آخر أسبوع أروح عنده على المكتب مشان يوزعلي استبيانات، ودار بينا نقاش عن الشغل، على أساس إنو أنا وهو نفس التخصص (محاسبة).. مرت الأيام .. عجبتو وعجبني، خبرنا أهالينا وطلعو معارف ..

(r) إتأجل موضوعنا 3 سنين بسبب مرض ماما، واللي توفت فيه، ما كنت ناوية أبدا إني ارتبطت بأي حدا عبين ما ماما تقوم بالسلامة، من سنة وشوي سافرت أنا وبابا معها لتعمل العملية (زرع كلية) وتوفت بعد العملية بـ 3 أيام، هالحكي كان بشهر أوكتوبر 2005 ، يعني مش رمضان اللي فات ، اللي قبله :cry: ..

وأجلنا الخطبة كلها لتمر سنة على الأقل على الوفاة، بعدها طلعنا على عمان مشان نكتب الكتاب، صارت عندهم همي حالة وفاة، ورجعنا أجلنا الموضوع لهلا :down: ..

هلا ، النية على الصيف بشهر 8، وإن شاء الله تزبط هالمرة :idea: ..

ان شاء الله حبيبة قلبي

و ان شاء الله بيتمملك على خير

و متشرفة بمعرفتك يا رشا

الله يرحم الوالدة و يصبركم يا رب

كيف الاوضاع عندكم ان شاء الله خير و الوضع يكون آمن .. الله يقويهم هناك والله

و اللي بيصبر بالاخر بينول صدقي

حلووة هالصفحة احنا لحالنا هههههههههه

شكله ما في غيرنا يا رشرش:shy:

ابو عصام شكله حباب

و ماهر من تلفونه حسيته محترم

لما بيحكيكِ لا تستحي و استفسري يعني اديه ممكن يكلف علشان تعرفي ميزانيتك

و اكيد فيها تفاوض لما تجي على عمان بشهر 6 ان شاء الله

و يا رب تطلعي احلى عروس

و عرسك احلى عرس

و نفرح فيكم انتِ و ماهر

و انا على فكرة ناطرة تلفون الزفة لان حماة اختي بدها تجبلي ياه
قالتلي مبارح انه رقمه اللي عندها مغيره مفصول
بس رح تحاول تجيبه من ناس زافين معاه من مدة قريبة

و هيني بستنى:sad:


و على خير:clap:

:flower: مرحبا أحلى الكلام :flower:

(t) اتصل ماهر من شوي، واستفسرت منو على كل شي تقريبا،، أنا ما بعرف أسعار الأردن كيف بتكون، بس كل سعر بيعطيني إياه بحولو للدرهم الإماراتي وبشوف إذا مناسب ولا لأ ..

:eek2: بصراحة شفت أسعاره غالية شوي مقارنة بأسعار الإمارات، بس ما بعرف إذا هالأسعار مناسبة بالأردن ؟؟ ع العموم اندليت على محلين تانيين كمان، وبعتلهم إيميلات، واحد إسمه إكستريم وواحد إسمه روليتا، لنشوف شو راح يردو علينا..

شوفي شو أعطاني ماهر أسعار:

1. الزفة السورية : 180 دينار

2. الـ DJ والمؤثرات الضوئية: 350 دينار

3. فرقة الدبكة الفلسطينية: 250 دينار (ماكسيمم)

4. التصوير شفته غالي: 500 دينار :sad:
بس هو حكالي: 3 كاميرات بتصور، و 400 صورة بتختاري أحلى 150 صورة
ومع هيك شفته غالي

تنسيق الورد: حكالي حسب ما إنت بدك الديكور
حكالي في بـ 600 دينار، وبـ 1000 دينار، وبـ 2000 دينار

بس سألته عن شغلة بالنسبة للطاولات، لو بتعرفي المزهريات الكريستال، بكونو طوال، وطالع منها الورد ومدلى على الطاولة، حكالي الوحدة بـ 20 دينار، وأنا معازيمي 150 شخص، يعني 15 طاولة، يعني 300 دينار على الطاولات

وسألته كمان عن السيارة الليموزين: 250 دينار (ما اتوقعت سعرها بصراحة) :cry:

:mad2: بس نسيت أسأله عن فرقة رقص الباليه، وعن سيارة كشف بدل الليموزين ..

هاي كل القصة مع ماهر ...

المهم

في محل إسمه زفة العراب، بقدم:
زفة مصرية بـ : 100 دينار
زفة تقليدية بـ : 150 دينار (ما بعرف شو قصدو فيها)
زفة سورية بـ : 200 دينار
* وإذا بدك الزفة تبلش من البيت بدك تدفعي 50 دينار زيادة

هاد المحل دلتني عليه وحدة بتشتغل بالكراون بلازا، قال بيتعاملو معه بالفندق

وفي محل إسمه استديو بابل:
إذا بدك تصوير بكاميرا واحدة بـ 150 دينار
وإذا بكاميرتين بـ 200 دينار
وإذا بـ 3 كاميرات بـ 250 دينار

وبالنسبة للتصوير الفوتوغرافي: قال كل صورة بـ 0.75 قرش، وحجم الصورة 13*18

كمان نفس البنت هي اللي دلتني على هالمحل

وفي محل الميوزك بوكس بقدم الـ DJ بـ 200 دينار

فلو قارنا الأسعار راح نلاقيها أرخص من أسعار ماهر، بس مش غلط، بندور كمان ..

وع العموم هاي أكيد أسعار تقريبية، لأنو الوحدة منا هي وشطارتها بالمفاصلة :up:

ويعطينا العافية كمان وكمان :clap: ..

شوفي يا قلبي
اذا قارنتي بتلاقيها ارخص شوي
بس ماهر اتوقع بيكون محترف اكتر و متل ما قلتلك لما تيجي بتفاوضي

وما دام بدك شي مرتب بدك تدفعي

و لا تستخسري بليلة عمرك ب شي

و اللي في نفسك اعمليه بس بحدود
بالاخير اللي بيناسبك سويه و لو في اشيا كمالية بتحسيها احذفيها

لا تنسي لسا ما حجزتِ قاعة
يعني هاالاشيا بدون قاعة

شوفي حسبتك
لان مرات القاعة بتقدم دي جي و بتقدم المصور و الفيديو
من ضمن الحفلة
بدك تشوفي هي نقطة حطيها في بالك

ههههههههه يعطينا الف عاافية

نسيت اقلك ان اختي اخدت سيارتها 300
و هيك اسعار سيارات العروس المستأجرة

:flower: يسعدلي مساكي :flower:

تعي تأحكيلك عن الصالة..

أنا بصراحة أبدا مو حابة أعمل العرس بصالة، حابة أعمله بفندق، حبيت أدور على شي مميز، قد ما كانت الصالة حلوة مش راح تكون بحلاة صالات الفنادق (هاي وجهة نظري)، فراسلت مجموعة فنادق:

فندق الكراون بلازا
فندق جراند حياة عمان
فندق برستول عمان
فندق القدس الدولي
فندق سدين عمان
فندق الفنار
فندق أبجر

طبعا غير الفنادق اللي ما بتقبل حجز إلا كحد أدنى 300 شخص للصالة الواحدة، وأنا راح أحجز صالتين لأنو عرسي مش مختلط، (فمن وين أجيب 600 شخص معازيم ؟؟؟ أنا معازيمي على بعضهم 150 للنسوان، و120 للرجال)، غير الفنادق اللي طنشت إيميلي ..

رأيي الشخصي ..

أحلى صالة فيهم كلهم برستول عمان، وبعدها القدس الدولي وبعدها سدين عمان وبعدها كراون بلازا وبعدها جراند حياة عمان وبعدها الفنار وبعدها أبجر (مو حلوة)

المهم صالة برستول الخاصة بالسيدات (ليلتي) بتسطل، ألوانها قاتمة، إضائتها خافته، بس في بنص القاعة ثريا ضخمة، بتعقد، مكان اللوج عالي وبعيد عن عجقة الناس، وساحة الرقص واسعة، الصالة فيها شي بيجذبك لإلها.. سألتهم عن البوفيه، طبعا البوفيه كتير حلو، مشكل بمختلف الأنواع من مالح لحلو، بس بيحسبو 23 دينار للشخص الواحد، وأنا توتال المعازيم بالنسبة لصالة النساء والرجال 270 شخص، يعني إجمالي المبلغ اللي بدو يندفع على البوفيه 6200 دينار، حكيت ما في مشكلة، فداي وفدى خطيبي، خاصة لما شفت قعدة الرجال راح تكون في التيراس (بالي هاي) على بركة، قعدة رومانسية بصراحة، مشيت الموضوع، حكيت غالي غالي ، هي هاي الليلة..

بس لما عرفت إنهم ما بقدمو ولا أي خدمة تانية غير سويت للعرسان يقضو اللية الأولى، طار عقلي، ولا شي بقدمو، لا زينة على الطاولات ولا لوج ولادي جي ولا ولا ولا ...

حكيت 6200 دينار + بدي حوالي 2000 تانيين مشان مكتب الخدمات ومشان الصالون وبدلة العرس ... بدها توصل 8000 دينار وشوي، غير إنو مهري 5000 دينار، غير إنو البيت بعد ما تجوز راح أأثثو ... يا سلااااااااااااااام

شفتي الهنا اللي أنا فيه، والله راح تيجي على راسي في النهاية،،

المهم.. حبيت أتفلسف شوي، وأخفف عليه المصاريف، حكيت بجيب بدلة العرس ومستلزماتها من مهري، وبدفع أنا الصالون وبحاول أخفف من مصاريف مكتب الخدمات،،

بصراحة أنا مع إني أصرف كل شي مشان تطلع هالليلة حلوة، هاي الليلة راح تتصور فيديو ، وراح نضل نعيدها ونشوفها، غير إنو أولادي وأحفادي راح يشوفوها، عشان هيك بدي إياها فخمة فخمة، وبعدين مشكلتي إني بهتم لكلام الناس، وعارف إنو العيلتين بستنو رشا وماهر شو بدهم يعملو، من شباب ومن صبايا، من كبار ومن صغار، وأنا من نفسي والله أعمل شي مميز، شي يبسطني ويبسط اللي حواليي ، وعشان ما أكون كذابة معك، بدي شي يرضي غروري ( مش كتير مغرورة .. شوي)
بس أوقات بحكي ليش ما أدور على فندق أرخص، وباخد أنا الفرقية، ولما أرجع أفكر بالبرستول، وبحكي ما راح أحجز غيرها.. كتيـــــر متحيرة، ماهر حكالي بحجزلك إياها مشان ما تضل بنفسك،،

بس أنا متأكدة إني راح أعيش أول سنة سنتين بقحط.. لأنو ماهر وضعو منيح بس مش لدرجة يدفع 8000 دينار مصاريف العرس،،

بس المفروض خلال هالشهر نأكد الحجز ..

والله بطلت أعرف شو بدي، بس إذا ما حجزتها راح أحجز في فندق القدس، كمان حلو، بس مش بحلاة برستول..

والله لو بقدر أبعتلك صور البرستول كان بعتلك إياها، صورة صالة ليلتي، وصورة التيراس (بالي هاي)

يا ستي، بلكن إذا حجزتها بتشوفيها لما تحضري العرس..

:shy: :sad: :cry: (r) :dd: :mad2:

مرحبا أحلى الكلام (f) (f) (f)

بدي أسألك عن هالشغلة.. شو أكتر منطقة بعمان فيها حركة وجو مرح (فايعة) :bigsmile: ، يعني مطاعم، كافيهات ، قعدات ليلية، سينما ..

بعد العرس، راح يكون معي 3-4 أيام قبل ما أسافر شهر العسل،،
وحابة أقعد بفندق أو أجنحة فندقية بمنطقة يكون فيها المحلات اللي ذكرتها،،
يعني.. إذا حبينا نتمشالنا شوي قريب الفندق نلقى مطارح حلوة :up: ..

بصراحة، في وحدة بعتتلي موقع فيه أسماء الفنادق والأجنحة الفندقية :yes: بكل الأردن ، بس بالقبل لازم أحدد المنطقة اللي بتناسبني عشان ما أدور في المناطق كلها، وأنا جد ما بعرف.. وبنفس الوقت ما بدي تكون غالية المنطقة، مش أوفر من هون وأطبشها من هون ..

الله يوفقكم

بدك نصيحتي رشرش

بلا البوفيه

والله بلااااااااه عالفاضي:confused:
اخواتي التنين عملو بوفيه
وحدة عملت بالهوليدي إن و وحدة عملته الماريوت
متخيلة الاسماء العالمية
يعني اشهر فندقين و المفروض الشفات اللي عندهم قمة
بدك تعرفي شو الاغلب قالو

الاكل مو طيييييييب:sad: ييييه على القهر
طبعا انا ما اكلت شي من الارهاق و من متابعة المعازيم

انا عشان هيك فكرت نقدم سناك خفيف شوية موالح على شوية معجنات


هلأ البريستول انا معك قاعته بتعقد
انا حضرت عرس صاحبتي فيه بجد بجــد حلو كتير

بس شوفي لو جيتي على عمان روحي على سدين
القاعة مرتبة و حلوة و خفيفة
و التصوير و الشاشات فيها كتير حلوة

ما بعرف لو سمعتي بقاعة جبري
حلوة كمان
صح غالية بس حلوة كتير
و فخمة لو جيتي روحي شوفيها

اذا حبيتي تضلي بعمان كم يوم
بنصحك تشوفي واحد من شركات السياحة يرتبلك رحلة على وادي رم و البتراااااء
رومانسية لابعد الحدود
اسألي عن وادي رم و الغروب و الشروق و الحفلات اللي بيعملوها هناك


و اذا كان ولا بد شوفي اجنحة شذى البتراء بأم اذينة يتكوني قريبة من الرابية و من صويفية جاية بالنص
و هم اكتر منطقتين فايعين ههههههه

:shy:

تسلمي والله اختي الامبراطورة على الطلة

الله يوفق الجميع