صورة مع التحية ل.... ( شــــاعر المليون ) !!

[poem font="Arial,6,black,bold,normal" bkcolor="transparent" bkimage="" border="none,4," type=0 line=0 align=center use=ex num="0,black"]
ياقصيدي اقضب القاع ... نوّخ للذلول = الركادة ياقصيدي تراها راس مال

والله إني ماخَبَرْتَك على رزقك عجول = وش علامك تلكز الضلع وتخج الوصال

الهدا وابْشِر بعزَّك إذا حان المثول= شاعْرَك وانت إتْخَبَرني أخِصّك بالزلال

شاعْرَك لاهو منافق ولاهو بالجفول = تنحني له ألف قمة ويقْصِر ألف جال

مايقلّد شعر غيره وْلاهو بالنطول = إنْ عطى يعطي السمينة وصيداته جزال

الشعر ماهو تفطِّن ولاهو أكل فول = الشعر توليفة إحساس وخْصوبة خيال

الشعر معنى ومغنى ... خُلاصة في شمول = الشعر عمق البساطة ..هدوء الإنفعال

الشعر صناعة الفرق .. توحيد الميول = عبقرية لفظ عادي ... مثيرٍ للجدال

ياقصيدي صح شاعرك بالساحة كسول = ماضرى لمزاحم الناس في قيلٍ وقال

ويمكن إنه بعض الاحيان ينتابه خمول = لكن أصدافه ثمينة ولو كانت قْلال

وْلايقول إلا لأنه يبي فعلاً يقول = ولايغنّي لجل الأسياد مرهين الشوال

يوم بعض الناس يملا من لسانه عْدول = ويفتدي لرضا شيوخه عمامه والخوال

وإيتنازل عن مباديه حباًّ بالوصول = والمصالح لعن أبوها ضريبتها ذْلال

وينكسر بيدين سِيْده مثل بنت ٍ خجول = ينحني وإيقبّل الكف وإيبوس النعال

ياكثر ماقال الأصحاب تكفى يامْهَشول = سابق الشّعّار وامدح صناديد الريال

دسّم الشارب بالأنعام لاتسمع عذول = لاتشيّم يابو خالد ترى الدنيا سجال

كبّر اللقمة وخلّك مثل غيرك أكول = الفرص ماكل يومٍ تجي لك بالمنال

مادروا إني مشاكس ولي رايٍ صمول = لاتغيّرني مكانة ولا حاجة لمال

المشاعر قطعة الروح مافيها ميول = المشاعر عند الأجواد أغلى مْن الحلال !

وكان هذا من عيوبي فأنا ماني زعول = وكان هذا من خبالي فأنا كلي خبال

ياقصيدي شاعْرَك غير وإنْ قالوا جهول = شاعرك مايلمس القاع إلا بابتهال

ياقصيدي شاعْرَك غير لو قالوا ملول = مالغير الله يركع ويخضع بالسؤال

كم شرب من مر الأيام في شتى الفصول = وكم شكى طعن المآسي وغارات الليال

وكم تحدّتْه المسافات في عرضٍ وطول = وياكثر ماهو تحمّل من همومٍ ثقال

إنولد في سهلة البرد وبصحرا الذبول = في زمان السيد الجوع والحاكم ريال !

أرضعته أمه شقاها وغذّته النحول = وإنفخت من روحها فيه من لطع الخْلال

شد عوده وابتدت فيه نظرات الفضول = وقام يسأل عن أمورٍ لها ألف احتمال

جاوبنّه سود الأيام وأشّر بالقبول = وسل سيفه للمناطح وهاجر للشمال

وابتدت رحلة عذابه على دق الطبول = ياقصيدي شاعْرَك عاش عمره بالنكال

كان في عمر الطفولة شبيهٍ بالكهول = ماعرف معنى الهدية ولا لمسة دلال

مالقى بالبيت غرفة ولاسقفٍ يحول = بينه وبين أشهب البرد وهْبوب الرمال

ياكثر ماغرّق الما فراشه بالسيول = وياكثر مااحترقت إيديه من شمس الزوال

وكم كتب درسه على الشمع أوقمرًا أفول = ياكثر ماهي تخونه الياشدّت رحال

وياكثر مابل ريقه بدمعات الذهول = وياكثر مابح صوته ولاأحدٍ فيه سال

وياكثر مانام واقف وبالحزن إمغيول = وياكثر مافش خلقه على كومة رمال !!

وياكثر مايدعس الشوك حافي بلا نعول = كل شوكة في حياته لها قصة لحال

الطفل باسه خرافي وزوماته تهول = كل دمعة خوف صارت تحثه للوصال

اكتسب صبر الرجاجيل وإقدام الفحول = وصار يبني من جروحه مشاريهٍ طوال

ياقصيدي شاعْرَك غير وإنْ ظلّت عقول = شاعرك مرهف إحساسه وعنده طول بال

شاعْرَك ماهو فقاعة يجي يوم وتزول = ثابت المبدأ يحاول يقرّب للكمال

شاعْرَك عنده رسالة ولاعنها عُدول = مايلبّي كل صوتٍ ينادي له تعال

ولايجي مع كل طاري ويتبع كل ضول = يدري إن مراكض الناس ضرب من الهبال

ياقصيدي عم صباحاً .. ولاترضى الأفول = وإن نخيتك ياالنداوي تولّم للنزال

والله إنّي ماأهينك لجل بعض الخبول = دام راسي يقضب العلم وإيشيل العقال

إنْ هجيت أهجي بلاظلم وأمدح بالأصول = وإنْ نخيت أنخى حرارٍ صدوقين الفعال

وإنْ شكيت أشكي الى الله من ثقل الحمول = وإنْ بكيت أبكي لحالي وأسنّد للجبال

وإنْ ذكرت أمجاد ربعي فهذا قد يطول = والله إني مااحتويهم ولاحولي مجال

مشبعين الذيب الأمعط غزيرين الهطول = ساترين المستجيرة كثيرين الفضال

عِزْوَةْ الناموس ربعي .. ولايرضى الزعول = مالكين الصف الأول بدون أي انفعال

ماتِتّقّوا لاحمى الرّمي في وسط الدحول = ينطحون النار بالنار....وحْداهم يلال

مرخصين الروح فدوة لجل عين البتول = ماارتخوا يوم الجنايز مثل رمي النبال

لانختهم وايليّة ودقّت بالحجول = جاوبوها قبل ترمش : لعينك ياغزال !

بيّن متكسّر وميّت وهارب ومْهبول = المعادي تاركينه ..... اليا كْتَفّ القتال

لابة الويلان ربعي مْضَرّين الخيول = للدروب المستحيلة على عُصم الرجال

لامِدَحت عيال وايل ترى ماني عيول = أشهد إن عيال وايل من خيار العيال



شعر \ حمدان سالم العنزي[/poem]