صينية السمك العجيبة بخلطة الكريستال الرهيبة.(شوفوا واحكموا)

[INDENT]السلام عليكم ورحمة الله وبركاته

طبعا هذي أول مشار كة لي في ركن المائدة واتمنى هالموضوع يحوز اعجابكم ويبيض الويه..يلا نبتدي:

أولا: المقادير مثل مانتو شايفين في الصورة



المجموعة (أ)

أي نوع من السمك اللي تفضلونه وأنا اخترت الصافي (صورة رقم 1 )
فلفل أخضر وبصل وطماط مقطع شرايح مثل ماهو موضح في الصورة رقم (2)
ثوم مقطع قطع صغيره (مش مدقوق)
** الكميات على حسب عدد السمك وعلى حسب الرغبة اللي مسوينه.
ملح ،،،فلفل أسود مطحون ،،، حبوب كمون مطحون ،،، حبوب كزبره مطحونه
الدهن القطري الاصيل (الدهن اللي يسووونه من البقر،، ماأدري في البلدان الثانيه شيسمونه بس بتعرفونه من الدبة اللي في الصورة رقم 4 )(r)

المجموعة (ب)

بهار السمك (صورة رقم 3) بالاضافه الى ::قليل من الكرفس بس لاتكثرون ،،، زنجبيل أخضر مبشور (أنا ما أحط وايد عشان طعمه قوي) ،،، كمون مطحون (أنا احب طعمه في الاكل عشان جذي أكثر منه) ،،، ملح (أنا أحب أكثر منه لان حلاة السمك مبين فيه طعم الملح)
بصل ،،، ثوم ،،، عصير ليمون ( أنا استخدمت ليمونه وحده) ،،، كزبره خضرا ،،، طماط أحمر ،،،
نعناع ،،، فلفل أخضر ( الكميات على حسب ماتحبون وعلى حسب كمية السمك اللي انتو بتسوونها أنا ما كثرت لاني سويت 3 بس،،، واعذروني ماحطيت صور للمجموعه ب)

الطريقة



نغسل السمك ونسوي في شقوق بالسكين
نخلط مقادير المجموعه (ب) في الخلاط،،، الشكل النهائي للخليط صورة (5)
نتبل السمك بالخلطه ونتركه لمدة طويله (أنا خليته اربع ساعات) صورة (6 )،،، وبعدين نحمره صورة (7).
ناخذ الطماط ونحمره في شوية زيت ولازم مانخليه يذوب على الاخر بس نقلبه في الزيت ثلاث أو أربع دقايق مثل ماهو موضح في الصوره ( 8 ) وفي الصوره (9) شكل الطماط بعد التحمير.



نحمر البصل شوي (صورة10) ،،،ونضيف له الفلفل الأخضر (صورة 11) ،،، و نضيف عليه الفلفل الاسود والملح والكمون والكزبره المطحونه ( من المجموعه أ) ونخليه على النار شوي مع التحريك لين مايصير الشكل النهائي مثل الصوره (12)



الحين نجيب صينيه بايركس ونرشها بقليل من (الدهن القطري) ( صورة 13 )
نضع نصف كمية الطماط ونص كمية خلطة البصل والفلفل في البايركس(صورة14)
نحط السمك فوقه ونحط عليه باقي الطماط وخلطة البصل ونرش عليه شوية دهن (شوي مو تغرقونه) ونغطيه بقصدير وندخله الفرن تقريبا ساعه الا ربع او ساعه (صورة 15)
الشكل النهائي للطبق بعد مايستوي (صورة 16 )

وفيه العافيه[/INDENT]

بنات اللي بتجربه تقولنا النتيجه معاها شلوون واللي بتنقله تذكر المصدر حرام مجهودي يضيع وادعولي الله يجزيكم خير...
مع احترامي لكم