قمت اشك بنفسي ... يا جماعة انا صح والا غلط ؟؟؟؟

السلام عليكم
خواتي انا حبيت اعرض عليكم الوضع الي انا عايشته و انتوا قولوا لي انا تفكيري صح والا غلط
انا صار لي سنتين متزوجه واحد يقرب لي عن حب و عندي ولد
مشكلتي اني من بداية زواجي كنت واااايد اسمع كلام الي حواليني يعني امي و اهلي بللي يعنيهم واللي ما يعنيهم و المشكله انهم تعودوا على هالشي
انا عايشه في بيت اهل زوجي عندي غرفتين و مطبخ و حمام بس مو مسكرين يعني معاي في نفس الطابق غرفة حماي و غرف ثانية يستخدمونها اهل البيت
خلوني ألخص لكم بعض المواقف على شكل نقاط و انتوا قولوا لي الي قاعد يصير لي صح و الا غلط

1) في بداية الملجة كنت ابي اسكن في شقة بروحي بس خالتي ام زوجي اقترحت ان نسكن معاهم في البيت انا وافقت لان زوجي ارتاح للفكرة المشكلة الحين ان زوجي مرتاح بس انا كلش مو مرتاحة يعني تخيلوا علشان اروح الحمام عزكم الله لازم اتحجب :angry: غير جملة خالتي المعهودة الي تكررها كل يوم متى بتطلعون من البيت راح تقولون لي تتغشمر ميخالف تتغشمر مرة مرتين بس مو مية مرة

2) تخيلي الموقف توج راده من الجمعيه و شاريين اغراض البيت و تعطيج خالتج القنبلة : اشدعوه شاريين كل هذا ليش اشعندكم او مثلا اول ما تزوجنا عطونا هدايا فلوس عطتنا لسته كاتبه فيها شنو لازم نشتري ( بدون تعليق )

3) طبعا عادي الكل يدخل غرفتنا من غير استئذان و اذا تكرموا و تعطفوا يطقون الباب مرة و اذا ما ردينا يفتحونه و يدخلون و اذا الغرفة مو مرتبة لازم اسمع (( ليش داركم معفوسه )) و جم مرة تدخل خالتي و انا بقميص النوم مثلا او لابسه قصير و عاااااااااااااااااادي ولا كأن في شي لدرجة اني الحين ما قمت البس حق زوجي في البيت كله بجامات عادية

4) خالتي وايد تتدخل في تربيتي لولدي يعني انا قلت ما ابي اوكله قبل 6 شهور يوم من الايام دخلت البيت جان تقول لي ترى انا وكلته .....

5) التدخل في الاشياء الشخصيه جدا جدا جدا بيني و بين زوجي و تقول لي اشياء عن زوجي والله استحي اقولها و اسمعها

انا ما ابي اقول لزوجي لانه مرتاح و مابي اضايقه بس انا مو مرتاحه و صرت اكره البيت
قولوا لي لو هذا يصير فيكم شنو راح تكون ردة فعلكم
ريحوني و الله يعطيكم العافيه