الجزء الثاني من قصة ولادتي

مرحبا بكمل لكم قصة ولادتي وامتنى من الكل يقراها عشان يعرف قدرة الله سبحانه شلون رحيم بعبادة وصج مايرد القضاء الا الدعاء
:shy:

انا وصلت لما ياتني النيرس وقالت الدكتورة بتييج وخلال هالفترة كان الام ذابحني وخواتي ماسكين يدي ويمشوني في الغرفة بس كنت ميته ماقدر اتحرك رقدت على السرير وانا اصيح وامي تقرى علي وتحاول فيني عشان اخذ ابرة الظهر بس انا كنت رافضة في البداية


ولما ياتني الدكتورة الساعه 12 كشفت علي كان مفتوح عندي 3 سم قلتلها خلاص ابي ابرة الظهر بموووت ماقدر استحمل نزلوني غرفة الولادة وتميت انطر الدكتور عشان يعطيني الابرة وانا ماسكة يد امي وتعصر من الالم وبس دموع وماكنت اصرخ ولاشي لين ماياني الدكتور وعطاني الابرة ارتحت ولاحسيت بشي


المهم على الساعه 5 الصبح بديت احس بمغص في بطني وظهري ورد علي الالم اخس من قبل قلت حق النيرس شسالفة قالت لي انا خففت الجرعة عشان تحسين بالم طلعة الراس لان خلاص مفتوح عندج 8سم


وقام يزيد الالم واقولها مابي احس بشي زيدي الجرعة ومافي فايدة مب راضية من كثر الالم تميت اصارخ مثل المينونه ولاحد راضي يجيني

وطلعوا امي برع الغرفة وشسويت فيني النيرس قالت لي ادفعي الراس تحت خلاص بتولدين وكانت مردقتني على جنب ولاكسرت السرير ولاجهزوا الغرفة ولاشي وانا مدري شسالفة من الساعه 5 انا ادفع لين الله رحمني الساعه 7 الاربع ياني دكتوري اول ماشفته قعدت اصيح لاني كنت بين الحيى والموت مافيني روح كنت مواصله 3 ايام مارقدت وماعرف شلون يدفعون


اول ماشافني الدكتور فهالحالة هاوش النيرسات لعن خيرهم قالهم زيدوا جرعة الابرة ليش مخففينها وتم يحاول معاي عشان ادفع البيبي ويحاول يعلمني بس انا من التعب ماقدرت وارتفع الضغط عندي قالي خلاص بسحبها وسحبها بالملقط

وطلعت احلى قمر عوووشة الساعة 7 و8 دقايق اول ماطلعوها كانوا خايفين تكون زرقة بس الحمدالله كانت وردية حطوها على صدري اول ماشفتها قلت الحمدالله


وخذوها مني حتى بدون ماينظفونها لان كان ورى الستارة دكتور اطفال ودكتور قلب المهم ودوني غرفة الاستراحة وانا طول الوقت اسال عن بنتي والنيرس تقول مايصير تشوفينها وكان قلبي محترق كل وحدة ع بيبيها وانا بروحي


المهم ع الساعه 3 العصر ودوني غرفة بروحي اول مادخل ريلي سالته وين بنتي شخبارها قالي بخير قلتله اول سوال سولها تحليل الطفل النغولي؟؟ بنتي منغوولية؟؟:sad:


رد علي قالي سولها والحمدالله البنت طبيعية مب منغولية وكان مصورها في الجوال ماشاللله عليها قمر من اجمل ماخلق ربي


حمدت ربي وعرفت انه مايتخلى عن عبادة وسالته عن حالة قلبها قالي بعدين بقولج قلتله قولي عادي انا عارفة ان قلبها تعبان قال محتاجة حق 3 عمليات واول عملية لازم بعد 10 ايام من الولادة


انا انصدمت:sad: وقعدت اصيح وقلتله نزلي عندها ونزلت اشوفها وعليها اجهزة وابر وادوية تخيولي وضعي توني نفس اليوم والد واشوف بنتي بالحال؟؟؟


المهم تميت 3 ايام ف المستشفى وكل ماحد يجي يزورني يسالني عن بنتي يشوفون سريرها فاضي اقولهم تحت في العناية المركزة واليوم الي انا طلعت فيه من المستشفى رحت بيت هلي سويت مناحة شعور خايس اني ارجع بدون البيبي ومن هاليوم كنت كل يوم اروح لها مرتين في المستشفى


الله لايوريكم الالم الي كنت احس فيه من بطني والخياطة تخيلوا طول فترة الاربعين مارتحت كله صياح وكنت امشي مسافة لين مادخل عندها حتى امي كانت تقول بتصيرين مينونة مب زين الزعل فترة النفاس

ومرت العشر ايام وقرروا ان تصير عمليتها في امريكا لانها صعبة وتمينا نحاول نخلص اجراءات السفر وكل يوم يطلع لنا شي و3 شركات طيران رفضوا يشيلون بنتي معاهم لانها بالحضانه ومعاها دكتور ونيرس

صار للبنت شهر ولحين ماخلصنا شي والله ماراد لنا نروح امريكا وانا قلبي يحترق اشوفها من ورى الجزاج بدال ماتكون عندي ف البيت وارضعها كنت اشفط لها حليب ويعطونها بواير موصلينها لين معدتها والمعاملة كانت خايسة من النيرسات يخرعوني بدال مايطمنوني ولايخلوني امسكها كل يوم كنت اروح اقول في نفسي يمكن خلاص الله ياخذها مني واتوقع اني ماحصلها في سريريها:sad:

وعقبها قالوا خلاص العملية بتكون في لندن والحمدالله خلال 3 ايام مع اني كنت خايفة ومابي لندن سبحان الله عسى ان تكرهوا شيا وهو خير لكم خلصنا اجراءات السفر وسافرنا ف الطيارة كان معانا دكتور ونيرس وطول الوقت كنت اصيح خايفة عليها لان شالوها بالحضانه مالتها ودخلوها بالاسعاف لي الطيارة وكل شوي ينزل الاكسجين عندها لين ماوصلنا مطار لندن خذوها بالاسعاف لين المستشفى
ورحنا وراها هناك شفاها الدتور وقرر عمليتها تكون بتاريخ 28/12 صادف يوم الوقفة وقبل العملية كلمنا عن مخاطر عمليتها قال لنا بلاوي ونسبة نجاح العملية 85% واخر شي قال احتمال الوفاة موجود:sad:

توكلنا على الله ووقعنا على اوراق عمليتها وقالولي ان الصبح بيدخلونها العمليات وبيحطونها على ريولي وبيعطونها البنج قلتها ماقدر استحمل اشوفها في هالوضع ماقدر اجيكم دخلوها بدون ماشوفها وليلة العملية كانت بنتي تصيح ماقدرت امسكها ولا اقرب صوبها كنت حاسة اني مب شايفتها عقب هاليوم:sad:

المهم دخلو بنتي العمليات الساعة10 وانا طول هالفترة اصيح وادعي واقرى سورة يس
وصج كانت اصعب لحظات مرت علي في حياتي حتى ياتني دكتورة نفسية عشان حالتي النفسية كانت زفت تكلمني وتحاول تهديني لان محد كان معاي من هلي غير زوجي وامي كانت في الحج وتدعي حق بنتي

وع الساعة 3 ياتني النيرس وقالت البرفسور الي سوه عملية بنتي شافته طلع من العمليات يعني معناها العملية خلصت وطمنتي هنيه ارتحت وحمدت ربي وبعدها بساعة طلعوها من العمليات وودوها للعناية المركزة كان منظرها ماينوصف ماتبين بنتي من الاجهزة كل جسمها شغال بلالاجهزة وكان جسمها بااارد ثلج وقبلها كانو موريني صورة حق بيبي وهو طالع من العملية شلون شكلة عشان مانصدم لما اشوف بنتي صج كانو مهتمين فرق مابين لندن وعندنا:sad:

وبعد ربع ساعة ياني البرفسور وقالي ان عمليتها نجحت وتحتاج فترة نقاهه وبعدها اقدر اخذها معاي البيت هنيه من الفرحة سجدت احمد ربي ج كان شعوري ماينوصف لاني تعبت بس كنت انتظر هاللحظة الي يقولون فيها بنتج بخير والحمدالله بعد كم يوم طلعوها من العناية وحطوها في غرفة عادية كنت اروح لها طول الوقت اقعد معاها واشيلها واقرى عليها وبس لين مارجعنا قطر وهي معاي في يدي :shy:

الحمداللله رب العالمين الي يسر وسهل لنا الحين كل ماشوف بنتي جدامي احمدربي سبحانه القادر على كلشي

والحين باقي لها عمليتين والله يسهل ويفرح قلبي مثل مافرحه ونجح اول عملية والحمدالله هالعمليتين اسهل من الاولى يمكن بعد 5 شهور تكون عمليتها الثانية لان المشكلة الي في قلبها ان الشراايين مب موصلة لين الرئة ماثر على تنفسها بس الحمدالله الحين احس بوااايد عن قبل ومعطيني ادوية لها لين العملية الثانية


وهاذي قصتي والله يشافي كل مريض ولاتنسونا من الدعا ء جزاكم الله كل خير


وياليت اي وحدة تعرف عن اي قصة نفس بنتي تقولي عنها وشصار معاهم وتطمنوني