التنازلات يا بنات

حبيبتي انا كمان مخطوبه زيك وخطيبي مسافر بس انصحك بلاش تتنازلي خلاص لانك لو تنازلتي في اي حاجه هياخد عنك فكره مش كويسه خليه يتاكد انك مؤدبه وقوليله ياحبيبي بعد مانجوز كل اللي انت عايزاه هعمله لك بس ممكن اعرف تنازلات ايه مع انه مسافر مش بيشوفك مستنيه ردك

بنت مصر
أولاً أشكرك جداًًً انك شاركتيني في الموضوع

التنازلات في الكلام أولاً
يعني تسمحيله يقولك تلميحات....انتي عارفة طبعا عن بعد الجواز و كلام بيبقى ليه معاني مزدوجة
المشكلة لما بتقوليله مينفعش الكلام ده بتلاقي الرد جاهز يبقى انتي مش بتحبيني...طيب اثبتيلي

أنا بحس انك بمجرد انك تسمحيله يقول حاجة صغيرة يبقى ده تنازل
و زي ما قلت الطريق مفتوح يبقى ازاي نعمل كنترول

و ثانياً في الخروجات و كده
صحيح خطيبي مسافر بس نازل أجازة و انا مش عارفة نظام الحاجات دي
و موضوع الكلام خلاني أخاف من الأجازة دي

برضه مقولتيليش ايه حدود العك في الخطوبة
يعني كل الخطوبات فيها محاولات للعك؟؟

تاني حاجة عايزة اعرف ازاي نعمل كنترول للكلام و كنترول للخروجات
طبعا بطريقة حلوة تخليه يبقى فيه حدود من غير ما يزعل
يعني نهرب من الموضوع بذكاء

في فترة عقد القران

بالنسبة لي عادي انه هناك بعض التلميحات والكلام

وايضا بعض المقبلات الخفيفه

بصي يا ليموندا

انا مخطوبه وخطيبي مسافر بردوا
بس بصراحة انا محصلش من خطيبي اي حاجة من اللى انتي بتقوليه دة خالص

هو كلامه لي عادي جدا زي وحشتيني
بحبك
كلام عادي جدا وانا مش شايفة انه فيه حاجة
لكن كلام التلميحات دة بصرحة هو مش بيقوله خالص
ولا بيطلب مني
ولو طلب كلام عادي وانا موفقتش عمره ماقالي ابدا اني مش بحبه ولا انه عايز دليل
بصراحة انا بحسد نفسي على خطيبي جدا لانه ولد محصلش
عمره ما ضايقني ولا ضغط علي بقول او فعل انا مش موافقه عليه
دايما يقتنع بكلامي وبيوافق عليه جدا
على الرغم انه بعيد عني بس انا وهو بنحس ان الى بنا اكبر بكتير من كلام او لمسه
بصي انا مش عايزة اشكك في خطيبك بس انا من كلام مش شايفة فرق بينه وبين ولد مصاحب بنت وبيخرج معاها في السر

بصوا يا بنات يمكن الكلام اللي انا حقوله يضايق ناس كتير بس هو ده الشرع و ثقوا ان عمر ما ربنا حيامرنا بحاجة الا و تكون في مصلحتنا فانا حقولكم علي شوية حاجات من فقه السنة:
1-حرام انك تقعدي مع خطيبك لوحدكم لغاية ما يعقد عليكي و لازم يكون معاكوا محرم .
2-للاسف ناس كتير تهاونت في انهم يسيبوا بناتهم مع خطابهم دون رقابة ويروحوا في اي مكان دون اشراف وللاسف نتج عن كده حوادث كتير انتوا اكيد عارفينها.
3-لا قدر الله ممكن الخاطب يسيب خطيبته لان الخطوبة دي وعد بالزواج ومش عقد ملزم و ده لو حصل يكون حق للعروسة او للعريس.
فلازم يكون في حدود ما بينكم في الكلام كله .
و يارب اكون قدرت افيدكم .

اززيك اختى الغاليه

مبارك عليك الخطوبه والله يكمللك على خير يارب

اقول ياحبوبه بتعرفى

المفروض فى فتره الخطوبه دى الخاطب تعامليه كرجل غريب عنك

يعنى ولا اى كلام الا فى حدود ضيقه وكمان فى وجود محرم

ولا خروج ولا حتى اى كلام عاطفى ورومانسى

لا يجوز ياحبيبتى

كأنه رجل غريب ياغاليه

كان الشيخ محمود المصرى اكيد بتعرفيه ياغاليه جه مره على قناة الناس كان بيتكلم على الموضوع ده على فكره كانت سلسلة برامج جدا مفيده للمخطوبات والمقبلين على الخطوبه والزواج

كان بيقول ياجماعه انا خايف عليكم

لانه لايجوز الىل بيحصل بين المخطوبين بيقول انا خايف عليكم ان الله يعاقبكم بالغلط اللى كنتوا بتغلطوه فى ايام الخطوبه

لان الخطوبه فقط وعد بالزواج يعنى مش شئ رسمى صح ياحبيبتى؟؟

فليه نبنى حياتنا على كلمه غلط مثلا؟؟

فلاتستقلى حتى لو بكلمه ياغاليه

كل ده لا يجووووز

واحنا بندور على طاعه الله ليباركلك الله فى حياتك ان شاء الله

تبدى حياتك بطاعه الله

لما تكتبوا كتاب( عقد قران) براحتك ياغاليه كلميه عادى وكدا

لكن الان لا يجوز

شوفى الرابط ده فيه مواضيع حلوه اوى توضح حدود العلاقه بين الخاطب وخطيبته

http://go.3roos.com/Q49L2rTj5WL

http://go.3roos.com/gXi7eZ4VMX7

http://go.3roos.com/OiT3dvQ9uh4

http://go.3roos.com/sutcEWYaj9z

فيااختى الحبيبه لو حصل ولقيتى من خطيبك اى شئ او اى تصرف لا يجوز انتى انصحيه باسلوب كويس وشجعوا بعض على كدا ياحبيبتى علشان ربنا يباركلك فى حياتك وزواجك

وربنا يكتبلكم الخير يارب ويوفقك يارب

يسعـدنـى مشـاركتكــم فـــى

:.::مشـروع فرصـة العمـر::.:

.:.مـشــروع.. يـلا نجـهــز للـجنــــة.:.

صفحــة تنفيـذ مـشـروع يـلا نجـهــز للجنـــة

صفحـة تسميـع مشـروع يـلا نجـهــز للجنـــة

أزيــــاء غيـــر ,, غيــــر ..

ليموندا حبيبتى ان شاء الله ربنا يهديلك خطيبك ويهدى كل خاطب يفكر بهذة الطريقة .
وانا بضم صوتى للاخت حبيبة جزاها الله خير
وعليكى ان تعلمى جيدا بان ليس هناك فى الكون من يستحق ان تعصى الله من اجل ارضائة مهما بلغت درجة حبكما لبعض فحب الله وطاعتة اولى وابقى .
وعليكى ايضا ان تقنعى خطيبك بان الحب لا يقاس بمثل هذة التنازلات وبان رفضك نابع من خوفك من الله عز وجل ونابع من حرصك على عدم معصيتة . وفهمية جيدا انك تتمنى اليوم الذى يجمعكى فية الله معة فى غرفة واحدة وبانك تشتاقين الى هذا اليوم اكثر منة ووقتها سوف تجدان المتعة الحقيقة التى لا يعقبها اى ندم لان الله احل هذا لكما ، وعدية بانك وقتها سوف توهبية كل كيانك وانتى بقمة السعادة اما الان فعلية بالصبر والدعاء بأن يجمعكما الله قريبا وصدقينى لن ياتى الصبر الا مع قوة الايمان فابذلى كل جهدك من اجل ان تقربية وتتقربى معة من الله عز وجل .

اصرى على موقفك من الرفض ولكن بذكاء ومهما كانت النتيجة فلن تخسرى شيئا اكثر من خسرانك لرضا الله عنك واذا اطعتي خاطبك فلن تكسبى معة ابدا شئ يساوى سخط الله عليكما .

وحاولى اختى فى الله ان تقرأى كثيرا عن الحدود التى احلها الله بين ا لمخطوبين وعن الاشياء التى حرمها الله عليكما حتى تتمكنى من الرد علية .

وبعد كل هذا اذا فشلتى لاقدر الله فحاولوا وان تعجلوا بعقد القران .

ولكن اياكى والتنازل لاتتنازلى ابداااااااا وحاولى اقناعة بان مايطلبة منك ليس من حقة ولا من حقك فى فترة الخطوبة وان وقتة لم يحن بعد وان هذا بعيييد تماما عن مسالة حبك لة وهددية ايضا بان احترامك لة قد يقل اذا استمرت محاولاتة واذا ضاع الاحترام فلا اعتقد ان الحب يستمر .. ومع كل هذا اقنعية بحبك لة باى طريقة اخرى بعيدة عن ماحرمة الله ، كان تشعرية بمدى خوفك علية واشتياقك ليوم زفافكما واهتمامك بة وعدية بانك ستحاولى ان تعوضية عن هذة الايام بعد الزفاف وبانك ستبذلى كل مافى وسعك من اجل ان تجعلية اسعد رجل فى العالم .

اتمنى ان اكون افدتك وانا تحت امرك فى اى شئ

على فكرة انا وخطيبى لايمكننى ان اصف لكى مدى الحب بيننا ولكن حبنا لله اكبر واذا ضعف ايا منا فان الاخر يذكرة ويقوية .
احيانا والدى ووالدتى يتركونا وحدنا ويبعدوا قليلا كى نتحدث على راحتنا وقتها نحاول ان نتحدث فى الدين واذا غلبتنا انفسنا وقتها اما ننادى على اخى الصغير ليجلس معنا واما اجد ان خطيبى يستأذن وينصرف حتى لا يضعف ايا منا، فى بداية الخطوبة كنت اتضايق من هذا ولكن الحمد لله استطاع ان يقنعنى بان مايفعلة هو الصواب ،،،،،،، صدقينى ماعند الله خير وابقى
ولابد من ان يقوى احدكما الاخر فى كل وقت .

اعذرينى لو طولت عليكى لكن انا حاولت افيدك قدر المستطاع واتمنى انك تبلغينا اية التطورات . واية كان ردة عليكى . سلام ياقمر

نوووسه:

في فترة عقد القران

بالنسبة لي عادي انه هناك بعض التلميحات والكلام

وايضا بعض المقبلات الخفيفه

ماهو لو فيه عقد قران مش مشكلة
المشكلة انهم بيكونوا خاطبين بس و بيقولوا انتي في حكم مراتي
الكلام ده سمعته من بنات كتير و بنت صاحبتي خطيبها كان بيقولها انتي حلالي
مش عارفة ازاي حلاله على الرغم من انه متدين و عارف الحلال من الحرام
بس هي الفكرة ان فيه ناس بتحلل لنفسها حاجات بحجة انهم هيتجوزوا

ناني فيبس:

على الرغم انه بعيد عني بس انا وهو بنحس ان الى بنا اكبر بكتير من كلام او لمسه

أنا دايماً بقوله كده ان الرابط اللي بيننا أكبر من أي كلام
لكن هو بيفهمها انه انا قصدي كفاية عليك اني مخطوبالك يعني بتكبر عليه
وعشان احساسه اني مش مقتنعة بيه بيحاول يضغط عليا بقول يمكن عشان يحس اني مش هسيبه
بس اسلوب الضغط ده سمعت عنه من بنات تانية برضه

ناني فيبس:

بصي انا مش عايزة اشكك في خطيبك بس انا من كلام مش شايفة فرق بينه وبين ولد مصاحب بنت وبيخرج معاها في السر

و أنا خايفة ان الموضوع يكون كده
يعني ان الخطوبة كلها عبارة عن صحوبية مقننة
عشان كده بسألكم ده طبيعي ولا لأ

fardosya:
بصوا يا بنات يمكن الكلام اللي انا حقوله يضايق ناس كتير بس هو ده الشرع و ثقوا ان عمر ما ربنا حيامرنا بحاجة الا و تكون في مصلحتنا فانا حقولكم علي شوية حاجات من فقه السنة:
1-حرام انك تقعدي مع خطيبك لوحدكم لغاية ما يعقد عليكي و لازم يكون معاكوا محرم .
2-للاسف ناس كتير تهاونت في انهم يسيبوا بناتهم مع خطابهم دون رقابة ويروحوا في اي مكان دون اشراف وللاسف نتج عن كده حوادث كتير انتوا اكيد عارفينها.
3-لا قدر الله ممكن الخاطب يسيب خطيبته لان الخطوبة دي وعد بالزواج ومش عقد ملزم و ده لو حصل يكون حق للعروسة او للعريس.
فلازم يكون في حدود ما بينكم في الكلام كله .
و يارب اكون قدرت افيدكم .

بالعكس كلامك صح جداً بس فيه ناس بتحلل لنفسها الحرام و بتهونه
المشكلة ازاي توصلي لخطيبك الكلام ده

كمان بالنسبة للخلوة مبتحصلش عادة بين الخطاب غير في العربية و دي و الله عمالة أفكر فيها عشان عايزة أمنع أي فرصة للخلوة

حبيبة110:


اززيك اختى الغاليه

مبارك عليك الخطوبه والله يكمللك على خير يارب

الله يبارك فيكي

حبيبة110:

كان الشيخ محمود المصرى اكيد بتعرفيه ياغاليه جه مره على قناة الناس كان بيتكلم على الموضوع ده على فكره كانت سلسلة برامج جدا مفيده للمخطوبات والمقبلين على الخطوبه والزواج

كان بيقول ياجماعه انا خايف عليكم

لانه لايجوز الىل بيحصل بين المخطوبين بيقول انا خايف عليكم ان الله يعاقبكم بالغلط اللى كنتوا بتغلطوه فى ايام الخطوبه

لان الخطوبه فقط وعد بالزواج يعنى مش شئ رسمى صح ياحبيبتى؟؟

فليه نبنى حياتنا على كلمه غلط مثلا؟؟

فعلا الكلام ده انا واخداه قاعدة من زمان لأننا بنلاقي الحرام ممكن يقلل من الحلال
و الله انتي نبهتيني للموضوع ده انه حجة قوية ممكن الواحد يقولها

و شكراً على الروابط ياريت أعرف أبعتها لكل المخطوبين.... و خطيبي:sad:

nada_rtv:

اصرى على موقفك من الرفض ولكن بذكاء ومهما كانت النتيجة فلن تخسرى شيئا اكثر من خسرانك لرضا الله عنك واذا اطعتي خاطبك فلن تكسبى معة ابدا شئ يساوى سخط الله عليكما .

وحاولى اختى فى الله ان تقرأى كثيرا عن الحدود التى احلها الله بين ا لمخطوبين وعن الاشياء التى حرمها الله عليكما حتى تتمكنى من الرد علية .

وبعد كل هذا اذا فشلتى لاقدر الله فحاولوا وان تعجلوا بعقد القران .

أنا هنفذ نصيحتك و أستمر في الرفض حتى للكلام
عشان صاحباتي الله يكرمهم نصحوني اني مش مشكلة لما اقوله كلمة حلوة
لكن بالتجربة عرفت ان الكلمة الصغيرة دي بتفتح الباب لكلام تاني
يبقى نقفل باب الكلام من البداية

لكن موضوع عقد القران ده صعب جداً
بصراحة أنا لسه مترددة و فترة الخطوبة دي انا اللي طلبتها
بس أهو من أعمالكم سلط عليكم:angry:

nada_rtv:


ولكن اياكى والتنازل لاتتنازلى ابداااااااا وحاولى اقناعة بان مايطلبة منك ليس من حقة ولا من حقك فى فترة الخطوبة وان وقتة لم يحن بعد وان هذا بعيييد تماما عن مسالة حبك لة وهددية ايضا بان احترامك لة قد يقل اذا استمرت محاولاتة واذا ضاع الاحترام فلا اعتقد ان الحب يستمر

حلوة فكرة التهديد دي....أنا برضه فكرت فيها
بس مش عايزة ابدأ بيها عشان متبقاش الحل السهل قدامي في كل مشكلة
و عشان ميرجعش يحس اني سهل عليا أسيبه
أنا ممكن ألجأ لها في حالة فشل كل المحاولات

nada_rtv:


على فكرة انا وخطيبى لايمكننى ان اصف لكى مدى الحب بيننا ولكن حبنا لله اكبر واذا ضعف ايا منا فان الاخر يذكرة ويقوية .
احيانا والدى ووالدتى يتركونا وحدنا ويبعدوا قليلا كى نتحدث على راحتنا وقتها نحاول ان نتحدث فى الدين واذا غلبتنا انفسنا وقتها اما ننادى على اخى الصغير ليجلس معنا واما اجد ان خطيبى يستأذن وينصرف حتى لا يضعف ايا منا، فى بداية الخطوبة كنت اتضايق من هذا ولكن الحمد لله استطاع ان يقنعنى بان مايفعلة هو الصواب ،،،،،،، صدقينى ماعند الله خير وابقى

ربنا يخليكوا لبعض و ياريت كل المخطوبين زيكوا

اختي الغاليه ليموندا
انا حقولك حاجه عن تجربه سمعتها من ناس مقربين ليا والله العظيم اي تنازل انتي بتقعي فيه في فترة الخطوبه بتدفعي تمنه بعد الجواز حتى لو كان بسيط جدا زي مسك الايد او الكلام الحلو او الخروج
احذري ...................
وخلي بالك انه من ترك شئ لله ابدله الله خيرا منه )وده حديث للرسول الكريم عليه وعلي اله الصلاه والسلام
ولو هوه مصر علي الكلام ده حاولي تقوميه لاخر نفس فيكي ولو منفعش عيدي النظر لان والله العظيم الكلام اللي بقوله ليكي ده حقيقي وعن تجربه واكتر من كده انك بتبقي ضعيفه معاه جدا وبيخليكي يتهئ ليكي انك بتحبيه ومتقدريش تستغني عنه وبالتالي مش بتعرفي تقفي قصاده في اي قرار انتي عايزاه

lemonada:
ماهو لو فيه عقد قران مش مشكلة
المشكلة انهم بيكونوا خاطبين بس و بيقولوا انتي في حكم مراتي
الكلام ده سمعته من بنات كتير و بنت صاحبتي خطيبها كان بيقولها انتي حلالي
مش عارفة ازاي حلاله على الرغم من انه متدين و عارف الحلال من الحرام
بس هي الفكرة ان فيه ناس بتحلل لنفسها حاجات بحجة انهم هيتجوزوا
بصي كان بعض اوقات قليله خطيبي ينسى ويقول كدة بس انا على طول بفكره ان كلامه دة مش مظبوط وهو بيقتنع بيه جدا
لان الصح هو اللى لازم يفرض نفسه

أنا دايماً بقوله كده ان الرابط اللي بيننا أكبر من أي كلام
لكن هو بيفهمها انه انا قصدي كفاية عليك اني مخطوبالك يعني بتكبر عليه
وعشان احساسه اني مش مقتنعة بيه بيحاول يضغط عليا بقول يمكن عشان يحس اني مش هسيبه
بس اسلوب الضغط ده سمعت عنه من بنات تانية برضه

بس هل انتي فعلا مش مقتنعه بيه ؟؟؟؟؟؟؟؟
مهو اكيد هو مش هيوصله الاحساس دة إلا لو انتي بتتصرفي بطريقة تبين كدة
في حاجة مش مظبوطة بتحصل


و أنا خايفة ان الموضوع يكون كده
يعني ان الخطوبة كلها عبارة عن صحوبية مقننة
عشان كده بسألكم ده طبيعي ولا لأ
بصي انتي هتتاكدي من صحة الاحساس دة لو هو انفصل عنك لاقدر الله بحجة انك مش بثبتيله حبك بتنفيذ طلباته
وانتي خالي دايما ان اهلك هما السبب وهما اللى بيمنعوكي من الخروج والكلام وكدة واتفقي معاهم على كدة
وفي نفس الوقت حاسيسيه انك نفسك تخرجي معاه وتكلميه بس اهلك مش موافقين
وطبعا على طول فكريه ان اصلا دة كله حرام حرام
وكلميه في الدين كتير
وان شاء الله ربنا هتلاقيه بيساعدك طول ما انتي عايزة تعملي الصح
وهيلهمك تتصرفي ازاي

بالعكس كلامك صح جداً بس فيه ناس بتحلل لنفسها الحرام و بتهونه
المشكلة ازاي توصلي لخطيبك الكلام ده

كمان بالنسبة للخلوة مبتحصلش عادة بين الخطاب غير في العربية و دي و الله عمالة أفكر فيها عشان عايزة أمنع أي فرصة للخلوة

وانتي تركبي معاه العربية ليه لوحدكوا اساسا؟

memaya
أنا دايماً كنت أسمع ان الرجل مش بيغفر لواحدة انها خرجت معاه من غير ارتباط رسمي حتى لو اتجوزوا
و مادام كده يبقى فعلا اي تنازل ممكن ميغفروش حتى لو كانت البنت بتعمل كده عشان ترضيه

memaya:

واكتر من كده انك بتبقي ضعيفه معاه جدا وبيخليكي يتهئ ليكي انك بتحبيه ومتقدريش تستغني عنه وبالتالي مش بتعرفي تقفي قصاده في اي قرار انتي عايزاه

صح خاصة لما بتكون البنت مالهاش تجارب مش بتعرف تفرق اذا كانت بتحبه فعلا ولا هو أوهمها أنها بتحبه
في حاجة كمان لمحتها في كلام خطيبي بس يعني مسمعتش عنها من بنات تانية اللي هي.... طيب اعملي اللي انا عايزه و انا اعمل اللي انتي عايزاه
طبعاً الكلام ده بيكون بصيغة وعد مش بصيغة تهديد
بس الموضوع كده كله على بعضه مش بيدخل دماغي.... يعني أعمل حاجة انا مش عايزاها عشان ااخد حاجة من حقي أصلاً

ناني فيبس:


بس هل انتي فعلا مش مقتنعه بيه ؟؟؟؟؟؟؟؟
مهو اكيد هو مش هيوصله الاحساس دة إلا لو انتي بتتصرفي بطريقة تبين كدة
في حاجة مش مظبوطة بتحصل

أيوة فعلا انا مش مقتنعة بيه كشخصية..... لسه موصلتش للاقتناع الكامل
ده غير بقى الناس اللي تقولك.... لأ انتي كنتي تستاهلي واحد أحسن من كده
و طبعا كلهم بيتكلموا على اساس الشكل

و هو لمس الموضوع ده في كلامي معاه....
لكن اللي بيحصل ده بيخلي اقتناعي يقل مش يزيد

ناني فيبس:

وانتي تركبي معاه العربية ليه لوحدكوا اساسا؟

الخروج معاه مش مشكلة لانه بيكون في اماكن عامة يعني مفيهوش خلوة
وعشان نخرج لوحدنا لازم نركب العربية لوحدنا

طيب عايزة أسألك سؤال شخصي
خطيبك لما نزل أجازة مخرجتوش خالص لوحدكوا؟
و لو طلب منك كده مقالكيش انه بعيد عنك و لازم تستغلوا اكتر وقت ممكن في انكوا تكونوا مع بعض

اقول بس ياناني كل اللي كتبتيه كنت هكتبه والله حتي شخصيه خطيبك هي نفس شخصيه خطيبي معلشي ياليموناد راي هو راي ناني

الخروج معاه مش مشكلة لانه بيكون في اماكن عامة يعني مفيهوش خلوة
وعشان نخرج لوحدنا لازم نركب العربية لوحدنا

لا تجوز خلوة الخاطب بالمخطوبة


سؤال رقم 7757

السؤال:

هل يجوز أن يخرج شاب مسلم مع فتاة في موعد قبل الزواج؟ وإذا خرجا، فما الذي يترتب على فعلهما؟ ماذا يقول الإسلام بشأن خروج الرجل والمرأة قبل الزواج؟.

الجواب:

الحمد لله
لا يحل للرجل أن يخلو بامرأة لا تحل له ، لأن ذلك مدعاة إلى الفجور والفساد ، قال عليه الصلاة والسلام : " ما خلا رجل بامرأة إلا كان الشيطان ثالثهما " . فإن كان للنظر إليها حال عزمه على الزواج ، ومع عدم الخلوة بأن يكون بحضور والدها ، أو أخيها ، أو أمها ونحو ذلك ، ونظر إلى ما يظهر منها غالبا كالوجه ، والشعر ، والكفين ، والقدمين فذلك مقتضى السنة مع أمن الفتنة .
الشيخ وليد الفريان .

بنت مصر11:
اقول بس ياناني كل اللي كتبتيه كنت هكتبه والله حتي شخصيه خطيبك هي نفس شخصيه خطيبي معلشي ياليموناد راي هو راي ناني

من غير معلش يا بنت بلدي
إحنا عايزين ناخد رأي الناس كلها عشان نستفيد كلنا من تجارب بعض

و عايزاكي انتي مخصوص الله يخليكي تقوليلي ازاي اتعرفتي على خطيبك كويس و انتي بتقولي مشوفتيهوش غير نص ساعة
و فهمت من كلامك انك بتحبيه..... ماشاء الله ماشاء الله
انا مش بحقد عليكي و الله أنا بس بحسد:cool2:

تَنْثُرُ الكَونَ عِطرَاً:
لا تجوز خلوة الخاطب بالمخطوبة

لا يحل للرجل أن يخلو بامرأة لا تحل له ، لأن ذلك مدعاة إلى الفجور والفساد ، قال عليه الصلاة والسلام : " ما خلا رجل بامرأة إلا كان الشيطان ثالثهما " . فإن كان للنظر إليها حال عزمه على الزواج ، ومع عدم الخلوة بأن يكون بحضور والدها ، أو أخيها ، أو أمها ونحو ذلك ، ونظر إلى ما يظهر منها غالبا كالوجه ، والشعر ، والكفين ، والقدمين فذلك مقتضى السنة مع أمن الفتنة .
الشيخ وليد الفريان .

طبعاً الخلوة الكاملة مرفوضة
هقولكوا موقف خطيبي كان عندنا و اخويا عايزنا نقعد مع بعض لوحدنا
قام قعدنا في أوضة و قفل علينا الباب...( اخويا متفرنج و كان عايش في اوروبا :gum: )
بس انا طبعا قلتله ليه بتقفل الباب و قمت بنفسي فتحته على الاخر عشان اللي في الصالة يكونوا شايفينا

بس موضوع الخروج ده متهيألي مش خلوة مادام هنكون في مكان مفتوح
يعني مفيش مجال لحاجة غلط تحصل
المشكلة الوحيدة في العربية... دي بجد خلوة .... بس هقول ايه ربنا يستر

أقولكوا بقى التطورات

النهارده خطيبي إتصل ولا حظت كذا حاجة
- هو مش بيبدأ الكلام ده الا لما مانلاقيش موضوع نتكلم فيه و نسكت
- لو كلمة قالها و انا سكتت من الكسوف بيكمل عادي و الموضوع يزيد
- انه لازم يكون عندي الجرأة أنطق أول ما اسمع كلمة حلوة عشان انا دايما اتكسف و أضيع فيعتبرها اشارة خضرا
- و عشان هو متوقع منك تضيعي كده فهو يفرح بنفسه و يسوق فيها

- عشان كده انا النهارده كنت كل ما اسكت و الاقيه هيبدأ كنت بقوله أوكي و أفتح بسرعة موضوع تاني
أو أطنش و أعمل نفسي مش سامعة حاجة و أتكلم في اي موضوع

طبعا بيفهم على طول و يرد عليا عادي برضه ولا كإنه قال حاجة
مش عارفة الطريقة دي صح ولا غلط
بس همشيها كده مؤقتاً لحد ما الاقي طريقة تانية أحسن

- كمان فيه أسلوب تاني انك تقلبي الموضوع بتهريج
طبعا ده مش هينفع مع كل الناس...
بس نفع مع خطيبي حالياً عشان هو أصلاً بيتكسف جدا.... لما بيلاقيني اتجرأت و رديت بطريقة غير متوقعة هو بيتكسف و يقفل الموضوع

:clap: ربنا يخليكوا يا بنات و نستفيد دايما من بعض
خاصة لما تدخلي في تجربة جديدة عليكي و تضيعي بين اراء الاصحاب .... لازم نساعد بعض عشان محدش يضحك علينا:angry:

[QUOTE=lemonada]أيوة فعلا انا مش مقتنعة بيه كشخصية..... لسه موصلتش للاقتناع الكامل
ده غير بقى الناس اللي تقولك.... لأ انتي كنتي تستاهلي واحد أحسن من كده
و طبعا كلهم بيتكلموا على اساس الشكل

و هو لمس الموضوع ده في كلامي معاه....
لكن اللي بيحصل ده بيخلي اقتناعي يقل مش يزيد



الخروج معاه مش مشكلة لانه بيكون في اماكن عامة يعني مفيهوش خلوة
وعشان نخرج لوحدنا لازم نركب العربية لوحدنا

طيب عايزة أسألك سؤال شخصي
خطيبك لما نزل أجازة مخرجتوش خالص لوحدكوا؟
و لو طلب منك كده مقالكيش انه بعيد عنك و لازم تستغلوا اكتر وقت ممكن في انكوا تكونوا مع بعض[
انا هرد عليكي بمنتهى الصراحة والامانه
انا خطيبي طلب كتير اننا نخرج لوحدنا بس دايما انا كنت بقوله اسال بابا لو وافق اوك انا معنديش مانع
في نفس الوقت انا كنت متفقه معاهم انهم ميوفقوش على الخروج لوحدنا
وفعلا حاول مرتين وبابا كان بيرفض
بس كان مثلا بيجي ياخدني من الشغل بس كنا بنركب ال cta
فطبعا يعتبر مش لوحدنا
والمرة الوحيدة اللى خرجنا ومكنتش خروجة احنا كنا نزلين نشتري حاجات كانت اختي الصغيرة معانا
بس هو كان بيجيلي البيت وكانوا اهلي بيسيبونا نقعد لوحدنا مع بعض
محولش فيهم يعمل حاجة متعجبنيش
والجميل انه لما كنا بنتكلم مرة وانا بقنعه قالي انا اهم حاجة انك تكوني مبسوطة وعمري ما هعمل حاجة انتي مش راديه عنها ابدا
وموضوع نستغل اكتر وقت دة
هههههههههههههه فانا اللى كنت بطلبه مش هو هههههههههه
ان يعني اشوفة كتير عندنا في البيت
وطبعا كانوا اهلي مش بيعلقوا لان عارفين انه مش قاعد مدة طويلة



بس ياليموندا
انتي ليه توفقي ترطبتي بشخص انتي مش مقتنعه بيه
طيب كان ايه اساس الاختيار اصلا؟

ناني فيبس:

وموضوع نستغل اكتر وقت دة
هههههههههههههه فانا اللى كنت بطلبه مش هو هههههههههه
ان يعني اشوفة كتير عندنا في البيت
وطبعا كانوا اهلي مش بيعلقوا لان عارفين انه مش قاعد مدة طويلة

والله أنا كمان نفسي نستغل الوقت كله عشان نعرف بعض أكتر
بس موضوع الخروج ده خليتوني أفكر فيه تاني.... و ان شاء الله نشوف و تكون في أضيق الحدود

ناني فيبس:

بس ياليموندا
انتي ليه توفقي ترطبتي بشخص انتي مش مقتنعه بيه
طيب كان ايه اساس الاختيار اصلا؟

أنا مقتنعة بمواصفاته يعني الشغل - المؤهل - السن - أهله - مستواه الاجتماعي و المادي
الحاجات دي كلها انا مقتنعة بانه 100% الشخص المثالي ليا
لكن شخصيته هو كطباع و طريقة تفكير و الحاجات دي مكانش فيه وقت أفكر فيها
هي الظروف كانت غريبة شوية بس كان على أساس هعرفه أكتر خلال الخطوبة عشان كده طلبت فترة خطوبة
يعني انا من ناحيتي في تفكير مستمر... و هو خلاص معتبر المسألة تحصيل حاصل