زوجي (يمزح) وأنا (أموت قهر)

السلااااااااااااااااام عليكم

شلونكم شخباركم .. شمسوين عساكم بخير:gum:

(حسبالها داخلة ديوانية)

المهم بنات بدخل في الموضوع طوالي .. بعضكم بيعتقد أن مشكلتي بايخة أو لا تقارن بالمشاكل الثانية .. ولكن الله يعلم انها تسبب لي احراجات كثيرة :sad:

انا عمري 19 الحين والله أكرمني قبل كم شهر تزوجت وزوجي مب اكبر من بوايد، يعني لايقين لبعض وهو حييييييل طيب معاي وكريم، وأهله بعد :shy:

ولكن ........ الحلو ما يكمل (على قولة المثل)

زوجي داااايما يمزح وينكت ويتطنز ... طبعا اذا كان يتطنز على احد غيري (مب مشكلة)
لكن اذا افترت الموجة علي .. تخيلوا كنه بنطلع من بيتهم جان يقول لي: (قومي يا الدبدوبة) وأنا انحرجت قدام اهله وانقلبت الواني :o

وبذكر لكم مواقفه معاي:
كل ليلة قبل ما ننام انا وياه يقوم واحد منه يطفي النور (عاد اهو كلششششش كسلان وخايب) كل يوم يقص علي ويخليني انا اطفي النور ، وفي يوم قال لي (قومي حركي فطورج و اطفي النور) جان تحوشني صدمة ، قلت له (أنا أم فطور؟؟) جان يدارك الموقف بسرعة ويقول (لا لا حاشاج بس أنا أبو فطور وما احب اكون بروحي ، وبعدين أنا أبو فطور لازم تكون زوجتي أم فطور صح هع هع هع ) >>>> صج ثقل دم :angry:


وفي الصبح كل يوم لازم يطقني بس بمزحه .. أنا أكون قاعدة اطالع روحي في المراية وهو من وراي يقول لي (تعرفين شلون يلعبون بولنغ) اقوله (اي) يقول حتى لو تعرفين بوريج شلون ويجي من بعيد يسوي نفسه يلعب بولنغ ويطقني ويوم يسألني تعرفين شلون يلعبون قدم و(يشوتني مثل الكرة) وهذي قصتنا كل يوم
:cry:


تخيلو مره كنت معاه في السيارة وكان لازم يدخل (الحمام) وانتو بكرامه تم يقول لي (ابي اروح بيت الراحة قلت له ما بقى شي عن نوصل بيتكم قال لااااااااااا لازم اروح الحين قلت له انزيين شنو بتسوي؟؟ قال الحين اوريج واحنا كنا في الشارع بس ما كان طريق عام ويوقف السيارة ويطلع (حافي القدمين) ويركض لي كأنه بزر وكان في مسجد على الشارع ودخل الحمام هناك والحمدلله اني أعرف اسوق والا جان توهقت بروحي في السيارة، والناس تطالع زوجي وهو يركض حافي وانا محرجة جدا :eek2:



بس الاحراج الحقيقي لما نكون في بيت اهله ويمزح معاي او ينكت علي، وحتى لما نروح مطعم او مول لازم يحرجني مع الناس

ولو بقول لكم كل مواقفه بنقعد لي الصبح

بنات شسوي أنا من عائلة ما تعودت على التهريج والنكت وابوي يعتبر الرجال الي يمزح
طول الوقت (مب رجال) ، ومن جذي أنا ما اخليه يحتك بأبوي وايد
وأنا مره كلمته بطلف وحنية وقلت له عن هالموضوع جان يزعل ويقول لي خلاص انا ما عاد امزح معاج .. ويزعل ساعتين وينسى بعدين ويرجع يمزح معاي (فديته طيب) بس هذا عيبه دايما يمزح
حتى لو الوقت مو وقت مزح
بنات أنا أتأثر بسرعه من كلامه يعني لو نكت علي وقال لي يا الدبدوبة او كلمات ثانية ، حتى لو كنت ادري انه قاعد يضحك وياي بس أتأثر وهو يقول لي إنتي ثقيلة دم وما تعرفين للمزح

بنات انصحوني شسوي معاه؟؟؟؟؟؟؟؟؟