خايفة عليها

السلام عليكم ورحمة الله وبركاته

بنات انا خايفة على اختي .. شوفوا شنو المشكلة ::

اختي صار لها شهر من ملجت .. وخطبتها كانت على الطريقة التقليدية " يعني وحده من معارفنا دلت بيت المعرس على اختي واحنا اصلا ما نعرفهم " .. المهم اختي تقدموا لها وسوت مقابلة مع الشاب في نفس الليلة وبعد ما مشوا تفاجأت بانها قاعدة وتعلق عليهم بسخرية بما فيهم الشاب :qaq:

هي قالت ليلتها انها بتفكر في الموضوع انا توقعت انها راح ترفض من طريقة كلامها عليهم لكن لما سألها ابوي بعد اسبوع " بعد ما سأل عن الشاب " عن رايها واذا كانت موافقة او لا استغربت يوم قالت اذا انت موافق انا بعد موافقة .. :qaq:

المهم انها طول فترة التجهيز للحفلة والين الحين وهي دايما تسخر من اهل خطيبها وتقول انها ما تحب تزورهم ولا تحب تقعد معاهم وانهم يعيشون مثل مال قبل " مو متطورين على قولتها " مع انهم وايد يحبونها وهي بنفسها تعترف بهالشي .. وللعلم ترى هي بتسكن معاها بعد الزواج في شقة ..
وفوق هذا تسخر من خطيبها بعد مع انه وايد زين معاها حتى امي تقول ان لما يجي خطيب اختي البيت وتقعد معاهم تلاحظ ان اختي ما تقول اسمه ، دايما تقول " هذا " وهي تتكلم عنه .. مثال ::
" هذا بعد بيوديني المكان الفلاني "
"هذا بعد يقول هالكلام "
ومن هالقبيل , وساعات يتصل فيها يبغي يمر عليها تقوم ترفض من غير سبب مقنع بس لان ما لها مزاج تطلع او تبغي تشوف فلم في التلفزيون مثلا .. ومرة اصر وجاها عند البيت ولزم عليها انها تجي معاه قامت ونقعته ساعتين وهي تتجهز ولما راحت امي تستعجلها قالت " خل يولي انا قايلة له لا يجي .. يوم سواها وجاء خل يستحمل " ..

تخيلوا وحدة تقول عن خطيبها في بداية حياتهم " خل يولي " .. واحيانا "ما علي منه " ..

انا خايفة عليها من هالاسلوب .. واذا كان الحين خطيبها يستحملها لانها جديدة اخاف بكرا يمل من هالاسلوب وتصير مشاكل او شي بينهم .. وامي بعد خايفة عليها وااايد وياما كلمناها لكن ما في فايدة .. راكبة راسها وتقول ان اللي تسويه عادي وان احنا اللي مكبرين الامور ..


عموما اختي هذا طبعها .. عصبية ... عنيدة ،، الخدم في بيتنا دايما يتشكون من انها عصبية معاهم وحتى اخواني اللي اصغر منها دايما تعصب عليهم واحيانا تضربهم .



شنسوي معاها ؟؟!!!!!!!



ادعوا ان الله يهديها ولا تخرب بيتها بنفسها .. هي بتتزوج في عطلة الصيف ان شا الله :sad: