مشكلة ربيعتيه اريد حل لها حتى لو بدعوى صادقه من قلبكم

السلام عليكم ورحمة الله وبركاته



شحالكم عساكم بخير


بصراحه انا ترددت وايد قبل لا اكتب هالموضوع لاني بصراحه تعبت من كثر ما افكر في حل لربيعتيه ,,, بقولكم مشكلتها وباختصار

ربيعتيه تحب ربيع اخوها وهو بالمثل ,,, وللأمانه هو اللي بدى في حبها لكن محد يدري عن هالحب غيرهم هالاثنين ,,, بتقولون يمكن يلعب او يمكن ويمكن ,,, بقولكم بالعكس هو كان جاد في حبه لها بحيث انه رمس ابوه عشان يكلم ابوها يخطب له اياها ,,, لأنهم أصدقاء من أيام الطفوله وعلاقتهم وايد قوية ,,, الابو كلم أبوها ورد عليه انه بيشاور البنت لكن الحين مر شهر والابو ما سأل البنت ,,, ونفسه هو اللي يحبها كلم ابوها 3 مرات وفي كل مره يقوله ابوها ان شاء الله خير ,, اشتغل وفالك طيب ,,, والولد قبلوه في دوره شرطه لبريطانيا خمس سنين مع اخو البنت ,,, وبيرجعون منها ضباط بنجمتين ,,, يعني مستقبل ولا شخص يحلم فيه ,,, لكن الابو لين الحين مب موافقا نه يخطبها قاله عقب ما تخلص دورتك تعال اخطبها بس الولد يبا الحين يخطبها وعقب سنه بعد ما يرتب وضعه في بريطانيا بيتزوجها وبياخذها معاه


لكن المشكله مش هنيه ,,, المشكله انهم اكتشفوا انه ولد خالتها يباها ,,, والولد اول ما عرف بالموضوع سار كلم ابوها وسأله اذا صدق هالكلام والا لا ,,, فقاله الابو صح الكلام بس لين الحين رمسة حريم ,,, البنت ما تبا ولد خالتها تبا ربيع اخوها ,,, لكن ما تقدر ترمس اهلها لانه عندهم البنت ما يشاورونها اذا بتعرس والا لا ,, ما يسألونها عن رايهها ,, أدري بتقولون متخلفين ومعقدين بس هذي حياتهم ,,, الولد تعب من كثر ما يفكر في حل ,,, الحين هو يتريا ولد خالها يطلع من دورة الشرطه اللي بتخلص بعد شهر او شهرين عشان يكلمه يتنازل عن بنت خالته بس اخاف انه هالشي ما يكون لصالحه لانه ولد خالها من النوع العصبي والنذل ,, يحب يذل الاشخاص وما يعطيهم اللي يبونه ,,, وهو قبل متضارب مع اخوه الكبير بس عشان يخطبها !!!


السالفة معقده والسالفه اطول من جيه حاولت اختصرها لكم عل وعسى نحصل حل ,,, الحين نبا شي يقنع اهلها انهم يوافقون عليه ويرفضون ولد خالتها بس كيف ما اعرف؟؟؟



ياليت تساعدوني الله يجزيكم خير