الحقوا علي انا خلاص تعقدت ؟؟

السلام عليكم

شخباركم خواتي ؟؟

ادري اني مزعجة بموضوعاتي بس شاسوي والله ماعندي حد اشكيله غيركم ح عندي صديقاتي بس احسهم مايقدرون يساعدوني :sad:

انا يابنات مريت بتجارب خطبه كثيرررررة فاشله قصص تضحك وقصص تصيح وانا اقول الحمد لله اكيد فيها خيرة وانه نصيبي لين الحين ماجاني وحته لو ماتزوجت اكيد هاي الشي خير

انا بقولكم قصة صارت لي قبل سنه من الحين كان في شاب جاء يتقدملي عن طريج الاهل وكلموا الوالدة انهم يجون وهاي الناس احنا نعرفهم ب من بعيد لبعيد وهم عمرهم ماشافوني فانا انصدمت شلون يجون يخطبوني وبعدين الوالد جاء يشاورني شرايج بفلان وانا قعدت استخير وجوا هله وانا طلعت لهم وطبعن صارت مواقف محرجه بهاي اللقاء وفي الاخير يوم طلعوا سالت اموي شصار قالتماتكلموا في الموضوع انا انصدمت في الاخير اكتشفنا انهمكانوا جايين يشوفوني وهل انا مناسبه للمواصفات الي يبيها ولدهم ( طلعت سيارة وانا مدري ) وطبعن ولدهم كان يبي مواصفات ثانيه مش موجودة فيني ماتتخيلون الاحراج الي حسيت فيه :sad: وشلون جوا يقولون لي انه خلاص انتهه الموضوع حسيت اني فقدت الثقه في نفسي مع انه الحمد لله جميله بشاهده الكل بس من بعد هاي السالفه وانا حاسه بالنقص لدرجة اني من كثر ماتعبت تميت شهر كامل ماطلع من البيت بس اروح الجامعه وارجع لانه الكل كان يعرف بالقصة فحسيت انه مابي اشوف حد الا بعد مرور فترة على السالفه
وانا هلي رافضيين فكرة انه ناس يجون يتفرجون على بناتنا وهم انصدموا حالهم حالي انه الخطبه ماكانت الا مجرد ناس جايين يتفرجون على بنتنا

وبعد هاي القصة جوا ناس كثير يخطبون وانا ارفض او اموي ترفضهم من نفسها لانه انا من الاساس مافكر بالزواج اله لين اخلص دراستي

اكيد بتسالون وين المشكله الحين :sad:

المشكله انه من اسبوعين في حرمة جات تعرف على الوالدة وانا من دريت على طول حسيت انه الموضوع فيه خطبه مع انه توني مخلصه موضوع خطبه فاشله في رمضان وابي ارتاح :confused:
المهم هاي الحرمة هي ماتعرفنا ولا احنا نعرفها وجايه تبي تشوفنا عشان تخطبنا لولدها اموي طبعن رفضت وقالت لها انا ماعرض بناتي ( طبعن كرهت الموضوع بعد سالفتي الاوليه وبعد الي صار فيني ) وبس راحت المراة بيتهم وقالت لولدها قالها انا استخرت وارتحت بس مستحيل نخطب واحنا مو شايفين البنت فاتصلت المراة لامويوقالت لها انا راح اجي ازوركم وابي اشوف بناتج وانا انصدمت انا اموي وافقت على هاي الشي بعد ماكانت رافضته :sad: يوم سالتها قالت انا ارتحت وايد لهاي المراة ولولدها وحددت معاها يوم عشان تجي وتشوفنا وتكون زيارة عاديه

وهاي الشي راح يصير بكرة وانا ميته خوف اول شي لاني باطلع وماني عارفه شاسوي احس روحي متوترة وثاني شي صديقاتي قالوا لي انتي ماتبتي بعد الي صار المرة الي فاتت بعد تبين تطلعين ويتفرجون عليج ويمكن تعجبينهم ويمكن لا

انا يابنات ماني عارفه شاسوي ولا شلون اتصرف ؟؟؟ مع انه صديقتي قالت لي قولي لاموج انج موب طالعه ماقدر ماطلع لانه اموي مواعده المرة من اسبوع انها تجي :sad:

يابنات انا ماحب هاي النوع هاي من الخطبات الي ناس تجي وتفرج وانا منصدمة شلون في ناس لين الحين تتزوج بهاي الطريقه الصح انهم يكونون شايفن البنت ويروحون يخطبونها مو يجون يتفرجون عليها كانها سلعه للكل :sad:

ياليت تنصحوني شاسوي شلون اتصرف ؟ مع انه انا واختي راح نسوي روحنا عادي ماندري شسالفه وبنلبس ونكشخ بس هاي جايه على اساس انه احنا ماندري وانه الوالدة بتقولنا انها زيارة من وحدة من صديقاتي

انا تعبــــــــــــــــــــــــــــــــــــــــــــــــــانه خلاص والله احس ماعاد ابي اتزوج تعقدت من كل الي صار فيني والي بيصير

اتمنه القه ردودكم وتريحوني شوي لين بكرة ماقدر استحمل احس روحي على اعصابي :sad:

وشكرا جزيلاااااا

مع تحيــــــــــــــــــــــــاتي :

اسيـ،ــــــــــــــــــــــرة قطــــــــــــــــــــــــــ،ــــــــــــــــــــر