أفكار لتنظيم شغل الخادمه

وينكم يا بنات

السلام عليكم
اهم شئ من اول ما توصل تكونين مجهزه لها جدول واضح تتقيد فيه وتكون المتابعه دقيقه من البدايه خصوصا انتي عندج بيبي بالبيت .
انا بعطيج جدول بسيط اتبعه مع الشغاله وان شاءلله تستفيدين منه :

الاستيقاظ الساعه 5:30 الصبح عندها نص ساعه تضبط نفسها وتاخذ شاور المهم انها تكون موجوده الساعه 6 الصبح , تسوي الفطور والشاي بعدها ما اشوف خيالها الا بعد ما يطلع زوجي يروح الدوام. عن نفسي ما احبها توقف على راسنا ... بهالوقت ممكن تخلينها تتناول فطورها اهي بعد بس اهم شئ بعيد عنكم او في الطبخ الخارجي. انا ما احب الخدامه تخرب علينا الجو من الصبح انا و زوجي بما ان بنتي بهالوقت تكون نايمه :P

الساعه 8 تغسل الهدوووم ... بما انكم 3 بالبيت يعني غسيل الهدوم ما راح ياخذ منها اكثر من ساعه , طبعا اكو ملابس تنحط بالغساله واكو بالإيد ( يعني بالوقت اللي بالنص ممكن تسوي لها شغله ثانيه ) انتي تقدرين تحددين على حسب الوضع. ممكن تنظف المطبخ على ما تخلص الهدوم اللي بالغساله .... راح تكون الساعه 9 او 9:30 بالكثير على ما تخلص.

الساعه 9 او 9:30 تكون بنتي قعدت من النوم يعني ممكن نشغل المكنسه الكهربائيه ( بما ان نومها خفيف وتقعد على اقل صووووت ) , بهالوقت تنظف الصاله والغرف بالمكنسه الكهربائيه بعدها تمسحها بالماء والديتووووول علشان الريحه المنعشه من الصبح .

الساعه 11:30 تدش معاي المطبخ علشان نطبخ الغدا تقريبا ساعه ونص ونخلص من كل شئ
بعدها اخليها ترتاح او تاخذ شاور المهم كيفها لغاية ما يوصل زوجي ( طبعا قبل لا يرجع من الدوام بساعه تكون اهي جهزة طاولة الاكل ).

بعد الغدا وبعد ما تخلص شغل المطبخ اخليها تروح غرفتها ساعه ونص او ساعتين ترتاح ( بس شغالتي نحيسه مرات ما ترضى تروح ترتاح ) مسكينه تبي تقعد تلعب مع بنتي بس انا ما ارضى (اغار :( ) بنتي مرات واهي تلعب معاها تبوسها وتقول لها حبيبي مثل ما تقول لي انقهر من قلب احس ان هالكلام بس لي انا شكو تقوله لها , ادري طلعت برا الموضوووووع

طبعا بعد صلاة المغرب تكوي الهدوم تغسل الصحووون لاني ادش المطبخ اسوي عشا حق بنتي ترتب غرفتها لانها تكووون في حالة فوضى بعد اللعب مع ابوها , يعني الشغل بالليل يكوون خفيف بعد يووم حافل , بعدها تستأذن مني وتروح تنام تقريبا على الساعه 10 او 10:30 وانا اذا ما ابي منها شئ اقول لها روحي نامي .

اهم شئ عزيزتي تحطين لها مهمه كل يوم ( مثلا : يوم تمسح الدرايش , يوم الثريات والمصابيح والمراوح , يوم تنظف الثلاجات , يوم تطلع كل الصحوون اللي بالمطبخ وتمسح الخزائن من الداخل وترجع الصحون مره ثانيه .... الخ , طبعا انتي تقدرين تحددين المهام مثل ما قلت لج على حسب متطلبات بيتج ... بس نصيحه لا تخلينها تطلع بروحها او انج تدزينها السوبرماركت ولا انها تقعد فاضيه ,طبعا مو قصدي نذبحهم من الشغل لا حرام هم اهم بشر ولهم طاقات .. بس ما اعرف شنو يصير فيهم لما يقعدوون فاضييين يفكرون بشغلات غريبه واكيد تعرفين سوالف الخدم الله يكفينا شرهم.

اتمنى اكوون ساعدتج بعض الشئ من تجربتي البسيطه
وعساااج على القوة
.

اسمحيلي اختي ما عندي خبره عن الخادمات بس المهم ان اتخلينها اتسوي شغلها اول باول..
وعوديها على اهم الاشياء
الصبح تقوم اتجهز الريوق وتغسل الملابس
وبعدين تدخل اتنظف الغرف من تنظيف حمامات و الدرايش ولازم تشرفين على شغلها من وقت لوقت واذا شفتي شي مب عاجبنج قوليلها...
واهم شيء بعد انج اتكونين وياها زينة ترا الخادمات الحين ما منهم امان
هذا كل اللي عندي والسلاااااام

موضوع حلو ..

هو أهم شي إنج تتابعينها من البداية .. و لو شفتيها تشتغل من نفسها يعني مثلا امسحت الدرايش

لا تقولين لها شي خليها .. بس شوفي شغلها اشلون ..

يعطيكم العافية .. اسمحي لي أختي أتابع الموضوع معاج .. و أستفيد من خبرات الاخوات ..


- سؤال : إحنا في البيت شخصين .. و شغالتي ما عندها ذاك الشغل -

جدولها :

كل يوم صبح : تكنس بالمكنسة البيت كله ..

تنظف الطاولات .. و الإكسسوارات الموجودة ..

تنفض الكنب ..

ترتب المكان ..

تغسل المطبخ و تمسحه بالديتول ..

لو كان عندها غسيل بتغسل / و نفس شي للكواي ..

غسيل حمامات ماعندها غير حمام غرفتي الله يعزكم .. تغسله بوجودي في الغرفة ..

و ريلي ما يكون موجود .. و نفس الشي لكنسها ..

** طباخ ما عندها **

يعني أغلب يومها ماعندها شغل و في غرفتها .. و انا هالشي محيرني ( ساعدوني ) لأني

مابيها تتعود على الشي إن مافي شغل ..

بيبي لوشن
الصراحه ما قصرتي بمعلوماتج المفيده واااايد الله يجازيج خير حبيبتي على كل حرف كتبتيه

أم السلطان
مشكوره حبيبتي عالنصيحة و صدقج ما منهم أمان

دوحانية

هلا حبيبتي فيج في الموضوح و إن شاء الله نقدر نستفيد كلنا من هالموضوع لأنه الخدامات تحتارين كيف تعاملينهم

و أتمنى البنات يتفاعلون مع الموضوع و كل وحده تفيد الثانية ولو حتى بفكره بسيطة

هلا بنات في فكره في بالي قلت يمكن تفيدنا طبعا الخادمه كل يوم بتظف الغرف بس بحددلها يوم في كل أسبوع تنظف غرفة معينة تنظفها تنظيف شامل درايش و فوق الكبت و الثريات

انا قاعده بدون خدامه بسبب اني ماابي اجيبها تقعد بروحها
البيت مافيه شغل .. اقوول لو جبت لي خدامه بتصيدها أكتآآآب

بس الصراحه محتاجه مليت بروحي اسوي كل شي

سحابة حب

والله حتى أنا ما ابغي الخدامه بس تعبت بغيت ارتاح شوي خاصة بعد ماياني الولد

موضوع جميل

أهم شيء انه اول اسبوع للخدامة لازم يكون فيه وايد شغل عشان تتنشط الخدامة وما يجيسها كسل

وبعدين ممكن تخف الشغل

ماريه
صدقج والله أهم شي البدايه عشان تتعود

تسلمين على الموضوع.......

اختي دوحانيه انا نفسج.. نحن شخصين في البيت... وشغالتي ماعندها شي تسويه..

غير التنظيف.............

الطبخ انا او بيت اهلي............

وطوووووووووووووووول اليوم .. يا ناميه .. يا تتابع قناة ام بي سي 2

شو اسوي؟؟

نصيحتي


أول ما توصل البيت

جهزيلها عقد فيه انه لو لقيتو عندها موبايل أو طلعت من البيت بدون شور انكم اتسفرونها بمعاشها يعني لا تعطونها معاشها اول بأول ,, خلوها شهرين متأخره عن المعاش ,, صدقيني لو عطيتيها المعاش أول الشهر بتتبطر عليكم ولابتسمع الرمسه بس يوم بتحس انكم في أي غلط بتسفرونها بتتأدب


ثاني شي
سوي جدول شهري اي راتب تستلمه توقع عندال التاريخ
لأنهم واااايد يسوون حركات ماعطيتوني معاش وهالسوالف



ثالث شي
خليها ترتب الدواليب وكبتات البيت من أول ويديد وشوفيها مرتبه ولا لا وإذا لا علميها كيف ترتبه مب اي كلام

رابع شي
قوليلها ما تشوفينها يالسه وزوجج في نفس المكان
يدخل هو تطلع هي من البيت ,, والله حرام يشوفها على كل وقت تتمشى في البيت
ولاتيبين خدامه حلوه تراها فتنه للزوج

خامس شي
اي شي يباه زوجج انتي يبيه مب الخدامه يمكن تقولين انج متعوده بس يوم بتي الدامه وااايد بتعتمدين عليها ,,
لاتخلين زوجج يحتاجلها في اي شي من ماي لين الثياب



وبس طولت عليج بس صدق كل هالأشياء استوتلي وانا مقروصه من الخدامات عدل

الله يوفقج وتلاقين خدامه زينه تراهم نادرات هالأيام

خواطر
حاولي اطلعيلها شغل عشان ما تقعد فاضية أو وديها بيت أهلج تساعدهم في الشغل

أميرة المناره
الصراااحة نصايحج واااااااايد مفيده و أحس صدق منقرصة من الخدامات واااايد الله يسمع منج و نحصل خدامه زينه

السلام عليكم
انا نفس الشي مالي عازه في الخدامه بس شاسوي هد حيلي الكوي ولوع جبدي
انا جبت اثيوبيه والله يبارك فيها ان شاء الله
انا بس انادي عليها اذا راح زوجي ترتب المكان وتخم وتغسل مواعين المطبخ لاني بملحق
عند اهل زوجي بس لقول لهل شوفي فيه حد يبي شي سوي له
والحمدلله
بس عاملوهم انهم بناتكم ولولا الفقر ماجاو عند حد يدورون الرزق
صدقوني بيخدمون من عيونهم

شونيز
هلا حبيبتي فيه منهم إدا عاملتيهم زين ما ينفع معاهم و العكس الواحد يحتار كيف يعاملهم، والله يباركلك فيها و يرزقنا وحده فيها خير

الله يعينك أختى على الخدم.. أحيانا هم على القلب.. أنا ماجبت خدامة الا بعد ماولدت ولدي بخمس شهور... حسيت أني كنت باموت من الشغل ومجابل الولد وأمي كانت تقوم بكل شي الصبح لما آروح الدوام....

شوفي أنا كنت آخذها كل يوم مع ولدي الصبح بيت أمي لما آروح الدوام.. قبل مانطلع تكون قامت وتغسلت وسوت سندويشات زوجي ولي وتقوم تكنس غرفة التلفزيون وتمسحها وتغسل الحمام الثاني ونطلع.. طبعا في بيت أمي لأن أحنا نتغدى عندهم فتساعد شغالة أمي بغسل الصحون..
لما نرجع الظهر نحط الثياب بالغسالة وترتاح شوي وبعدها تقعد تكوي.. لما يطلع زوجي تدخل تكنس غرفتنا وحمامنا.. وأنا أجهز للعشاء وتكنس غرفة ولدي والصالة الخارجية وبس بعدها تغسل صحون العشاء وتنام...
بأيام الإجازة تنظف النوافذ وتكنس عند باب الشقة ونبدل الشراشف والعادة نطبخ الغداء بأيام الإجازة فتساعدني بالمطبخ...

شغالتى راحت من شهرين وأنا هلكانة من الشغل وتوني طالبة جديدة... أدعوا يابنات بس الله يسخرها لي وتكون زينة....

حبيت اشارك بالموضوع ..انا عندي شغاله لكنها ماتنظف عدل وتعبت من كثر مااكلمها ومرات بروحي انظف والشي ما تركز فيه يعني شغل على الطاير والمشكلة اني وايد ادقق او اني بدون تدقيق او قصد اشوف الشي وصخ وغير منظم والشقة صغيرة وما فيها شغل وايد والمطبخ وايد صغير والمكان انا ملمعة قبل لا اتي وايبين كل شي لاني تعودت على النظافة وما ادري شو اسوي مااريد اظلمها ولا اني اشد عليها بس ابيها تركز على الشغل وعلى كلامي لانها تسمع وما اتنفذه بس اتقولي انزين ساعدوني شو اسوي والله خايفة على عيالي لاني على ولادة وافكر في اليومين اللي بكون بعيد عنهم لانها شوي قاسية معهم وتتحكم وما تنفذ طلبهم واتعصب عليهم على اي شي لانهم صغار ما يقصدون لكن شو بسوي طاحت بجبدي
اتمنى حد يقولي شو اسوي وياها اسكت واتوكل على الله او اني اقسي عليها لين ما تركز على شغلها وبعدين ابدا معاها بلين
اتمنى مشاركات البنات اتساعدني

[grade="00008B FF6347 008000 4B0082"]انا نفس الشي الصراحه مثل ما قالت اختنا بيبي لوشن بس انا ما عندي عيال وحاليا حامل بس مرتبة لها الشغل بس نص اليوم فاضية لاني ما اطبخ خصوصا شوي وضعي شعب بس يعني عندها غسيل وكواي وتنظيف بيت وغسيل حمامات ،، بس من تخلص تروح بيت عمي تساعدهم والحمدالله واااااااااااايد اووووووكي والكل عايبتنهم شغالتي :) وطبعا في اشياء اسبوعيه مثل تنظيف الدرايش ومسح البيبان وتنظيف السطح مثلا والمراوح حسب البيت :) والله يوفقج ان شاءالله[/grade]

ومنكم نستفيد