اللي عندها خبره في الحياة (رجاء جاد مابي زوار ابي ردود)

بسم الله الرحمن الرحيم
كيفكم بنات وستات انا اليوم حبيت تشاركوني في موضوع محيرني من فتره ومتردده فيه وانا متأكده بإذن الله إنكم ماراح تبخلون علي بنصايحكم الذهبيه اللي من قلوبكم لأني والله بدعي للي تعطيني نصيحه من قلبها بدعي لها من قلبي...ورجاء جاد وحار موضوعي ليس للإطلاع فقط بل هو مشكله اواجهها ومحتاجه من أخواتي النصيحه والرأي السديد.
كل وحده منكم تقرا موضوعي قبل ماتكتب الحل باخذ من وقتها دقيقه تخيلي انك مكاني أو إنك تنصحين أختك وش بتقولين .
مابي أطول عليكم لأني مابي أتأخر بإختصار أنا أعمل في مجال طبي الحمدلله وفيه شخص معي بالعمل إنسان محترم جدا كلمني انه حاب يرتبط فيني (زواج) ولكن شرطه الوحيد اني اترك العمل،في البدايه انا عطيت نفسي وقت وبعدين قلت له اني مااقدر كلم اهله وطبعا ابوه رفض رفض قاطع إنه مايدخل بيتنا إلا وأنا تاركه المستشفى وإلا ينسى الموضوع .
الولد سوا مشاكل مع أهله عشاني وأبوه عند رأيه حتى قال للولد إنه لو صار فيه نصيب بيننا ان ولا احد من عايلتهم يعرف اني كنت اعمل في مستشفى.
جاني الولد وكلمني واقترح علي اني اترك العمل لمدة سنتين يتم فيها الزواج وبعدين نجيب طفل بإذن الله وبعدها ممكن ارجع لعملي او يشوف لي مجال عمل ثاني غير المستشفى بس مو قبل سنتين وفي نفس الوقت عشان ابوه يوافق.
المشكله عندي في البيت انا في البيت اللي قايمه في كل شي ولله الحمد يعني المصاريف والفواتير ورواتب الخدم كله علي بعد الله سبحانه وتعالى ماعندي اخوان وانا الكبيره والكبير رب العالمين وإلى الآن مانملك بيت يعني إيجار البيت انا ادفعه وأبوي لا يمتلك من الدنيا إلا ملابسه ضيع نفسه الله يهديه مع الناس اللس نصبوا عليه من يوم كنا صغار وإلى الآن.
وأمي إنسانه تحملت كل شي عشان تربينا وتشوفنا نكبر قدامها ويعوض لها ربي الخير فينا
دايم أملها الوحيد في الحياه ان يكون لها بيت ملكها تأثثه على طريقتها ةلا يجي صاحب إيجار يطلعها منه ودايم على لسانها اني انا املها الوحيد بعد الله لأني جبت شهاده الحمدلله كويسه ووظيفتي الحمدلله دخلها جيد وتتطلع فيني اني انا اشتري البيت اللي تحلم فيه طول عمرها وماقدر ابوي يوفر لها بيت مثل كل حريم الدنيا.
طيب شلون اترك وظيفتي واتخلى عن اهلي وخواتي وبيتنا اللي قايم علي انا بعد الله واجلس بدون راتب واذا احتاجوا اهلي من يعطيهم من يسدد الإيجار ومن يدفع المدارس ومن يشتري البيت .....
وانا اقولكم يمكن حتى لو تركت لمدة سنتين مااني ارجع لوظيفتي ماحد محصل وضايف هالأيام والأدهى والأمر من هذا كله أمي أمي أمي
اللي حاطه أملها في الله ثم فيني أنا كيف أتركها وأهدم حلمها ولا اعطيها جزء من عمرها اللي ضيعته مع ابوي اللي ماأسعدها من يوم خذته وصبرت عشان تشوفنا كبار ويوم كبرنا نتخلى عنها.
أنا ماودي أتزوج لمجرد فكرة الزواج ولا ودي أستعجل قراراتي.
وهذا الشخص عطاني فرصه أخيره أفكر في الموضوع وقالي انه شاريني وعطاني اقتراح اني اجلس سنتين عن عملي أو خلاص أمه بتخطب له في حالة اني رفضت.
او ممكن انه يصبر عشاني سنتين وبعد سنتين يفتح الموضوع مع اهله مره ثانيه وانا ماأضمن إن ظروف أهلي تصلح وبعدين يضيع عمره ويجي يحملني الذنب .....
انا والله تعبت من التفكير وهذا قرار مصيري بس امي دايم وخواتي قدام عيوني مابي يوم ابوي تخلى عنا انا اتخلى عنهم .
ارجوكم قولو لي انصحوني انا استخرت ولكن امي مابي اخليها والرجال مالهم امان عشان اتخلى عن امي عشان رجال .
لو كنتي مكاني وشبيكون قرارك......
والله بدعي لك من قلبي بس انصحيني من قلبك.