طـفـل يعاني من ابوه ..................... انصحوني شنو الحل

السلام عليكم ورحمة الله وبركاته

عندي اخو اكبر مني متزوج وحبوب ويا الكل

ورزقه الله بولد ماشاالله عليه كلمة قمر شوي عليه

اخوي بالبدايه كان مهتم فيه ويفتخر فيه

شوي شوي كبر الولد وخف اهتمام اخوي

هالشي لاحظته حاولت انصحه مو راضي

بس قلت خلاص انا ويده ماراح نقصر ولا تقولون وين امه لان امه مع انها ربة بيت بس ماتهتم فيه كل شي على الخدامه

بس الجذب خيبه هي مو مثل اخوي يعني ماتسئ له

فهمتو ان اخوي يسئ له :(

الحين الولد عمره خمس سنين

لما يشوفه اخوي يناديه بالفاظ وسخه عيب اقولها

ولا يرضا اخوي انها تنقال له او يرضا انه يقولها لاي احد ثاني حتى مرته مايقولها هالالفاظ

اشمعنى ولده مادري

لما ولده ييي يقول بابا يقوله جب ... يقعد يجعمه جدامي وانا ينكسر قلبي عليه

وانقهر ييي الولد يقوله بابا تحبني يرد عليه اخوي لا مااحبك انا احب اختك الصغيره

ييني يصيح حتى صرت اخاف يكره اخته بس لي سالته قلت تحب اختك لولو قال احبها اسم الله عليه

ومايشتري له هدايا بالمره ... يعني مايعامله مثل مااشوف الرياييل يعاملون عيالهم

والملابس يشتريها له بالمناسبات يعني من عيد لي عيد

من شوي شفت موقف خلاني اتشجع اكتب الموضوع

ولد اخوي كان بداري ... اهم ساكنين ويانا بنفس البيت بس لهم شقه بروح

المهم ياني ولد اخوي وفجأ سمعنا صوت اخوي يصارخ ينادي احد

ولد اخوي قام يرجف يقولي خايف بابا يطقني

اقوله لاتخاف قال بابا مايحبني

عور قلبي شوي وابجي بس مسكت روحي لاني حاولت افهمه انه فاهم غلط ومالازم يخاف

فلت من ايدي وقال بروح لبابا وطلعت الا اشوفه يمد ايده لابوه بكل براءه

قاله اخوي اقلب ويهك وياني يبجي يقول ابي بابا يصير طيب وحضني وسكت ماعرفت ارد

انا احس انه مايحب ابوه بس لما يشوف اليهال بالروضه ويا ابهاتهم

ولما يشوف اخوي واختي الباجي اشلون حبوبين ويا عيالهم اشوفهم يقعد يخزهم ويقول جدامهم بابا يحبني

احس يبي يصير نفسهم فيحاول يغير ابوه

بليز شسوي حاولت في اخوي

وانا راح اتزوج هالسنه مابي اطلع لاني انا الي اصرف على الولد ويا ابوي

وانا الي مقربه منه ومرات يناديني ماما

ولما اهلي يسالونه تبي عمتك تطلع برا البيت يقول لا

و لي طلعت انا منو بيشوفه اخاف اخوي يزيد عليه

هو صج يطقه نادرا بس يغثني لي طقه على اتفه الاسباب ومره طقه بالعقال والولد صاح وانخش ورا ظهري بدون شعور قمت اصيح بويه اخوي عصب اخوي وطردني من شقته دقيت على اخوي الكبير ولا قدرت انادي ابوي لان ابوي عنده الضغط ويموت بالولد وان درى بينفعل

بس المسبه والزف والله وشوف عيني بدون سبب

ولاتقولون ابالغ ... لو ببالغ ماراح اذم اخوي واسكت عن مرته الغريبه عني

مع ان مرته هم غلطانه حتى ابوي بهذلها قال ريلج يزف ولدج جدام عيونج وانتي تضحكين شنو مو ولدج

تقول ريلي يتغشمر قال عقد الولد وتقولين غشمره

حرااااااااااااااااااااااام اشوف الولد يتعقد جدامي ياناس لو استمر بيطلع انسان فاشل لي كبر او منحرف او مجرم صح ولا لأ

اهله يزرعون فيه اسوأ البذور ويحرمونه

ليش جذي مادري بس هذا الي صاير

ساعدووووووووووووووووووووووووووووووني