وضعي الوظيفي مضايقني والسبب المدير

السلام عليكم ورحمة الله

اختي انشدي شؤون الموظفين عن طبيعة شغلج....يعني المهام الوظيفية

وبالنسبة للي معاج اتقربي منها واعرفي شو ياللي هي اتسويه لين اتعرفين كل شي....بس بدون ما اتحس انك تفهمين بسرعه وممكن تمسكين مكانها لأنها بتخاف اذا عرفت انج فهيييمة ويمكن تاخذين مكانها

وبعدين يمكن المدير متعود عليها وهي عارفة الشغل كله....

خليج هادية لين اتعرفين الشغل كله كيف ماشي.....

والله يوفقج ان شاء الله

اختي العزيزة
بالبداية اعتقد المدير يخاف ان ماعندج خبره بالموضوع تقدرين تكلمينه وتقولين له
انج مستعده لاي عمل يطلبه منج
وقوليلي عندي خبره تزيد عن 8 سنوات وانا مستعدة لاي شي تطلبه مني ولكن نصيحه وجهي الكلام له شخصيا .

والله يوفقج ان شاء الله


دمتم سالمين
اختكم شريفة

اختي بين الرموش ..

هو يطلب منها دايما مو معناته متجاهلج هو اكيد تعود عليها وعلى طريقتها في الشغل ...

واما انتي اذا تبين شغل طلبي منه موعيب ..

انا نفس الشي جديده على الشغل ويطلبون مني اشياء بسيطه

بس بعدين صرت احن وازن على اللي معاي في المكتب اني اساعدهم في الشغل ...

وعطوني مسؤوليات الحين ....اما قبل فكنت مثلج متظايقه احس ان وجودي مش مهم ..

المسأله يبي لها وقت ...

بس انتي طلبي من مديرج انه يقسم العمل بينكم ...

صدقيني وان شاء الله راح ترتاحين

واسفه على الاطاله

إختي بين الرموش... حاولي تبادرين بالسؤال و طلب الشغل ... يعني ساعات دخلي على المدير و إسأليه إذا محتاج شي.. حسسيه إنج نشيطه و مستعده للشغل ... إحتمال تكون هذي فتره إختبار عشان يشوفونج كيف تقضين وقتج و كيف بتتصرفين.. يعني إدورين على شي يشغلج او تتريين لين يعطونج شغل؟..

تمي إطالعي شغل الموظفة اللي معاج و شوفي كيف ترتب الأمور و وين تحط الملفات و كيف ترد على الناس و كيف تتعامل مع المدير... و ركزي على المدير و شوفيه هو يهتم في شو اكثر شي عشان سبحان الله إذا غابت الموظفة الثانية تقدرين تغطين مكانها بدون ما ينزعج لغيابها...

بالنسبة للتقييم أكيد المدير بيعطيها إمتياز لأن التقييم مال سنة كاملة و هوه عارف شغلها.. و إنتي كملتي 6 شهور شو سويتي؟ يعني باقي لج ست شهور و بتتقيمن و لازم تكون عندج مبادرات و مشاركات و إقتراحات..

قدمي إقتراحات للقسم او الإدارة أو لشي تشوفينه بينفع الدائرة بشكل عام.. يعني طلعي إبداعاتج و خبرتج مال 8 سنين، يعني إقترحي على المدير يسون الموظف المتميز كل شهر و حطي معايير معينه، أو إقترحي يحطون رؤية و رسالة الدائرة على لوحة صغيرة تنحط على مكاتب الموظفين و كافة الممرات، أو إذا شفتي شي يحتاج تعديل أو إضافة قدميه على شكل إقتراح (مذكرة داخلية) لا تخلين كلامج شفهي كله خليه كتابي عشان تتسجل في رصيد إنجازاتج و محد يصرق أفكارج، او إقترحي يسوولج جولة تعريفية على كافة الأقسام عشان تتعرفين على مختلف الإدارات و تكونين ملمه أكثر و عارفه الكل، إذا كان في رسائل او مذكرات ورقية حاولي إنج تسوين منهن نسخة ألكترونية عشان تحافظين عليهن في حال ضاع الملف الأصلي، حولي شغلج إلكتروني أكثر من ورقي، و إلفتي النظر صوبج بأفكارج اليديدة و نشاطج المستمر... اشغلي وقتج قد ما تقدرين عشان مايقولون هاي ليش يالسه طول الوقت ماعندها شغل..

إحتمال الموظفة الثانية تكون خايفه تاخذين مكانها و هالشي طبيعي لأن نزل قرار بتوطين الموارد البشرية (يعني المدراء لازم يكونون مواطنين) و حتى السكرتيرات... إحنا عندنا في الدوام غيروا كل السكرتيرات و يابو بدالهم مواطنات و اللي كانوا قبل من الجنسيات العربية خلوهم مساعدات..

أتمنى إن افدتج و إذا محتاجه أي شي أنا حاااااااااااااااااااضر

مشكورات على الردود والتجاوب السريع


انا وهي شغلنا مشترك وكله موجود على الجهاز او بالملفات وبالنسبة لي انا اعرف اطلع اي معلومة يطلبونها مني سواء المدير او الموظفين ......

ومديري يعرف اني اشتغلت من قبل وعندي خبرة بالامور الادارية وحتى لو مااعرف مو عيب اللي ما يعرف يتعلم .ولو هو يسالني عن اي شغلى بيعرف اني اروم اطلعها يعني المسالة مش قنبلة باخترعها ....

وبشغلنا في كل يوم شي يديد يعني اروم اني اسوي اي شي يطلبه مني وبعدين لازم الشغل يتوزع علي وعليها .. ما في شي اسمه هذي مسؤوليتي او مسؤوليتها علشان الشغل يمشي الكل لازم يتعاون

وبعدين ما في موظف مضمون وجوده في اي مكان

على العموم انا افكر اني اقدم على نقل وان شاءالله الامور تمشي، لأنه لو استمر الوضع جي انا ما اتحمل اني انا المواطنة بنت البلاد يطنشني ويعبر الوافدين

وحتى لما عطاها امتياز ، اوكيما يخالف خله يعطيها امتياز ، وهو لو ما عطاني شغل ولو ما كلفني باي مسؤولية كيف بيقدر يقيمني

هلا فيج يا الغلا
انه براي انج يا الغالية تقولين له عطني شغل
ابي اشتغل سويت اشغالي الي عطيتني اياها
ويلت تعطيني اكثر انه احب اشتغل بطريقة حلوة وادب
او حاب اساعدك بشي مثلا

فبيحس انج تحبين تشتغلين وايد وبيهتم فيج وبيركز الاشغال عليج وبيعطيج اهمية

اما بلنسبة للبنت الثانية فلا تلومينه لانها اقدم منج بلشغل وتعرف اكثر وانتي توج يديدة لازم يعلمونج شوي شوي ويخاف يعطيج شي بالبداية وتغلطين لاسمح الله وهو شغل مترتب عليه الشركة بكاملها

فاهمة علي حبي

وهذا الشي عادي يصير بكل الاشغال اول مانشتغل

اختي
هو متعود على الموظفه الثانيه فتلقينه احيانا ينساك

فانتي لازم تذكرينه فيك دائما

كل شوي ازعجيه وقولي عطني شغل انا فاضيه وحابه اخدم

جربني وماراح تندم ان شاء الله

عطني فرصه اطلع ابداعي وخبرتي

والله يوفقك

اختي اشوف انج اتروحين عنده وتقوليله خليه يعطيج شغل لانج اتمين فاضية طول الوقت وشوفي شو بيرد عليج يمكن يعطيج شغل