بـــاركـــولـــي عقب بخبركــم قصة ولادتـــي .....

[glow=FF9933]مرحبا يا عرايس شحالكم عساكم بخير ...........
باركولي انا ربيت ويبت بنوتة حلوة سميتها آمنة .... بحطلكم صورتها عقب ....

انا الدكتورة قالت لي ولادتي بتكون في 23 ديسمبر بس تاريخ 3 ديسمبر الساعه خمس العصر حسيت ظهري شوي يعورني وقلت في خاطري تو الناس على الولادة باقي عشرين يوم .... المهم تم الالم الي في ظهري يروح ويرجع كل ساعة تقريبا وانا ما خبرت حد حتى ريلي واهله ما قلت لهم وتحملت الالم لين الساعه 12 في الليل ما قدرت اتحمل اكثر وريلي يقول لي ها يلا انروح المستشفى طبعا هو كان فرحان لانه بشوف بنته ..... هو يشوفني اتالم ويقول لي يلا قومي وانا اقول له لا عادي بتحمل .... المهم الالم قام اييني كل ربع ساعه وصارت الساعه وحدة وانا بعدني في البيت ...... بعدين قام الالم يزيد كل عشر دقايق حسيت ان البيبي بيطلع .... قلت حق ريلي يلا قوم بروح المستشفى .... رحت خذت شاور وبدلت ملابسي وشنطة المستشفى كانت جاهزة من قبل وطلعت من البيت على الساعة 2:30 وانا في السيارة ريلي يضحكني وانا اتالم واضحك والله لو حد شافني بيقول هاي مب صاحية .... المهم وانا رايحة المستشفى كان الالم كل ثلاث دقايق يرجع وكل الالم كان في ظهري ..... يوم وصلت المستشفى قالولي النفس فاتحة ثلاثة سم ......... لين الساعه خمس الفجر صارت خمسه سم وريلي يترياني قلت له روح البيت لا تخاف علي ........ طبعا بعد ما قنعته يروح البيت راح ............. وعلى الساعه سبع الصبح صارت النفس فاتحة 8 سم والماي بعده ما نزل ..... عقب يت الدكتورة وفتحت لي الماي قالت لي خطر عليج عشان من قبل انا مسويه عملية وضغط البيبي مب زين في هالحالة عشان جي فتحت الماي ........ وعطتني ابرة عشان الالم يكون بارد ......... المهم عقب ما عطوني الابرة حسيت نفسي في عالم ثاني ............ والله اني انام واقوم اضحك وارجع انام ........... وانا اشوف السستر اتطالعني وتضحك ........ الساعة تسع ونص الصبح حسيت اني خلاص ما اقدر اتحمل الالم واقول حق السستر يلا ودوني غرفة الولادة انا الحين بربي احس بالبيبي يطلع ... وهي تقول لي لا ما بوديج لين اشوف شعر البيبي ................ المهم عشر الا ربع تقريبا الله سهل علي وودوني غرفة الولادة .............. طبعا بعد ما طلعت عيوني ........طلعت امونه فديتها ........... والله ان الولادة شي فظيع فعلا ..... حسيت ظهري من كثر الالم متخدر بس عقب ما طلعت امون سبحان الله كيف كل الالم راح في ثواني ............ والحمدلله تمت ولادتي على خير وتــــــــــوبه مرة ثانية افكر في شي اسمه حمل ............... عندي ثلاث بنات الحمدلله لك الف حمد وشكر............الله يسهل على كل حامل ولادتها وانشالله يرزق كل محرومة قولوا آميـــــــــــــــــــــــــــــــــــــــن

والسموحة
أختكم
أم مهرة

نسيت اقولكم اني عقب ما خلصت وطلعت امون تميت اصيح من الفرحه وقبل الولادة دمعة وحدة ما نزلت مني ...... ليش مادري [/glow]