دعوة لكل المربيات كيف كان شعورها ووضعها وقت الولادة صح انه شي محرج بس خلونا نسولف

أنا توني ماما جديدة ولدي عمره شهور3 ونص
أول ما دخلت التاسع قالي الدكتور انه بيولدني قبل موعد الولادة المحدد بأسبوعين عشان البيبي حجمه صغير، وبعد أسبوعين رحت للموعد وكشف علي لقى الرحم مفتوح 3 سم وسوا توسعة لعنق الرحم عشان يستحث الطلق "على قولته" وقالي توقعي الولادة أي وقت..:ss:
وفعلاً رجعت البيت وكان معاي الم خفيف يروح ويجي مثل الم الدورة،وأنا طول الوقت جالسة انتظرالطلق يزيد خخخخ وحده رايقة...:cool2:
على الساعة 3 الفجر صار يجي كل 5 دقايق، عاد هنا قلت خلاص ما بدهاش ورحت تسبحت وسشورت شعري "اللي يشوفني يقول رايحة عرس":bigsmile: وأمي حرام حاسة فيني تكلمني وأقولها مافيني شي بنام..

و زوجي وقتها في الدوام اتصلت فيه وتخرع المسكين يحسب إني بولد على طول، وأنا اهدي فيه وأقوله انتبه تسرع وأنت جاي..
وصلنا المستشفى 4 الفجر واحنا في الطريق سألته بتدخل معاي الولادة؟ قال ولا تفكرين مستحيل، على قولته يخاف من منظر الدم ما يتحمل، وبصراحة زعلت لأن كان ودي يكون أحد معاي لأن أمي بعيدة عني...:sad:
لما دخلت غرفة الولادة كان الرحم مفتوح 4 سم بس، قالت الممرضة انه يبغالي وقت عشان يفتح أكثر لأني بكرية...
زوجي كان تعبان فقلت له يروح ينام وإذا صار شي الممرضة بتكلمه، وطول ما أنا عالسرير كنت أحاول إني ما أفكر في أي شي عشان ما أتوتر وأخاف، وكان معاي كتيب للأذكار وأقرا فيه طول الوقت...
على الساعة 7 الصبح ما زاد ولا سم قالوا لازم طلق صناعي واسألوني إذا كنت أبي إبرة الظهر ورفضتها، قلت عطوني بس الإبرة اللي في الورك عشان تهديني، وعينكم ما تشوف إلا النور:pain: راسي ما اقدر ارفعه وأشوف كل شي اثنين والألم على كيف كيفكم بس كنت أتألم بصمت بدون صراخ، و لما تجي الطلقة الممرضة مسكينة تمسك يدي وشكلها مسكينة بعد الولادة حطولها جبس:gum: .. بس وقتها تمنيت زوجي معاي عشان يدلك ظهري...

لما صارت 9 ونص بدا الجد عاد وجا الدكتور وسألني عن زوجي قلت له نايم، قعد يضحك، وأصلا ما كان لي نية اصحيه إذا هو مايبي يدخل معاي خله نايم أحسن...
وفجأة وأنا أدفع سمعت صوته من الباب يناديني مسكين ماصدقت روحي وأول مادخل مديت له يدي مثل الأفلام عشان يمسكها خخخخ، وقف عند راسي يمسح عليه ويقرا علي، وكل ماوقفت استريح شوي التفت عليه واسأله نمت زين؟ أكلت شي؟ وهو يطالعني مستغرب كأنه يقول ركزي أحسن..:dd:
لما قرب البيبي يطلع صرخ الدكتور على زوجي طلع جوالك وصور بسرعة وزوجي ما كذب خبر وشوي ولا البيبي على صدري والدكتور يعطي زوجي المقص عشان يقص الحبل السري ولما امسكه زوجي قال باسم الله والله أكبر!!!
الدكتور فقع ضحك قال أنت جاي تذبح ذبيحة؟!:dd:
وأنا طبعاً كنت أحس إني طايره على غيمة كأن اللي صار خيال، وبس شفت ولدي راح كل الألم... وأطالع في وجه زوجي وأشوفه مرة يضحك ومرة يبتسم ومرة يحك راسه مو مصدق، ولما خذوا البيبي عشان ينظفونه زوجي لحقهم وخلاني والجوال شغال تصوير...

كانت فعلاً تجربة حلوة، صح مؤلمة ومتعبة لكن في النهاية الوحدة تحس إنها بطلة...والحمد لله ربي رزقني بأحلى رشودي... ويارب انك ترزق كل محرومة وتخليها تحس بهذا الإحساس...