يـا ليتنـي خدامـة بيـن اياديـك ..

قصيدة مؤثره تهتز لها الروح و البدن وتلين القلوب القاسية ..

*يـا ليتنـي خدامـة بيـن اياديـك ..


(ماعاش من يخليك خادمة يا يمه) ..

هذي قصيده مؤثرة لأم تشكي حالها بعد أن أخذها ولدها للمصحة (دار العجزة) ( دار النسيان) ..

والبيت أعلاه يبكي حتى الصخر القاسي..

أترككم مع القصيدة ..

وين أنت يا حمدان أمك تناديـك .. وراك مـا تسمـع شكايـا وندايـا

يا مسندي قلبي على الدوم يطريـك .. ما غبت عن عيني وروحك سمايـا

هذي ثلاث سنين والعيـن تبكيـك .. ما شفت طيفك زايـر يـا ضنايـا

تذكر حياتي يـوم أشيلك وأداريك . . وألاعبك دايـم وتمشـي ورايـا

ترقد على صوتي وحضني يدفيـك .. ما غيرك احدٍ ساكن فـي حشايـا

واليّا مرضت اسهر بقربك وأداريك .. ما ذوق طعم النوم صبـح ومسايـا

ياما عطيتك من حنانـي وبعطيـك .. تكبـر وتكبـر بالأمـل يـا منايـا

لكن خساره بعتني اليـوم وشفيـك .. واخلصت للزوجه وانا لي شقايـا

انا ادري انها قاسيـه مـا تخليـك .. قالت عجـوزك مـا أبيها معايـا

خليتني وسط المصحه وانا ارجيك .. هذا جزا المعروف ؟هـذا جزايـا؟

يـا ليتنـي خدامـة بيـن اياديـك . من شان اشوفك كل يوم برضايـا

مشكور يا ولدي وتشكر مساعيـك .. وادعـي لـك الله دايـم بالهدايـا

حمدان يا حمـدان أمك توصيـك . أخاف ما تلحق تشـوف الوصايـا

وصّيت دكتور المصحه بيعطيـك .. رسالتـي واحروفهـا مـن بكايـــــــــــا

وان مت لا تبخل علـي بدعاويـك .. واطلب لي الغفران وهـذا رجايـا

وامطر تراب القبر بدموع عينيـك .. ما عـاد ينفعـك النـدم والنعايــــــــــا


تحياتي لكم ..
frawla ..